Niekatoryja minčuki zaŭvažyli, što kala kramy «Akijan» niedaloka ad płoščy Pieramohi bolš niama zvykłaha paviljona «Chutka-Smačna». Jak akazałasia, prybrali nie tolki jaho. Tut.by daviedaŭsia, čamu niadaŭna pierastała pracavać bolšaść punktaŭ hetaj sietki.
Pa kamientar z nahody zakryćcia paviljona na vulicy Kazłova tut.by źviarnuŭsia da hiendyrektara STAA «Ekspres-servis 91» Ivana Jankoviča. Praŭda, jon ad kamientaroŭ admoviŭsia i paraiŭ patelefanavać u Minharvykankam.
Načalnik upraŭleńnia handlu i pasłuh staličnaj meryi Nina Jemialjanava kaža, što ŭ 2017 hodzie «Chutka-Smačna» zakryŭsia nie tolki kala «Akijana». Tak, bolš nie pracuje paviljon kala skryžavańnia praśpiekta z vulicaj Broŭki, a taksama la stancyj mietro «Instytut kultury» i «Akademija navuk».
Tak vyhladaŭ paviljon na Kazłova. Fota z Instagram karystalnika afedorenchik
Jemialjanava kaža, što abjektyŭna hetyja kijoski sastareli, a ŭ suviazi z raźvićciom hramadskaha charčavańnia i kultury charčavańnia mahła źnizicca i patreba ŭ ich. Ale zakrylisia abjekty pa inšaj pryčynie.
«U ich 31 śniežnia 2016 hoda skončylisia terminy dziejańnia dahavoraŭ arendy [ziamielnych učastkaŭ]», — tłumačyć načalnik kiravańnia handlu i pasłuh.
Takim čynam, u Minsku zastalisia tolki dva «Chutka-Smačna»: na Niamizie i vulicy Jakuba Kołasa.
«Zastalisia abjekty sučasnaha farmatu z asobnym uvachodam, u jakich čałaviek moža pierakusić unutry», — kaža Jemialjanava.
Sučasny paviljon na Niamizie. Fota: Dźmitryj Bruško, TUT.BY
Sietka «Chutka-Smačna» pracuje jašče z 90-ch hadoŭ, i doŭhi čas jana nie mieła vidavočnych kankurentaŭ. Adnak u kancy 2014 hoda da «Chutka-Smačna» paŭstali pretenzii ŭ pravaachoŭnikaŭ, jakija vyjavili ŭ niekatorych kijoskach niezakonny prodaž śpirtnoha nočču. Paśla hetaha kiraŭnik Minska Andrej Šorac daručyŭ skarektavać režym pracy kijoskaŭ i čas prodažu śpirtnoha tam. U pačatku 2015-ha MARH prypyniała pracu siami «Chutka-Smačna» taksama ŭ suviazi z šeraham parušeńniaŭ. Na toj pieryjad u sietcy jašče naličvałasia 13 mini-kafe.