Prajekt prezidenckaha ŭkaza «Ab rehulavańni dziejnaści fizičnych asob» prapanuje dazvolić prahramistam vykonvać zamovy biez rehistracyi ŭ jakaści indyvidualnaha pradprymalnika, piša Dev.by.
Zhodna z prajektam ukaza, novaŭviadzieńnie zakranie nie ŭsich biełaruskich prahramistaŭ-ipešnikaŭ, a tolki tych, chto pradastaŭlaje pasłuhi dla fizičnych asob. Akramia taho, pasłuhi, jakija akazvajucca «u chatnich umovach albo z vyjezdam da spažyŭca», nie pavinny być źviazanyja z pradprymalnickaj dziejnaściu.
U pryvatnaści, havorka idzie ab:
- kampjutarnym prahramavańni,
- kansultacyjnych i inšyja spadarožnych pasłuhach,
- dziejnaści ŭ halinie infarmacyjnaha absłuhoŭvańnia,
- ramoncie, techabsłuhoŭvańni ofisnych mašyn, kampjutaraŭ i pieryfieryjnaha abstalavańnia,
- navučańni pracy na PK.
U jurydyčnaj kampanii Revera dev.by rastłumačyli, što efiekt ad novaŭviadzieńnia zaklučajecca ŭ nastupnym.
Pa-pieršaje, heta aznačaje dobraachvotny paradak vypłaty ŭznosaŭ u FSAN.
Vypłata uznosaŭ u FSAN dla IP abaviazkovaja (pry ŭmovie, što jon nie pracuje pa pracoŭnaj damovie ŭ biełaruskaha najmalnika). Pry ažyćciaŭleńni dziejnaści ŭ jakaści fizičnaj asoby źjaŭlajecca vybar: vypłačvać uznosy ci nie i ŭ jakim pamiery (uznosy na piensijnaje i sacyjalnaje strachavańnie, strachavyja ŭznosy na piensijnaje strachavańnie, strachavyja ŭznosy na sacyjalnaje strachavańnie). U 2016 hodzie minimalny pamier adličeńniaŭ u FSAN dla IP skłaŭ 989,07 rubla.
Pa-druhoje, pazbaŭlaje ad nieabchodnaści vieści ŭlik i składać spravazdačnaść.
«Dla mnohich nieabchodnaść viadzieńnia ŭliku — faktar, jaki źjaŭlajecca pieraškodaj dla pačatku dziejnaści. Nabyćcio knih uliku i ich viadzieńnie, składańnie padatkovych dekłaracyj zdajecca niečym składanym i patrabuje pryciahnieńnia inšaha buchhałtara, — rastłumačyli ŭ Revera. — U hetym sensie dziejnaść u jakaści fizasoby značna praściejšaja — treba paviedamić u padatkovy orhan ab pačatku dziejnaści i zapłacić sumu adzinaha padatku».
Pa-treciaje, pry akazańni pasłuh dla zamiežnych zamoŭcaŭ adpadzie abaviazacielstva pradavać zamiežnuju valutu, vykonvać terminy źniešniehandlovych apieracyj, prablemy ź pieršasnymi ŭlikovymi dakumientami.
Prajekt ukaza «Ab rehulavańni dziejnaści fizičnych asob» znachodzicca ciapier na stadyi dapracoŭki i abmierkavańnia. Pracavać ža novaje praviła pačnie praz 3 miesiacy z momantu aficyjnaha apublikavańnia dakumienta.
