Eskiz pomnika kalektyvu skulptaraŭ Volhi Niačaj i Siarhieja Ahanava, a taksama architektaraŭ M. Markaŭcovaj i V. Jarmolinaj.
Ministerstva kultury karotka abviaściła vyniki konkursu eskiznych prajektaŭ pamiatnaha znaku va ŭročyščy Kurapaty. Pieramožcam nazvany aŭtarski kalektyŭ skulptaraŭ Volhi Niačaj i Siarhieja Ahanava, a taksama architektaraŭ Maryi Markaŭcovaj i Volhi Jarmolinaj, piša Radyjo Svaboda.
Jak vyhladaje rabota, na sajcie Ministersterstva kultury nie paviedamlajecca. Svabodzie nie ŭdałosia aperatyŭna vyśvietlić u ministerstva, jaki varyjant pomnika pieramoh u konkursie.
Adzin z aŭtaraŭ prajektu, Siarhiej Ahanaŭ raskazaŭ Svabodzie, što vybrany varyjant z čatyrma słupami ŭ «iržavym» metale.
Pavodle ŭmovaŭ konkursu pavinna być kaplica. U nas nie kaplica, a toje, što jaje nahadvaje, heta čatyry słupy
Pavodle Ahanava, aŭtary miuć pryncypovuju pazycyju «maksymalna zachavać narodny memaryjał, jaki ciapier isnuje»:
«Dla nas važnyja usie plastyčnyja abjomy i ŭsie kryžy i pomniki, jakija jość. My stavili sabie zadaču maksymalna intehravać svoj znak u isnujučy memaryjał».
Pavodle skulptara, ržavy koler znaku spałučajecca z kurapackimi sosnami, a vertykalnaja forma harmaniruje ź isnujučymi kryžami, što śviedčać pra nieabyjakavaść ludziej, jakija ich ustalavali.
Memaryjalny znak budzie ŭtrymlivać podpisy pra achviaraŭ palityčnych represijaŭ 1930-40 hadoŭ: maci, syn, baćka, dzied, pakolki ŭsie achviary byli čyimiści rodnymi.
«Ciapier iduć pieramovy pa finansavańni, u čaćvier abudziecca pasiedžańnie mastackaj rady pa manumentalnym i dekaratyŭnym mastactvie pry Saviecie ministraŭ, na jakim buduć zaćviardžać prajekt», — dadaŭ Ahanaŭ.
Znak budzie ŭstalavany ŭ Kurapatach naviersie pahorku, dzie ciapier stajać vialikija kryžy i dzie zvyčajna adbyvajucca mitynhi, ale budzie pasunuty na 10 metraŭ ubok ad centru, pakolki tam prachodzić hazapravod.
Aŭtarski kalektyŭ maje prajekt memaryjalizacyi ŭsich Kurapataŭ, ad uvachodu i da Hałhofy, ale pra heta pakul mova nia jdzie, paviedamiŭ Svabodzie Ahanaŭ.
Volha Niačaj i Siarhiej Ahanaŭ — taksama aŭtary pomnika kniaziu Hiedziminu ŭ Lidzie (taho, na jakim kniaź staŭ zvacca Hiedyminam).
