U miedyja Novaj Ziełandyi pačali ŭsurjoz abmiarkoŭvać pahrozy ad małaka, jakoje pryhatavana z dapamohaj 3D-pryntaraŭ. Fiermiery adčuvajuć pahrozu taho, što takoje małako zmoža zabić tradycyjnuju žyviołahadoŭlu, a čynoŭniki ich supakojvajuć i kažuć, što sintetyčnaje małako nikoli nie zamienić naturalnaje. Tym nie mienš, małočnyja pradukty składajuć kala 25% ad ahulnaha ekspartu Novaj Ziełandyi, tamu naściarožanaść uładaŭ i fiermieraŭ možna zrazumieć.
U intervju novaziełandskamu vydańniu Newstalk ZB vykanaŭčy dyrektar kampanii NZTech Hrem Miuler raspavioŭ pra kalifarnijski startap Perfect Day Foods.Studenty-bijatechnołahi, jakija stvaryli hety startap, raspracavali technałohiju vytvorčaści małaka, dla jakoha naohuł nie patrebnyja karovy.
Jany vykarystoŭvajuć śpiecyjalnyja białki, jakija drukujucca na 3D-pryntary. Taksama ŭ technałohii vykarystoŭvajucca droždžy i rečyva z karovinaj DNK, jakoje dazvalaje sintezavać kaziein. Potym hetaje białkovaje rečyva źmiešvajecca z kukuruznym cukram i inšymi inhredyjentami, dalej jaho pakidajuć bradzić da atrymańnia małaka.
Cikava toje, što pieršyja asoby dziaržavy i kiraŭniki fiermierskich haspadarak usurjoz pačali abmiarkoŭvać pahrozu vyciaśnieńnia zvyčajnaha małaka sintetyčnym.
Staršynia Fiermierskaj asacyjacyi Novaj Ziełandyi Endru Chuhard paćvierdziŭ, što 3D-małako zmoža kankuryravać z sapraŭdnym. Ale heta tolki natchnić fiermieraŭ na pieraasensavańnie svajoj haspadarki, jakaja pavinna stać ekałahična bolš čystaj i pryjaznaj da žyvioł.
Sprava ŭ tym, što hałoŭnym arhumientam na karyść admovy ad naturalnaha małaka źjaŭlajecca kłopat pra žyvioł i navakolnaje asiarodździe.
