Virus adklučyŭ kampjutary ŭ Kabiniecie ministraŭ krainy i pazbaviŭ pasažyraŭ kijeŭskaha mietro mahčymaści raspłačvacca za prajezd bankaŭskimi kartami. Uźnikła pahroza zatrymki z vykanańniem rejsaŭ z aeraporta «Baryspal»
Virus-vymahalnik pryvioŭ da ŭźniknieńnia prablem u pracy cełaha šerahu pradpryjemstvaŭ i ŭstanoŭ Ukrainy. U pryvatnaści, telekanał 112.ua paviedamiŭ ab vychadzie z ładu ŭ vyniku paražeńnia virusam kampjutaraŭ u centralnych ofisach kampanij «Ukrenierha» i DPEK. Sajty abiedźviuch kampanij u ciapierašni čas niedastupnyja.
Ab paškodžańni kampjutarnaj sietki ŭ kabiniecie ministraŭ Ukrainy paviedamiŭ na svajoj staroncy ŭ sietcy Facebook vice-premjer Pavieł Razienka. Pavodle jaho słoŭ, na hety momant nie pracujuć usie kampjutary ŭrada.
Pieršy namieśnik hiendyrektara aeraporta «Baryspal» Jaŭhien Dzichnie paviedamiŭ ab kibieratacy, jakaja vyvieła sa stroju aficyjny sajt aeraporta i tabło z raskładam rejsaŭ.
«U suviazi z pazaštatnaj situacyjaj mahčymy zatrymki rejsaŭ. My vielmi prosim vas pastavicca z razumieńniem, zachoŭvać spakoj», - papiaredžvaje Dzichnie.
Na staroncy Facebook Kijeŭskaha mietrapalitena źjaviłasia paviedamleńnie ab niemahčymaści apłaty prajezdu z dapamohaj bankaŭskich kart.
Raniej u aŭtorak Nacyjanalny bank Ukrainy (NBU) paviedamiŭ ab tym, što adrazu niekalki ŭkrainskich kamiercyjnych bankaŭ i inšych pradpryjemstvaŭ padvierhlisia «źniešniamu chakierskamu napadu nieviadomym virusam».
«U vyniku takich kibieratakaŭ hetyja banki adčuvajuć ciažkaści z absłuhoŭvańniem klijentaŭ i vykanańniem bankaŭskich apieracyj», - adznačajecca ŭ paviedamleńni NBU.
