Turcyja prystupiła da ŭźviadzieńnia «ściany biaśpieki» uzdoŭž miažy ź Iranam. Budaŭničyja pracy pačalisia ŭ aŭtorak, 8 žniŭnia, paviedamiła administracyja pravincyi Ahry. Na raspaŭsiudžanych uładami fotazdymkach vidać budaŭničyja krany, jakija ŭstanaŭlivajuć na miažy bietonnyja elemienty šyrynioj kala dvuch mietraŭ, paviedamlaje DW.
Takija miery nakiravanyja pierš za ŭsio suprać zabaronienaj u Turcyi Kurdskaj rabočaj partyi (KRP), a taksama blizkaj da jaje iranskaj hrupoŭki «Partyja svabodnaha žyćcia ŭ Kurdystanie», viadomaj svaimi teraktami na paŭnočnym zachadzie Irana.
Trochmietrovyja zaharody majuć praduchilać praniknieńnie ŭ krainu kurdskich bajevikoŭ i kantrabandystaŭ z terytoryi Irana. Pra płany budaŭnictva ścieny praciahłaściu 144 kiłamietry paviedamiŭ u červieni prezident Turcyi Redžep Taip Erdahan.
U siaredzinie červienia 2017 hoda tureckija ŭłady zajavili ab zakančeńni budaŭnictva bolšaj častcy ściany na miažy ź Siryjaj. Pa słovach ministra abarony Turcyi Fikry Yšyka, zavieršanyja raboty na ŭčastku ŭ 680 z 828 kiłamietraŭ. Uźviadzieńnie hetaj zaharody dapamoža praduchilić praniknieńnie terarystaŭ u Turcyju, ukazaŭ jon. Źniešnija miežy Turcyi ŭ ramkach zabieśpiačeńnia «intehravanaj biaśpieki» buduć abstalavanyja sistemami aśviatleńnia, sensarami i kamierami videanazirańnia, dadaŭ Yšyk.
