Pierajmienavać vulicu ŭ honar biełaruskaha navukoŭca Barysa Kita ŭ Navahradckim rajonnym vykanaŭčym kamitecie ličać niemetazhodnaj spravaj — tak piša staršynia vykankama Anatol Markievič u adkazie na pietycyju, jakaja sabrała amal paŭtysiačy podpisaŭ, paviedamlaje Radyjo Svaboda.
«Pierajmienavańnie vulicy ciahnie za saboj zamienu pašpartoŭ hramadzianaŭ, jakija pražyvajuć na hetaj vulicy, techničnych pašpartoŭ i inšych dakumentaŭ, jakija patrabujuć peŭnych materyjalnych vydatkaŭ», — śćviardžaje haradzki kiraŭnik Anatol Markievič.
Papraŭdzie, hramadzianam pry źmienie nazvy vulicy nia treba mianiać pašparty, a tolki pastavić novuju piačatku ab rehistracyi na miescy žycharstva.
Markievič zhadvaje, što pamiać pra Barysa Kita zachoŭvajecca ŭ horadzie inšym čynam: navukoviec nazvany hanarovym hramadzianinam horadu, jahonaje imia zaniesienaje ŭ Knihu słavy Navahradzkaha rajonu, u škole № 1 jość muzej Barysa Kita, 19 hadoŭ zapar prachodzić intelektualny turnir jahonaha imia.
U petycyi zhadvali pra zvańnie hanarovaha hramadzianina — nazvać u jahony honar vulicu prapanoŭvali, kab «pakazać, što Navahradak budzie zaŭsiody pamiatać svajho słynnaha syna». Pieranazvać prapanoŭvali adnu z centralnych vulic — najlepš padychodzić dla hetaha, pisali ŭ petycyi, vulica Savieckaja.
