Aryhinał Biblii Hutenbierha dastaŭleny z Hiermanii ŭ Biełaruś, paviedamlaje BIEŁTA.
Frahmient hetaha vielmi redkaha knižnaha pomnika zachoŭvajecca ŭ Nacyjanalnaj biblijatecy Hiermanii ŭ Lejpcyhu. Śpiecyjalnym rejsam u supravadžeńni ekśpiertaŭ-knihaznaŭcaŭ, dypłamataŭ i supracoŭnikaŭ achovy kniha prybyła ŭ Nacyjanalnuju biblijateku Biełarusi.
Heta kniha ličycca samym staražytnym, znakamitym i darahim vydańniem u Jeŭropie, jana stanie ekspanatam na vystavie «Francysk Skaryna i jaho epocha» ŭ Nacyjanalnaj biblijatecy, jakaja budzie adkryta dla šyrokaj publiki 15 vieraśnia.
Biblija Hutenbierha tradycyjna ličycca punktam adliku historyi knihadrukavańnia ŭ Jeŭropie i pavarotnym momantam u pierachodzie ad siarednieviakoŭja da sučasnaha śvietu. Kniha, nadrukavanaja hatyčnym šryftam, pryznana šedeŭram pryhožaha druku i mastackaha majsterstva. Biblija poŭnaściu nadrukavana ŭ dźvie kałonki. Vialikija litary i zahałoŭki vykanany ŭručnuju z varyjacyjami malunka.
U śviecie zachavałasia tolki niekalki ekzemplaraŭ unikalnaha vydańnia, i zusim nievialikaja kolkaść krain moža dazvolić sabie prademanstravać hetu knihu publicy. Mahčymaść pradstavić vielmi redkaje vydańnie ŭ Biełarusi źjaviłasia dziakujučy sadziejničańniu pasolstva FRH u Biełarusi i Nacyjanalnaj biblijateki Hiermanii.
Kab dapoŭnić vobraz unikalnaha vydańnia, pobač z frahmientam aryhinalnaha pomnika na vystavie budzie demanstravacca faksimilnaje vydańnie poŭnaj Biblii Hutenbierha, vykananaje ŭ 1913 hodzie ŭ tym ža Lejpcyhu. Siońnia heta vydańnie taksama ličycca biblijahrafičnaj redkaściu, jano prybyło na vystavu z Rasijskaj dziaržaŭnaj biblijateki ŭ Maskvie.
