«Ideja apranuć ŭsich nie ŭ vyšyvanku, a ŭ nacyjanalnyja stroi, była vydatnaja i, jak bačycie, mnohija jaje padtrymali», — kaža ministr zamiežnych spraŭ Biełarusi Uładzimir Makiej, sustrakajučy haściej na śviacie, arhanizavanym MZS dla pasłoŭ i pradstaŭnikoŭ dypmisij ź siemjami. Fotarepartaž Vadzima Zamiroŭskaha z hetaha mierapryjemstva publikuje TUT.BY.
Pieršaje śviata vyšyvanki napiaredadni Dnia niezaležnaści prajšło ŭ minułym hodzie ŭ Dipservice Hall u Minsku.
Sioleta placoŭka zastałasia taja ž, ale farmat śviata z padačy pasła Ukrainy ŭ Biełarusi Ihara Kizima trochi źmianili: nazvali jaho «U Biełarusi, jak doma» i prapanavali pasłam i ich siemjam pryjści nie ŭ vyšyvankach, a ŭ nacyjanalnych strojach. I mnohija ideju z zadavalnieńniem padtrymali.
Sustrakaŭ ŭsich ministr Uładzimir Makiej z žonkaj, aktrysaj Vieraj Palakovaj i synami. Usie ŭ vyšyvankach. U minułym hodzie, jak pryznavałasia tady Viera Palakova, jana vydatkavała na dźvie vyšyvanki i pojas uvieś svoj zarobak u teatry. Sioleta na sukienku pajšło jašče bolš.
— Sioleta ja nabyła sukienku, kab i ŭ dalejšym jaje vykarystoŭvać na inšych mierapryjemstvach. Tamu vyrašyła ŭžo hulnuć i patracić hrošy. Kali ščyra, heta byli adpusknyja ŭ Akademii mastactvaŭ. Zatoje ja niezdarma pracavała ceły hod — adpusknyja prybrali mianie i pamiać zastaniecca, — śmiajecca Viera Palakova. — Naohuł, meta takoha mierapryjemstva — abjadnać nas usich za adnym stałom, tamu što siońnia ŭ nas budzie pradstaŭlenaja nie tolki nacyjanalnaja vopratka i kałaryt, ale i nacyjanalnaja ježa. I heta dapamoža nam paznajomicca bližej i pabyć trochi datyčnymi da kultury adzin adnaho.
Pasoł Ukrainy ŭ Biełarusi Ihar Kizim pryjšoŭ z žonkaj i dvuma synami.
Pasoł Ukrainy ŭ Biełarusi Ihar Kizim pryjšoŭ z žonkaj i dvuma synami. Usio — u vyšyvankach. Pasoł pryznajecca: u minułym hodzie zrabiŭ nievialiki demarš i pryjšoŭ na śviata va ŭkrainskaj, a nie biełaruskaj vyšyvancy. I ŭžo na miescy prapanavaŭ u nastupny raz usim pasłam pryjści ŭ svaich nacyjanalnych strojach.
— MZS Biełarusi letaś dasłała ŭsim dypłamatam vyšyvanki pierad śviatam. Ale ja vyrašyŭ, što kali my, ukraincy, majem svaje vyšyvanki, to ja nadzienu svaju. A potym prapanavaŭ takuju ideju Uładzimiru Uładzimiraviču, i voś, jak bačycie, jana ŭsim pryjšłasia pa dušy, — kaža pasoł. — Nacyjanalnyja stroi i rodnuja mova dapamahajuć samavyznačeńniu naroda. A tyja, chto kaža, što lohkaje pačućcio nacyjanalizmu — heta drenna, nie majuć racyi. Naadvarot, heta toje, što robić ludziej patryjotami svajoj krainy.
U nacyjanalnych strojach pryjšli nie ŭsio. Naprykład, pasoł Izraila Ałon Šoham, jaki letaś byŭ biez vyšyvanki, ale abiacaŭ pryjści ŭ joj sioleta, byŭ u prostym kaściumie.
Uładzimir Makiej i pasoł Izraila.
— Ale ŭ nastupnym hodzie abiacajecie! — paśmiajaŭsia, sustrakajučy pasła na ŭvachodzie, Uładzimir Makiej.
Paźniej pasoł patłumačyŭ, čamu nie nadzieŭ ni vyšyvanku, ni nacyjanalny stroj.
— U nas nacyjanalnaha adzieńnia, na žal, niama. U nas jość niešta blizkaje da nacyjanalnaj vopratki, i heta toje, što my zabrali adsiul, ź Biełarusi. Ale heta budzie trochi niepryhoža: viarnucca dadomu z rečami, jakija uziaŭ u haspadara, heta nieprystojna. Jość relihijnaja adzieńnie, ale śvieckija ludzi jaho nie apranajuć. A tak šmat z tutejšaha jość u Izraili, i roźnicy amal nielha znajści. A raz nielha znajści, to ŭsie my padobnyja, — śmiajecca pasoł Ałon Šoham.
Sioleta źmianiŭsia farmat nie tolki dres-koda, ale i kuchni: na śviacie była pradstaŭlenaja i biełaruskaja, i nacyjanalnyja kuchni dypłamataŭ. Ukraincy častavali sałam, ahurkami i varenikami, Sudan — płovam, Turkmienistan — prysmakami. Časovy Pavierany ŭ spravach Karaleŭstva Niderłandaŭ Paŭł van Oostviejn prynios syr na špažkach-ściahach, a na nohi abuŭ kłompy — hałandskija draŭlanyja čaravički.
— Vadzić u ich aŭtamabil niaprosta, ale chadzić nie vielmi ciažka, — paśmiajaŭsia Paŭł van Oostviejn.
Dačka Časovaha Pavieranaha ŭ spravach Karaleŭstva Niderłandaŭ była ŭ nacyjanalnym stroi i draŭlanych čaravičkach.
Pakul hości kaštavali stravy adzin adnaho i razhladali nacyjanalnyja kaściumy, Uładzimir Makiej na pravach haspadara viečara padziakavaŭ usim, chto sabraŭsia, i paprasiŭ pamiatać, što śviata nieaficyjnaje, tamu možna atrymać zadavalnieńnie ad niefarmalnych znosinaŭ.
Nacyjanalnaja kuchnia, jak akazałasia, niamała zbližaje. Pačastavać Uładzimira Makieja svaimi stravami staralisia ŭsie dypłamaty. Niekatorym dla hetaha navat pryjšłosia pastajać u čarzie i pačakać, pakul ministra pačastujuć varenikami, ŭschodnimi prysmakami, miasam i nastojkaj.
Kaštoŭnaść takich śviataŭ, pa słovach Makieja, vielmi vysokaja — heta dapamahaje zblizicca i znajści ahulnuju movu.
«Usio, što źviazana z raźvićciom nacyjanalnaj kultury, identyčnaści, źviazana i z umacavańniem niezaležnaści dziaržavy. Viadoma, hetaja niezaležnaść zaŭsiody darahoha kaštuje, jak kaža naš prezident. Ale dziela hetaha varta žyć i zmahacca, tamu što adnaznačna žyć i raźvivacca my možam tolki tady, kali budziem niezaležnaj dziaržavaj.
Tamu samaidentyfikacyja ŭ vyhladzie vyšyvanak, movy i kultury ŭpłyvaje na naša raźvićcio i ŭmacavańnie našaj niezaležnaści. My chočam pakazać, što kožny narod adroźnivajecca, maje svaju śpiecyfiku, ale idei dabra, miru i dabrabytu nas abjadnoŭvajuć. My pavinny, niahledziačy na raznastajnaść i adroźnieńnie, dumać pra toje, što abjadnoŭvaje, a nie zavastrać uvahu, jak, na žal, zaraz robiać mnohija, na našych adroźnieńniach», — kaža Uładzimir Makiej.
U nastupnym hodzie taki farmat śviata abiacajuć paŭtaryć.
