U Redakcyju pryjšoŭ adkaz z Kamiteta dziaržaŭnaha kantrolu što da situacyi ŭ Kaściukovickim rajonie, pra jakuju raniej pisała «Naša Niva».
Čytajcie «Bo ja jamu ni chrana i jon mnie ni chrana»: fieadalizm u asobna ŭziatym Kaściukovickim rajonie.
U adkazie havorycca, što «razhladajecca pytańnie ab pryciahnieńni vinavatych da administracyjnaj adkaznaści, pravaachoŭnymi orhanami dajecca pravavaja acenka dziejańniam pasadavych asob».
Farmuloŭki dosyć raspłyvistyja, ale ich «Našaj Nivie» patłumačyła krynica, blizkaja da rasśledavańnia Dziaržkantrola.
«Pa sutnaści, vyniki našaj pravierki takija — znojdzieny parušeńni ŭ naličeńniach premij, inšyja niuansy. U niekatorych — nie ŭsich — haspadarkach rajona sapraŭdy byŭ surjozny bardak, i my vymušanyja byli źviarnuć uvahu inšych słužbaŭ i abłvykankama na ich dziejnaść. Što datyčyć tych nieabhruntavanych — nie va ŭsich vypadkach, znoŭ ža — premij, to staršyniam SVK daviadziecca viartać hetyja hrošy nazad [u niekatoryja miesiacy zarobki kiraŭnikoŭ dachodzili da 6000 rubloŭ novymi prytym što na niekatorych fiermach nie było čym karmić karoŭ — NN]. Ciapier pravaachoŭnyja orhany — a heta zvyčajna MUS i prakuratura — buduć vyznačać vinavatych u niapravilnym naličeńni premij, jany za heta adkažuć. Što datyčyć Małašanki, to pra jaho b bahata kazać nie chaciełasia — tut usio składana. My pryjšli da vysnovy, što tut u bolšaj miery byŭ svajacki kanflikt z Čarkasavym, nu i vy jašče heta trochi tak padali… Nu i styl jahonaha kiravańnia nie zaŭsiody byŭ demakratyčnym, chapała niezadavolenych. Ale da adkaznaści jon pryciahvacca nie budzie», — patłumačyła adkaz našaja krynica.
Staršynia Kaściukovickaha rajvykankama Dźmitryj Małašanka pravaruč. Ilustracyjnaje fota.
Taksama nam patłumačyli, što štrafy atrymajuć mnostva fizičnych i jurydyčnych asobaŭ — u pryvatnaści, dva SVK, adzin ź jakich «Dziemidavicki» — fihuravaŭ u rasśledavańni «Našaj Nivy» — jon budzie aštrafavany na sumu kala 5 tysiač biełaruskich rubloŭ.
«Paradku tut dadałosia, kaniečnie, chočacca vieryć, što ŭ susiednich rajonach taksama vyniesuć uroki», — padsumavała krynica.
