Sud Savieckaha rajona Minska prysudziŭ 24-hadovaha žychara stalicy, jaki biehaŭ ź siakieraj za minakami, da 3 hadoŭ 6 miesiacaŭ pazbaŭleńnia voli, paviedamlaje Minski sud.
Uviečary 28 lutaha ŭ lesaparkavaj zonie pobač z vulicaj Nikicina ŭ Minsku 50-hadovy mužčyna vyhulvaŭ sabaku. Kali hadavaniec pačaŭ hučna brachać, haspadar paviarnuŭsia i ŭbačyŭ nieviadomaha maładoha čałavieka, nižniaja častka tvaru jakoha była zasłoniena tkaninaj. Jon trymaŭ siakieru ŭ padniataj uvierch pravaj ruce. Mužčyna spałochaŭsia i razam z sabakam pabieh dadomu, a čałaviek ź siakieraj jaho dahaniaŭ. U vyniku 50-hadovy minčuk schavaŭsia za płotam doma.
Mužčyna paviedamiŭ pra zdareńnie ŭ pravaachoŭnyja orhany i raskazaŭ pra prykmiety napadnika. Učastkovyja vyśvietlili asobu padazravanaha — 24-hadovaha žychara Minska zatrymali i źmiaścili ŭ izalatar časovaha ŭtrymańnia. Pry ahladzie na miescy zdareńnia i pa miescy jaho žycharstva śledčyja z udziełam ekśpiertaŭ kanfiskavali častki siakiery.
Pavodle słoŭ maładoha čałavieka, jon nakiravaŭsia ŭ les pakałoć drovy, kab źniać stres. Pierad hetym vypiŭ śpirtnoje i leki. Taksama vyśvietliłasia, što za hadzinu da apisanych padziej minčuk pahražaŭ siakieraj jašče dvum ludziam.
