U ZŠA ŭchvalili prymianieńnie hiennaj terapii dla lačeńnia recydyŭnych formaŭ limfom (raku kryvi) u darosłych pacyjentaŭ. Pra heta piša N+1 sa spasyłkaj na The San DIego Union-Tribune.
Svajo ŭchvaleńnie padobnaha lačeńnia dało amierykanskaje Kiravańnie pa kantroli za praduktami i lekami (FDA).
Preparat, z dapamohaj jakoha budzie pravodzicca lačeńnie darosłych pacyjentaŭ, zarehistravany pad handlovaj markaj Yescarta. Jon byŭ raspracavany i pradstaŭleny kampanijaj Kite Pharma (jakuju niadaŭna kupiła kampanija Gilead Sciences za $12 młrd). Kliničnyja vyprabavańni pakazvajuć, što 72% pacyjentaŭ prademanstravali stanoŭčuju reakcyju na terapiju z užyvańniem Yescarta, a dla 51% udałosia damahčysia poŭnaj remisii. Vartaść hiennaj terapii preparatam Yescarta składzie $373 tys.
Raspracoŭščyki preparata adznačajuć, što dazvoł na prymianieńnie hiennaj terapii — heta najvažniejšy krok u baraćbie z recydyŭnymi i refraktarnymi limfomami. Akramia taho, niadaŭnija daśledavańni dazvalajuć spadziavacca na chutkuju mahčymaść prymianieńnia hiennaj terapii nie tolki dla baraćby z rakam kryvi, ale i dla lačeńnia ščylnych puchlin.
Upieršyniu vid hiennaj terapii dla baraćby z rakam byŭ uchvaleny ŭ ZŠA 30 žniŭnia 2017 hoda. Tady hiennuju terapiju dazvolili vykarystoŭvać dla lačeńnia vostraha limfabłastnaha lejkozu ŭ dziaciej i maładych pacyjentaŭ da 25 hadoŭ, jakija zvyš za dva miesiacy nie paddajucca inšym vidam lačeńnia. Pry dadzienym lačeńni hienietyčna madyfikavanyja kletki kryvi samoha pacyjenta aktyvizujuć jaho imunnuju sistemu, kab taja aktyŭna źniščała rakavyja kletki. Kampanijaj Novartis byŭ raspracavany i pratestavany preparat tysahienlekłusieł, jaki vychodzić pad handlovaj markaj Kymriah. Pieršapačatkovaja zajaŭlenaja cana hiennaj terapii z dapamohaj Kymriah skłała $475 tysiač. Raspracoŭščyki abiacali nie brać hrošaj z pacyjentaŭ, jakim jana nie dapamahaje na praciahu pieršaha ž miesiaca. U chodzie vyprabavańniaŭ preparata zdaravieli 83% pacyjentaŭ.
