Źjavilisia novyja dokazy taho, što zienitna-rakietny kompleks «Buk», jaki źbiŭ pasažyrski «boinh» (rejs MH17) na ŭschodzie Ukrainy, trapiŭ tudy z terytoryi Rasii, paviedamlaje VVS.
Bellingcat
Fatahrafija, apublikavanaja napiaredadni Abjadnanaj śledčaj hrupaj (JIT), — heta dziaviataja pa liku vyjava toj samaj rakietnaj ustanoŭki, zaklučyli ŭ mižnarodnaj ekśpiertna-žurnalisckaj rasśledavalnickaj hrupie Bellingcat.
«Da siońniašniaha dnia praktyčna nie zastavałasia sumnieńniaŭ u tym, što MH17 byŭ źbity rasijskim «Bukam». Ciapier, kali jość dziaviaty dokaz prysutnaści na ŭschodzie Ukrainy ŭstanoŭki, jakaja naležyć rasijskim Uzbrojenym siłam, nijakich sumnievaŭ być nie moža», — havorycca ŭ paviedamleńni hrupy.
Pasažyrski łajnier Boeing 777 avijakampanii Malaysian Airlines byŭ źbity 17 lipienia 2014 hoda. Usie 298 čałaviek, jakija znachodzilisia na borcie, zahinuli.
Rasijski bok śćviardžaje, što ŭ katastrofie vinavatyja ŭzbrojenyja siły Ukrainy, jakija supraćstajać sieparatystam na ŭschodzie krainy. Kijeŭ u svaju čarhu ŭskładaje adkaznaść na Rasiju, jakaja pieraviezła «Buk» praź miažu i pieradała jaho sieparatystam.
Paraŭnańnie detalaŭ «Buka» na apošniaj fatahrafii z dvuma raniej apublikavanymi videazapisami, na jakich jon źniaty z pravaha borta (u Rasii i ŭ horadzie Tarez Danieckaj vobłaści Ukrainy), dazvalaje śćviardžać, što na ŭsich ich — adna i taja ž ŭstanoŭka, pišuć u Bellingcat.
«Najbolš vidavočnyja padobnyja rysy ŭsich troch vyjaŭ — šmatlikija biełyja mietki na «Buku». Frahmienty zafarbavanych ličbaŭ, markiroŭka niehabarytnaha hruzu na bakavym ščytku husienicy i markiroŭka centra mas (jakaja nahadvaje pryceł) całkam supadajuć. Hetyja detali supadajuć jak pa vonkavym vyhladzie, tak i pa ich ŭzajemnym raźmiaščeńni», — zajavili ŭ Bellingcat.
Fatahrafija mahła być zroblenaja ŭ dzień krušeńnia «boinha», 17 lipienia 2014 hoda, va ŭkrainskim horadzie Makiejeŭka, miarkujuć u JIT — śledčaj hrupie, kudy ŭvachodziać pradstaŭniki pravaachoŭnych orhanaŭ Aŭstralii, Bielhii, Małajzii, Niderłandaŭ i Ukrainy. Bellingcat pakul nie ŭdałosia dakładna vyznačyć, dzie byŭ zrobleny zdymak.
Na fatahrafii «Buk» vidać z pravaha borta. Jon pahružany na trejler Volvo ź biełaj kabinaj, jaki, jak ličać u Bellingcat, vioz jaho pa ŭschodzie Ukrainy 17 lipienia. Taksama na zdymku vidać ciomna-sini mikraaŭtobus Volkswagen, jaki supravadžaŭ «Buk» ŭ toj dzień.
Hrupa pryjšła da vysnovy, što samachodnaja rakietnaja ŭstanoŭka na zdymku — heta «Buk» za numaram 332, jaki raniej vyznačaŭsia Bellingcat jak «Buk 3ch2», z rasijskaj 53-j zienitna-rakietnaj bryhady.
***