U anieksavanym Krymie razam ź simfieropalskimi pikietoŭcami zatrymali taksama pravaabaroncu Lilu Hiemiedžy.
Pra heta paviedamlajuć Krim.Riealii.
«Mnie patelefanavaŭ znajomy, jakoha sprabavali zatrymać i advieźci ŭ RAUS. Ja pajechała da jaho. Jaho udałosia «adbić», i jon pajechaŭ. Tut mianie ŭbačyŭ dziadula, jaki paprasiŭ mianie pradstaŭlać jaho intaresy. Jaho adpuścili supracoŭniki palicyi. U vyniku na dziadulu byŭ składzieny pratakoł dastaŭki. Ja pajechała ź im u Centralny RAUS, akazałasia, što ja zatrymanaja razam ź im», — paviedamiła Hiemiedžy.
Jak adznačyła pravaabaronca, rasiejskija siłaviki sprabujuć znajści «zadumu» ŭ dziejańniach udzielnikaŭ pikieta. «Pakul siadzim, čakajem. Pryjechaŭ advakat Džemil Ciemišaŭ, jaki budzie pradstaŭlać intaresy ŭsich zatrymanych. Pakul siłaviki cikaviacca takimi pytańniami: što byŭ za pikiet, jakija byli patrabavańni i z čym zvazanyja niezadavalnieńni», — skazała jana.
Ranicaj 14 žniŭnia ŭ Simfieropali siłaviki zatrymali pa mienšaj miery piać čałaviek, jakija vyjšli na adzinočnyja pikiety ŭ padtrymku aryštavanaha raniej krymskatatarskaha aktyvista Sierviera Karamietava.
Adzinočny pikiet — adzinaja dazvolenaja ŭ Rasii forma pratestu, jakaja nie patrabuje papiaredniaha ŭzhadnieńnia z uładami. Maskva sprabuje sadzić hetuju normu i ŭ akupavanym ŭkrainskim Krymie, jaki ličyć «častkaj Rasii». Niahledziačy na heta, 76-hadovy aktyvist Siervier Karamietaŭ na minułym tydni byŭ zatrymany mienavita padčas praviadzieńnia adzinočnaha pikietu.
Padkantrolny Kramlu Viarchoŭny sud anieksavanaha Kryma 11 žniŭnia adchiliŭ apielacyju abarony na administracyjny aryšt krymskatatarskaha aktyvista Sierviera Karamietava i pakinuŭ jaho pad vartaj da 19 žniŭnia.
Mižnarodnaja pravaabarončaja arhanizacyja Amnesty International zaklikała rasijskija ŭłady nieadkładna vyzvalić Karamietava.
Siervier Karamietaŭ pravodziŭ adzinočny pikiet pad budynkam padkantrolnaha Kramlu Viarchoŭnaha suda Kryma, dzie słuchałasia sprava namieśnika staršyni Miedžlisa krymskatatarskoho naroda Achtema Čyjhoza, za ŭdzieł u mitynhu ŭ padtrymku terytaryjalnaj cełasnaści Ukrainy pierad budynkam Viarchoŭnaha Savieta Kryma 26 lutaha 2014.
Sierviera Karamietava zatrymlivajuć u anieksavanym Krymie ŭžo nie ŭpieršyniu. U Dzień pamiaci achviaraŭ hienacydu krymskich tataraŭ 18 traŭnia jaho zatrymali rasijskija siłaviki paśla taho, jak jon pryjšoŭ na płošču ŭ Simfieropali z krymskatatarskim ściaham i partretami svaich baćkoŭ, jakija stali achviarami departacyi 1944 hoda. A treciaj hadzinie nočy jaho adpuścili paśla składańnia administracyjnaha pratakoła.
