Alaksandr Łukašenka vyzvaliŭ ad pasady staršyniu Dziaržvajenprama Siarhieja Hurulova. Zamiest jaho kiravać hetym stratehičnym kirunkam pryznačany hienierał-major Aleh Dvihaloŭ, jaki dahetul byŭ kamandujučym Vajenna-pavietranymi siłami i vojskami supraćpavietranaj abarony Uzbrojenych Sił Biełarusi.
«Naša Niva» sabrała niekalki faktaŭ pra novaha top-čynoŭnika.
1. Patryjot-dziaržaŭnik i intelektuał
Kalehi Dvihalova pa štabie raspaviadajuć, što jon vyklikaje stanoŭčyja ŭražańni. Maŭlaŭ, pra Dvihalova navat žartavali, što dla kamandujučaha jon navat nadta miakki, nikoli nie łajaŭsia matam.
«Abychodzicca ź ludźmi roŭna, taktyčna. Tam, dzie na strelbach inšyja «tapik» [telefon — NN] kidali, jon zaŭždy byŭ vytrymany. Lubiŭ pytać radki dziaržaŭnaha himna, kab jamu ich cytavali. Patryjatyčna nastrojeny, choć jon i naradziŭsia nie tut, i zahartavany ŭ savieckaj sistemie», — raskazali nam krynicy.
«Jon hienierał-intelektuał, a nie hienierał-słužaka. Jamu važna davodzić da inšych svaju dumku, a nie rubić šablaj, jak šmat chto tut umieje. Usie ŭzory techniki praź jaho prachodzili zaŭsiody, jon raźbirajecca, vidać, tamu i pryznačyli», — miarkujuć kalehi pa štabie.
2. Niadaŭna dabudavaŭ kvateru na Łahojskim trakcie
Jak stała viadoma «Našaj Nivie», niekalki miesiacaŭ tamu Dvihaloŭ dabudavaŭ kvateru na Łahojskim trakcie — heta «dvuška» amal na 60 kvadrataŭ.
Na jaje budučy kiraŭnik Dziaržvajenprama braŭ lhotny kredyt u «Biełarusbanku», jaki, darečy, pahasiŭ daterminova.
Svaju raniejšuju kvateru na vulicy Surhanava — taksama «dvušku» — hienierał padaryŭ svajmu synu.
3. Syn pracuje ŭ brytanskaj karparacyi, nie lubić ukraincaŭ, uchvalaje anieksiju Kryma
Syna hienierała zvać Uładzisłaŭ, jamu 28 hadoŭ. Chłopiec skončyŭ fakultet suśvietnaj ekanomiki BDEU u 2011 hodzie i peŭny čas byŭ u biełaruskim filijale karparacyi British American Tabacco śpiecyjalistam pa biaśpiecy. U kampanii paviedamili, što Uładzisłaŭ Dvihaloŭ bolš u ich nie pracuje.
Admietna, što staronka Uładzisłava UKantakcie zavalenaja prymityŭnaj antyŭkrainskaj i antyamierykanskaj prapahandaj, nakštałt voś takich karcinak, jakija my ŭziali sa staronki syna hienierała.
4. Žonka pracavała nastaŭnicaj u Krymie
Žonka kiraŭnika Dziaržvajenprama naradziłasia ŭ Tambovie. Niejki čas jana pracavała nastaŭnicaj u Sievastopali, Džankoi.
Volha Dvihalova (Caruk).
Jak vynikaje z kamientaroŭ na «Adnakłaśnikach», niekali za hetuju žančynu supierničali niekalki aficeraŭ, ale, jak pakazała budučynia, tolki Dvihaloŭ dasłužyŭsia da hienierała, astatnija zastalisia pałkoŭnikami i słužać ciapier u Rasii.
Aproč hetaha, hienierał maje šmat svajakoŭ u Rasii.
5. 100%-ny vykanaŭca
Jak patłumačyŭ «Našaj Nivie» vajskovy ahladalnik Alaksandr Alesin, pryznačeńniem Dvihaloŭ abaviazany svajoj biezdakornaj adkaznaści.
«Hety čałaviek — vykanaŭca vysokaha kłasu, jaki na svajoj pasadzie pravodziŭ liniju prezidenta. Vyhladaje, što palityčnaje kiraŭnictva ŭśviadomiła — kamandavać u VPK nielha, tut nie padychodziać čystyja vajskoŭcy, treba sučasny mieniedžmient. I tamu ŭziali jaho, čałavieka z hłybokimi techničnymi viedami. Heta taksama pakazvaje viektar raźvićcia — vyhladaje, uchił budzie ŭ bok raspracoŭki i ŭdaskanalvańnia zienitna-rakietnych kompleksaŭ, pavietranych aparataŭ», — miarkuje Alesin.
***
Aleh Dvihaloŭ naradziŭsia 21 maja 1965 hoda na vostravie Vite Paŭnočnamorskaha rajona Murmanskaj vobłaści. Raniej tam znachodzilisia savieckija vajskoŭcy, ciapier heta biaźludny zakinuty vostraŭ.
Paśla zakančeńnia ŭ 1987 hodzie Minskaha vyšejšaha inžyniernaha zienitnaha rakietnaha vučylišča SPA vajennuju słužbu prachodziŭ na pasadach načalnika raźliku antennaha pasta radyjotechničnaj batarei zienitnaha rakietnaha dyvizijona, namieśnika kamandzira radyjotechničnaj batarei — aficera naviadzieńnia zienitnaha rakietnaha dyvizijona, načalnika ŭlikova-apieracyjnaha adździaleńnia — načalnika štaba miascovaj abarony składa rakietna-artyleryjskaha ŭzbrajeńnia i bojeprypasaŭ, načalnika ŭlikova-apieracyjnaha adździaleńnia składa rakietna-artyleryjskaha ŭzbrajeńnia i bojeprypasaŭ, staršaha aficera hrupy apracoŭki infarmacyi centra apieratyŭnaj vyviedki kamandnaha punkta Vojskaŭ SPA, staršaha aficera hrupy apracoŭki infarmacyi centra apieratyŭnaj vyviedki centralnaha kamandnaha punkta, načalnika centra apieratyŭnaj vyviedki centralnaha kamandnaha punkta.
Paśla zakančeńnia ŭ 2001 hodzie Vajennaj akademii Biełarusi vajennuju słužbu prachodziŭ na pasadach namieśnika načalnika pa vychavaŭčaj pracy centralnaha kamandnaha punkta Vojskaŭ SPA, namieśnika načalnika punkta vajskovaj čaści VPS i vojskaŭ SPA, kamandzira vajskovaj čaści — namieśnika pa bajavym kiravańni načalnika Hałoŭnaha štaba VPS i vojskaŭ SPA.
Paśla zakančeńnia ŭ 2008 hodzie fakulteta Hienieralnaha štaba Vajennaj akademii Respubliki Biełaruś vajennuju słužbu prachodziŭ na pasadzie načalnika štaba — pieršaha namieśnika kamandujučaha vojskami PZATK VPS i vojskaŭ SPA.
U červieni 2011 hoda byŭ pryznačany na pasadu načalnika hałoŭnaha štaba — pieršaha namieśnika kamandujučaha Vajenna-pavietranymi siłami i vojskami supraćpavietranaj abarony.
