Apielacyjny sud u Niderłandach pakinuŭ u sile vyrak, u adpaviednaści ź jakim dziaržava Niderłandy častkova niasie adkaznaść za zabojstva kala 350 baśnijskich musulman padčas raźni ŭ Srebranicy ŭ 1995 hodzie. Atrad hałandskich miratvorcaŭ pieradaŭ mužčyn apałčeńniu baśnijskich sierbaŭ, jakija i zabili musulman, piša VVS.
Baśnijskija musulmanie ź bližejšych pasieliščaŭ ściahvalisia ŭ Srebranicu ŭ pošuku prytułku paśla taho, jak baśnijskija sierby pačali kampaniju pa etničnaj čystcy. Kala 20 tysiač uciekačoŭ prybyli ŭ Srebranicu pad abaronaj niderłandskaha kantynhientu miratvorcaŭ AAN.
U lipieni 1995 hoda vojska baśnijskich sierbaŭ uvarvałasia na terytoryju Srebranicy.
U chodzie ŭvarvańnia sierby zabili kala 8 tysiač mužčyn i chłopčykaŭ z musulmanskich siemjaŭ. Raźnia ŭ Srebranicy stała najbujniejšym masavym zabojstvam u Jeŭropie z časoŭ Druhoj suśvietnaj vajny.
350 mužčyn i junakoŭ byli siarod prykładna 5000 musulmanskich biežancaŭ, jakija znachodzilisia pad achovaj kantynhientu na bazie AAN u vajskovaj čaści Patačary. Asnoŭnuju častku biežancaŭ składali žančyny i dzieci. Sierby zapatrabavali vydać im junakoŭ i mužčyn, zajaviŭšy, što chočuć ich dapytać, ale na samoj spravie zabili.
Kantynhient miratvorcaŭ składaŭ 600 čałaviek, uzbrojenych strałkovaj zbrojaj. Vojski «Respubliki Sierbskaj», jakija akružyli Srebranicu, u svaim rasparadžeńni mieli artyleryju.
Jak pastanaviŭ sud, kantynhient AAN, jaki pradstaŭlaŭ dziaržavu Niderłandy, viedaŭ, što musulmanam, jakich pieradajuć sierbam, pahražała niebiaśpieka. Niahledziačy na heta, vajennyja vyrašyli vypravadzić ich za miežy biaśpiečnaj zony z metaj praduchilić chaos unutry vajskovaj čaści ŭ Patačary. Vydaŭšy mužčyn, jany praciahnuli evakuacyju biežancaŭ, jakija zastalisia, u horad Tuzła.
Sud u Hałandyi ŭ 2014 hodzie ŭžo pastanaviŭ, što Niderłandy niasuć adkaznaść za zabojstva apałčencami Ratka Mładziča bolš za 300 baśnijskich musulman u Srebranicy.
Apielacyja na prysud była padadzienaja arhanizacyjaj «Maci Srebranicy». Aktyvisty hetaj arhanizacyi byli rasčaravanyja rašeńniem suda, u jakim havaryłasia ab tym, što da śmierci astatnich tysiač zahinułych u chodzie raźni ŭ Srebranicy Hałandyja dačynieńnia nie maje.
Adkaznaść za masavyja zabojstvy ŭ Srebranicy pryznali ŭłady Bośnii i Hiercahaviny. Akramia taho, asudziŭ raźniu parłamient Sierbii.
