U Biełarusi da 2019 hoda mohuć pastupova pavysić limity na pasyłki z-za miažy da 200 jeŭra ŭ miesiac. Pra heta 8 červienia na kruhłym stale pa pytańniach elektronnaha handlu paviedamiła namieśnik ministra antymanapolnaha rehulavańnia i handlu Iryna Narkievič, piša Tut.by.
Pa słovach Iryny Narkievič, z momantu ŭviadzieńnia limitaŭ na pasyłki Biełpošta straciła dosyć bujnuju sumu hrošaj.
«My viedali, što adbudziecca pieraraźmierkavańnie patokaŭ tavaraŭ na terytoryju Rasii — paštovyja adździaleńni Branskaj i Smalenskaj abłaściej ciapier aktyŭna pracujuć na Biełaruś, — raskazała namieśnik ministra. — Tamu pošta ciapier aktyŭna inicyjuje viartańnie raniejšych sum limitaŭ».
Viartańnie da limitu ŭ 200 jeŭra ŭ miesiac «Biełpošta» prapanuje pravodzić pastupova da 2019 hoda. Jak adznačaje Iryna Narkievič, imhniennaje viartańnie da raniejšych sum niemahčyma. Kankretnyja daty pavyšeńnia limitaŭ namieśnik ministra taksama nie nazyvaje:
«Ciapier idzie abmierkavańnie hetaha pytańnia sumiesna ź Dziaržaŭnym mytnym kamitetam. Jany prapanavali taki varyjant: kab ahulnaja suma pasyłak u miesiac nie pieravyšała 200 jeŭra, a košt adnoj zastaŭsia na ŭzroŭni 22 jeŭra. Heta značyć čałaviek zmoža biaspošlinna zakazvać bolš rečaŭ».
Nahadajem, limity na pasyłki z-za miažy i ŭvoz tavaraŭ z-za miažy byli ŭviedzienyja 14 krasavika 2016 hoda. Pryčynaj uzmacnieńnia žorstkaści limitaŭ biaspošlinnaha ŭvozu tavaraŭ źjaviłasia značnaje pavieličeńnie abjomaŭ uvozu tavaraŭ u kamiercyjnych maštabach u adras fizičnych asob biez vypłaty mytnych płaciažoŭ. Za minuły hod biełarusy atrymali 12,7 miljona mižnarodnych paštovych adpraŭleńniaŭ, i tolki 1% ź ich, pavodle danych DMK, pieravyšaŭ limit 22 jeŭra. Za pieravyšeńnie limitaŭ biełarusy letaś zapłacili 2,4 miljona rubloŭ.
