Haradski adździeł Śledčaha kamiteta rasśledavaŭ kryminalnuju spravu, raspačatuju prakuraturaj Viciebska ab ździekach ź biełaruskaha dziaržaŭnaha ściaha. U hetym abvinavačvajuć 44-hadovaha žychara abłasnoha centra. Padrabiaznaści spravy TUT.BY paviedamiła aficyjny pradstaŭnik USK pa rehijonie Śviatłana Sacharava.
Reuters
Uviečary 2 maja mužčyna byŭ pjany, ale vyrašyŭ jašče kupić śpirtnoha. Zajšoŭ u adnu z charčovych kram na praśpiekcie Čarniachoŭskaha. Kampaniju jamu skłała znajomaja. Jak paźniej vyśvietlać śledčyja, napiaredadni pamiž imi adbyŭsia kanflikt.
Vyjšaŭšy z kramy, pakupnik zaŭvažyŭ ściah, jaki vyviesili la hałoŭnaha ŭvachodu ŭ honar majskich śviataŭ. Mužčyna paciahnuŭ za ściah i parvaŭ jaho, zatym vyrvaŭ dreŭka z macavańnia. Paśla hetaha kinuŭ dziaržaŭny simvał sabie pad nohi. Zajšoŭ za kut budynka, ale nieŭzabavie viarnuŭsia, zabraŭ ściah i ŭciok.
Pravaachoŭniki znajšli ŭciekača. Kala kramy padabrali dreŭka, a ŭ kvatery znajomaj mužčyny znajšli pałotnišča ściaha.
Žychara Viciebska abvinavačvajuć pa art. 370 KK (Ździek ź dziaržaŭnych simvałaŭ). Hetaje złačynstva karajecca hramadskimi pracami, abo štrafam, abo papraŭčymi rabotami na termin da 2 hadoŭ, abo aryštam na termin da 3 miesiacaŭ, abo abmiežavańniem voli na termin da hoda.
Abvinavačvany znachodzicca pad padpiskaj ab niavyjeździe i naležnych pavodzinach. Ad dačy pakazańniaŭ mužčyna admoviŭsia. Materyjały spravy pieradali ŭ prakuraturu dla nakiravańnia ŭ sud.
U 2016 hodzie spravy hetaj katehoryi ŭ krainie nie raspačynali, u 2017-m — heta pieršy taki vypadak.
