Na «Jeŭrabačańni» Biełaruś reprezientuje małady hurt Navi ź pieśniaj «Historyja majho žyćcia». «NN» sabrała cikavyja fakty pra kalektyŭ.
Jon z Hłybokaha, jana — ź Minska
Hurt Navi — heta Arciom Łukjanienka i Ksienija Žuk. Jamu 24 hady, joj 25. «Jana — kula, jon — spakojny, razvažlivy», — tak raskazvaje mama Ksienii Natalla Žuk.
Arciom naradziŭsia ŭ horadzie Hłybokaje, skončyŭ biełaruskamoŭnuju himnaziju №3, tam jaho mama vykładała bijałohiju. Potym Arciom vučyŭsia ŭ BDU na žurnalistycy, pracavaŭ na radyjo «Stalica».
Ksienija naradziłasia ŭ stalicy, jaje baćki vučylisia ŭ Piedahahičnym univiersitecie, udzielničali ŭ teatralnaj trupie. Ksienija vykładaje vakał dla dziaciej u škole.
I Ksieniju, i Arcioma addavali ŭ škole ŭ kłas fartepijana, tolki Arciom psichanuŭ i syšoŭ. Novaje zachapleńnie muzykaj pačałosia ŭžo ŭ 12 hadoŭ, z sprobaŭ navučycca hrać na hitary. A voś Ksienija hitaru nie asvoiła, choć i prosić Arcioma navučyć jaje.
Znajomstva na Dzień śviatoha Valancina
Paznajomilisia Arciom i Ksienija davoli vypadkova, heta adbyłosia 14 lutaha 2013 hoda. Ksienija pryjechała na riepietycyjny punkt, dzie akurat ihraŭ Arciom. Chłopiec kaža, što jamu adrazu pryjšłasia daspadoby Ksienina niepasrednaść, jana paprasiła pamacać kudzierki Arcioma, pierakanacca, što jany sapraŭdnyja. «Ja skazaŭ «vitaju, moža, praśpiavajem razam», — kaža Arciom.
Na toj čas i ŭ Arcioma, i ŭ Ksienii byli inšyja prajekty. Adnak Ksienija kaža, što ŭ hurcie Sonika nie adčuvała siabie, vykonvała toje, što jaje prasili. Praź niejki čas Łukjanienka napisaŭ tekst «Abdymi mianie» i prapanavaŭ Ksienii praśpiavać jaho razam. Heta byŭ pieršy chit novaha hurtu. Cikava, što ŭ Rasii nazvu pieśni pierakładali prykładna jak «Abkury mianie».
Darečy, nazva Navi ničoha nie značyć. Možna skazać, što hetki nabor litar. Chacia pa-anhlijsku suhučnaje «navy» aznačaje «fłot». A paźniej Arciom z Ksienijaj daviedalisia, što pa-hruzinsku navi aznačaje «łodka», dyj pa-italjansku «nave» — łodka, karabiel.
Abjeździli ŭsiu krainu z «Movaj nanova»
Arciom i Ksienija nie prosta śpiavajuć pa-biełarusku, ale jašče i aktyŭna prapahandujuć biełaruskuju movu. Hurt padtrymlivaje prajekt «Mova nanova». Pryčym nie tolki ŭ Minsku, ale i ŭ mienšych haradach, jak Maładziečna, Babrujsk, Hrodna. «Mova stanovicca trendam, i heta raduje», — dzielicca Ksienija Žuk.
«My jeździli na kancert u Maskvu i tam pałovu pieśniaŭ śpiavali pa-biełarusku. Maskvičy ŭspryniali nas absalutna adekvatna. Nie pieradać tyja pačućci, kali jany nam pisali: «Vy nas sahreli». A vystupy akurat prachodzili ŭ lutyja marazy».
Tym nie mienš, hurt časta padkreślivaje, što jon pa-za palitykaj. «My možam vystupić na «Słavianskim bazary», a paśla pajechać na «Basovišča», — raskazvaŭ Arciom.
Nie pieršaja sproba adboru
U 2016 hodzie Navi ŭžo sprabavali patrapić u finał «Jeŭrabačańnia» ź pieśniaj «Heta ziamla». Ale pieravaha była addadzienaja prateže Drobyša Ivan-u. Praŭda, u Šviecyi Ivan nie zmoh navat vyjści ŭ finał. «Tut, vidać, navat nie tvorčaść, a hrošy, reputacyja i tak dalej, ale padtrymka była niejmaviernaj», — na emocyjach kazaŭ Arciom Łukjanienka.
Navi ŭ toj hod sapraŭdy padtrymlivali vielmi mnohija, navat redaktar «Sovietskoj Biełoruśsii» Pavieł Jakubovič. «Vynikam adboru ja nie rady, bo asabista ja pieražyvaŭ, zaŭzieŭ za Navi. Mnie zdajecca, što heta vielmi miłaja hrupa. Ja adpraviŭ dźvie sms-ki — ad siabie i žonki», — kazaŭ jon.
Sumiesnyja prajekty z Hryškaŭcom, pierapiska z Džylijan Andersan
Chaj Navi i śpiavajuć pa-biełarusku, ale ŭ Rasii ich taksama niabłaha viedajuć. Naprykład, Navi vystupali na jubilejnym viečary Dzijany Arbieninaj (taksama vychadcy ź Biełarusi) u Maskvie. Vystupali razam u Mahilovie. Vystupali na razahrevie ŭ Siarhieja Babkina.
U Homieli ŭ adnym nievialikim bary ich vystup vypadkova pabačyŭ viadomy rasijski dramaturh Jaŭhien Hryškaviec. «Jany śpiavali pa-biełarusku i pa-rusku. Heta było nastolki niejmavierna, što ja zabyŭsia, što znachodžusia ŭ pabie, było ŭražańnie vialikaha kancerta». Paśla hetaha hurt razam z Hryškaŭcom zapisaŭ pieśniu «Kałychanka». U płanach jość zapisać sumiesny trek i na biełaruskaj movie.
U 14 hadoŭ Ksienija Žuk paznajomiłasia sa słavutaj amierykanskaj aktrysaj Džylijan Andersan (ahient Skali z «Sakretnych materyjałaŭ»). Adbyłosia heta na fiestyvali Giffoni Film u Italii. Ksienija raskazała, što śpiavaje. Praz dva miesiacy ź joj źviazvalisia ahienty Andersan z prośbaj pierasłać materyjał. Dziaŭčyna paśla hetaha jašče pierapisvałasia z Andersan, razmaŭlała pa telefonie.
Ksienija Žuk kaža, što materyjał byŭ jašče syry, tamu ničoha nie vyjšła. Ciapier jana i Arciom Łukjanienka bolš upeŭnienyja ŭ sabie i svajoj tvorčaści.
