Miečysłaŭ Jaśkievič. Pobač ź im — Anžalika Borys. Fota sa źjezdu Sajuza palakaŭ 11 śniežnia 2016 hoda, na jakim Jaśkievič prajhraŭ vybary, a Borys stała novaj staršynioj arhanizacyi.
Ustanoŭčy schod novaj polskaj arhanizacyi prajšoŭ u Hrodnie 19 lutaha. Były staršynia Sajuza palakaŭ Miečysłaŭ Jaśkievič, jaki admoviŭsia padparadkoŭvacca novym uładam sajuza, razam z 69 paplečnikami stvaryŭ novuju arhanizacyju. Jon pierakanany, što jaje ŭdasca aficyjna zarehistravać, pieradaje paviedamleńnie ahienctva PAP biełastockaja Gazeta Wyborcza.
Stvaryć novuju arhanizacyju schilili «biezpadstaŭnyja abvinavačańni»
Supolnaść palakaŭ Biełarusi stvarajuć Miečysłaŭ Jaśkievič i Alena Duboŭskaja (byłaja dyrektarka polskaj škoły pry SPB), jakim 12 lutaha prypynili členstva ŭ kiraŭničych orhanach Sajuza palakaŭ. Ich abvinavačvajuć u machlarstvie: miž inšym, Jaśkievič fiktyŭna ŭładkavaŭ na pracu svaju dačku, što stała žyvie za miažoj. U vyniku kanfliktu jon naohuł admoviŭsia pieradavać novamu kiraŭnictvu Sajuza, abranamu ŭ śniežni 2016, firmu «Kresovija», jakaja źjaŭlajecca finansavaj i lehalnaj bazaj dziejnaści dla niepryznanaj biełaruskimi ŭładami arhanizacyi.
Jaśkievič i Duboŭskaja kažuć, što da rašeńnia stvaryć novuju arhanizacyju ich schiliła «adsutnaść zhody na bačańnie dziejnaści SPB paśla śniežańskich vybaraŭ novych uład, ich staŭleńnie da ludziej, biespadstaŭnyja abvinavačańni ŭ bok zasłužanych dziejačoŭ, adsutnaść pašany da aŭtarytetaŭ polskaha žyćcia ŭ Biełarusi, uciahvańnie Sajuza ŭ palityčnuju dziejnaść i ŭnutranyja sprečki».
Nahadajem, u śniežni 2016 Miečysłaŭ Jaśkievič prajhraŭ vybary staršyni Sajuza palakaŭ. Kiraŭničkaj arhanizacyi znoŭ stała Anžalika Borys. Adnak za Jaśkieviča hałasavała niamała delehataŭ źjezdu.
«Čas pakaža, čyjo bačańnie lepšaje»
Novaja arhanizacyja budzie namahacca atrymać aficyjnuju rehistracyju ŭ Biełarusi. Pačatkova jana budzie abjadnoŭvać pieravažna dziejačoŭ z Hrodzienščyny, ale, pa słovach Duboŭskaj, jość cikavaść i z boku pradstaŭnikoŭ inšych rehijonaŭ.
Stvaralniki novaj supołki palakaŭ u Biełarusi kažuć, što jany chočuć «viarnucca da asnoŭnych kaštoŭnaściaŭ i metaŭ polskaj arhanizacyi, takich jak adukacyja, vyvučeńnie polskaj movy, kłopat pra polskija miescy nacyjanalnaj pamiaci i papularyzacyja polskaj historyi ŭ Biełarusi, padtrymka polskaj tradycyi, zvyčajaŭ i kultury, intehracyja palakaŭ praz usie vidy dziejnaści i padtrymańnie suviazi z praradzimaj».
Zasnavalniki novaj struktury padkreślivajuć svaju prychilnaść da demakratyčnych i chryścijanskich kaštoŭnaściej i zajaŭlajuć ab svajoj hatoŭnaści supracoŭničać ź ludźmi i supolnaściami, jakija padzialajuć ich bačańnie i kaštoŭnaści. «My nie majem namieru prynižać kaho-niebudź, kidać iłžyvyja abvinavačvańni. Čas i praktyka pakaža, čyjo bačańnie lepš za ŭsio dla palakaŭ u Biełarusi», — zajavili jany.
Jaśkievič i Duboŭskaja kažuć, što novaje kiraŭnictva Sajuza palakaŭ «nie sprabavała ź imi vieści dyjałoh». Pa słovach Duboŭskaj, arhanizacyja pad kiraŭnictvam Borys nie zajmajecca kankretnaj dziejnaściu, a tonie va ŭnutranych zmahańniach i palityčnych manifiestacyjach».
Heta nie pieršy raskoł u polskaj arhanizacyi ŭ Biełarusi. Z 2005 hoda isnujuć dva sajuzy palakaŭ: adzin pryznajecca polskimi ŭładami, ale źjaŭlajecca nielehalnym u Biełarusi, druhi maje padtrymku biełaruskich uładaŭ, ale ŭ Polšy jaho ličać padkantrolnym KDB.
