«Atakamski pryšelec». Fota: Bhattacharya S et al. 2018
U adroźnieńnie ad znojdzienaha ŭ 1996-m u Rasii cieła nieviadomaj istoty (Kyštymskaha karlika, abo «Alošańki»), jakoje było nibyta zhublena navukoŭcami, pareštki Aty ŭsiebakova vyvučajucca navukovaj supolnaściu ŭžo amal 15 hadoŭ. Piać hod tamu, jak raspaviadaje hienietyk Stenfardskaha ŭniviersiteta Hary Nołan, jamu patelefanavaŭ adzin ź jaho siabroŭ i prapanavaŭ paŭdzielničać u analizie cieła mierkavanaha «pryšelca».
Jak adznačaje navukoŭca, Ata vyhladaje jak inšapłanietnik nie tolki zvonku, ale i znutry. Naprykład, jaje škilet padobny pa svajoj budovie i ŭzroŭni raźvićcia na vaśmihadovaje dzicia, niahledziačy na toje, što jaje rost składaje ŭsiaho 15 santymietraŭ, što ekvivalentna pamieram zarodka va ŭłońni maci. Akramia taho, jana maje ŭsiaho 10 par rebraŭ, a nie 12, jak zdarovyja ludzi, abo 11, jak nośbity niekatorych hienietyčnych defiektaŭ.
Jašče ŭ 2013 hodzie Nołan i jaho kalehi nanieśli ŭdar pa «pazaziemnych» teoryjach pachodžańnia Aty, jakija raspaŭsiudžvali ŭfołahi: jany rasšyfravali častku DNK Aty i vyjavili, što hetyja reštki naležać čałavieku, dziaŭčyncy, jakaja pamierła adnosna niadaŭna.
Raskryŭšy ziamnoje pachodžańnie Aty, navukoŭcy pasprabavali vyśvietlić, jak hetaja dziaŭčynka nabyła taki niezvyčajny źniešni vyhlad. Paśla novych daśledavańniaŭ jany całkam rasšyfravali jaje hienom i praanalizavali prykładna try miljony drobnych mutacyj u im.
Ahułam hienietykam atrymałasia znajści šeść dziasiatkaŭ hienaŭ ź jarka vyjaŭlenymi niehatyŭnymi źmienami, mnohija ź jakich byli źviazanyja z raźvićciom skalijozu, parušeńniami ŭ sintezie kałahienu i kaścianoje tkanki, zaŭčasnym stareńniem, anamalijami u kolkaści rebraŭ i inšymi charakternymi rysami Aty. Heta pakazała na toje, što jana pamierła ŭ rańnim dziacinstvie abo va ŭłońni maci, i naŭrad ci pražyła vosiem hadoŭ.
