Siarhiej Pomazaŭ i milicyjant, jaki pryjšoŭ da jaho ŭ dom
Telefanavańnie Jeŭraradyjo zastaje Siarhieja Pomazava za noŭtbukam. «Čytaju kamientaryi», - pryznajecca 47-hadovy budaŭnik, jaki 5 červienia staŭ zorkaj interneta. A pačałosia ŭsio pozna ŭviečary 3 červienia, kali na parozie doma Siarhieja ŭ vioscy Pychań pad Homielem raptam źjavilisia dvoje milicyjantaŭ. Maŭlaŭ, dźviery byli pračynienyja, i jany vyrašyli pravieryć, ci ŭsio ŭ paradku.
«Mnie 47 hadoŭ. Mnie soramna bajacca»
Adzin z tych, chto praviaraŭ - padpałkoŭnik Alaksandr Košman, v.a. načalnika milicyi horada Vietka. U paviedamleńni, jakoje paźniej apublikuje sajt UUS Homielskaha abłvykankama, havorycca, što ŭ Pychani šukali dačnaha złodzieja, a Košman «braŭ asabisty ŭdzieł u arhanizacyi raboty načnych pošukavych hrup». Ale na videa milicyjant hetaha nie tłumačyć, a prosta 10 chvilin patrabuje ad Siarhieja Pomazava pakazać dakumienty. A Siarhiej aburajecca tym, što milicyja biez pryčyny zajšła da jaho ŭ dom, i dakazvaje, što nie pavinien nikomu ničoha pakazvać.
U vyniku milicyjanty sychodziać ni z čym, abiacajučy viarnucca. Pytajusia, ci nie baicca Siarhiej za svaju budučyniu. «Mnie 47 hadoŭ. Mnie soramna bajacca. Ja vykazvaju svoj punkt hledžańnia. Nie nastojvaju, nikomu ničoha nie naviazvaju, ni vam, ni kamuści tam, - adkazvaje Pomazaŭ. - Amal čverć stahodździa tamu ja kazaŭ: «Ludzi, apamiatajciesia, kaho vy vybirajecie! Heta adhukniecca!» I 15, i 10 hadoŭ tamu kazaŭ toje, što siońnia na mitynhach kažuć. Ja nivodnaha mitynhu, nivodnaha suda nie prapuściŭ!»
«Kali maje pravy parušajucca, tryvać nie budu»
U kamientaryjach da «Načnoha dazoru» (tak nazyvajecca videa, jakoje Siarhiej Pomazaŭ apublikavaŭ na Youtube) ludzi sumniavajucca ŭ jaho adekvatnaści. I, razam z tym, dziviacca tamu, nakolki jon «padkavany» ŭ płanie svaich pravoŭ. «Ja nie pju - usia vioska viedaje, - raspaviadaje mužčyna. - Razumiejecie, mianie ž tady tolki razbudzili [na videa trapiła mikrachvaloŭka, hadzinńnik na jakoj pakazvaje 23:41]. Ja z prasońnia… A tak, ja pryncypovy čałaviek . Kali maje pravy parušajucca, tryvać nie budu. I ŭsim raju chadzić z noŭtbukam i kodeksam pad pachaj».
Da razmovy ź milicyjaj Siarhieja Pomazava padrychtavaŭ siabar-juryst. Navošta heta spatrebiłasia? Bolš za hod Pomazaŭ sprabuje pryciahnuć da adkazu supracoŭnikaŭ «Strały», kanflikt ź jakimi zdaryŭsia ŭ krasaviku 2016 hoda i taksama trapiŭ na videa. Pavodle jaho słoŭ, mašyna śpiecpadraździaleńnia DAI biez padstaŭ zajechała da jaho ŭ dvor. Ludzi ŭ formie zapatrabavali pradjavić dakumienty, a kali Pomazaŭ vyklikaŭ milicyju, retyravalisia, nie składajučy pratakołaŭ.
Alaksandr Košman ŭ domie Siarhieja Pomazava
Skarhi ŭ milicyju i DAI ni da čaho nie pryviali. Chiba što, pa źviestkach Pomazava, byŭ zvolnieny supracoŭnik Vietkaŭskaha RAUS, jaki sa spaźnieńniem adkazvaŭ na jaho zapyty. «Tarmaziŭ» z papierami i sam Siarhiej: uvieś minuły hod jon pravioŭ u Rasii — «budavaŭ stadyjony da čempijanatu śvietu pa futbole» — i času na jurydyčnyja farmalnaści amal nie było. Narešcie, nieprymirymy baraćbit za svaje pravy źviarnuŭsia ŭ prakuraturu — jon usio ž spadziajecca sustrecca sa svaimi kryŭdzicielami ŭ sudzie.
«Skažycie vašym mužam, što na poŭdzień vy ŭ hetym hodzie nie pajedziecie»
Vioska Pychań, u jakoj žyvie Siarhiej Pomazaŭ, u kursie ŭsioj situacyi. Ludzi padtrymlivajuć jaho.
«My heta ŭsio čuli, bačyli na Youtube,- raspaviadajuć Jeŭraradyjo ŭ miascovaj škole. - Viedajecie, heta biezzakońnie. I hety ŭ milicyi časta takoje - pryjechali i prosta zajšli. Jak heta - prosta zajšli? Tut ža šmat damoŭ. Čamu ŭ inšy dom nie zachodzicie? Čamu mienavita da jaho?».
Siarhiej, u svaju čarhu, sprabuje być karysnym dla ludziej. Pavodle jaho słoŭ, adna ź viečnych tem dla razmovy ź miascovymi čynoŭnikami - ramont daroh u Pychani: «Idu i ŭ kamitet, i ŭ DRBU. Kažu im: «Skažycie vašym mužam, što na poŭdzień vy ŭ hetym hodzie nie pajedziecie, i novy aŭtamabil nie kupicie, tamu što darohu treba budavać». Čamu čverć stahodździa ramantujecca daroha? Pryjeduć, łatku pakładuć - i narad zakryvajuć. Zrabili pracy na rubiel, a narad začynili na miljon».
Ci źviazana ŭsio heta z načnym vizitam milicyjantaŭ? Siarhiej Pomazaŭ nie biarecca rabić vysnovy. 5 červienia jon razmaŭlaŭ z padpałkoŭnikam Košmanam - razmova była, jak byccam ničoha i nie adbyłosia. «U milicyi jość roznyja ludzi. Jość złyja, a jość vielmi šmat narmalnych. Ale maja dumka - narmalnych adtul vyžyvajuć», - kaža Pomazaŭ.
