Na bałharskim sieciŭnym łejble Mahorka apublikavany novy albom mienskaha avant-džazavaha ansamblu «Fantastyčnyja płyŭcy».
Dziela zapisu «Fartepijannaha kancertu #1» farmacyja nabyła vyhlad supołki z 6 niezaležnych pijanistaŭ. Viktar Siamaška, Mišel Dajlida, Maksim Subač, Dar`ia Bahasłova, Illa Siŭcoŭ i Maksim Iŭkin pa čarzie syhrali spantannyja minijatury, zrabiŭšy takim čynam dva koły. Adzinym abmiežavańniem było pažadańnie praciahnuć dumku papiarednika, kab kampazycyi sensava złučalisia miž saboj.
«Ašałamlalny materyjał, jaki kambinuje ŭmiełyja, natchnionyja j pa-sapraŭdnamu kranalnyja impravizacyi ź vielmi cikavymi j pryhožymi melodyjami, harmonijami j rytmičnymi strukturami», ‒ dzielicca svaimi ŭražańniami kiraŭnik łejbłu Mahorka Iva Pietraŭ. ‒ «Zapis pa-dobramu rezki, zdolny vyciahnuć śviadomaść i zrabić słuchača ačmurełym. I ŭ toj ža čas muzyka pazytyŭna naładžvaje dy prymušaje ŭśmichacca. Lublu hetu pracu. Jana dobra na mianie ŭpłyvaje».
Zapis «Fartepijannaha kancertu #1» adbyŭsia naprykancy 2018 h. ŭ muzei-majsterni Zaira Azhura. Vychadu alboma papiaredničaŭ EP «Over Beet», syhrany tym ža składam. Ciaham svajho isnavańnia z 2005 h. «Fantastyčnyja płyŭcy» vydali šerah studyjnych i kancertnych albomaŭ, u tym liku seryju Concerto Grosso, pry ŭdziele biełaruskich, polskich i brytanskich muzykaŭ.
