17 kastryčnika praciahniecca sudovaje pasiadžeńnie pa spravie zasnavalnika i redaktara błohu 1863x Eduarda Palčysa, viadomaha pad pseŭdanimam Džon Silver (Jhon Silver). Baćki Eduarda pakazali Svabodzie dyplomy svajho syna.
Čałaviek, jakoha abvinavačvajuć u raspalvańni mižnacyjanalnaj varožaści i raspaŭsiudzie parnahrafii, maje padziaki ad Ministerstva adukacyi i premiju specyjalnaha fondu prezydenta Biełarusi.
Dyplom druhoj stupieni ad Ministerstva adukacyi i hrašovuju premiju sa specfondu prezydenta Eduard Palčys atrymaŭ na respublikanskaj alimpijadzie pa historyi.
U 2008 hodzie 11-klaśnik Palčys zaniaŭ druhoje miesca na respublikanskim spabornictvie. U toj ža hod jon pastupiŭ na histfak BDU.
Historyjaj Palčys cikaviŭsia jašče padletkam. Baćki mieli vialikuju biblijateku, ź jakoj jon upadabaŭ histaryčnyja i pryhodnickija ramany.
«Jon pračytaŭ «Don Kichota» Servantesa jašče ŭ 12 hod», — kaža Alaksandar Palčys, baćka Eduarda.
Maci Antanina Palčys, uzhadvaje, jak Eduard štoraz prasiŭsia schadzić u histaryčny muzej, kali jany pryjaždžali da svajakoŭ u Harodniu.
«Amal kožnaja pajezdka prachodziła praz muzej, — kaža Antanina Alaksandraŭna. — Vielmi lubiŭ ekspanaty hladzieć. Ja mahła ŭžo čakać jaho na vulicy, a jon niekalki razoŭ abychodziŭ uvieś muzej».
Tak jon zachapiŭsia historyjaj Biełarusi. U 2006 hodzie Eduard Palčys traplaje na staronki hazety «Naša Słova». Jon dvojčy ŭdzielničaŭ u rasčystcy siadziby Ihnata Damiejki ŭ vioscy Zapolle Lidzkaha rajona, pra što pisała hazeta TBM.
Pra miascovuju historyju jamu šmat raspaviadaŭ baćka.
«My pryjaždžali na maju małuju baćkaŭščynu, — uzhadvaje baćka. — Tam palili vohnišča, smažyli sała. Ja jamu raspaviadaŭ pra historyju Lidy, pra lidzki zamak».
Maci kaža, što, u pryncypie, Eduard cikaviŭsia ŭsim. Doma było šmat encyklapedyj i paznavalnych knih. Adsiul jahonaja erudziravanaść. U starejšych klasach jon vystupaŭ za haradzkuju kamandu «Što? Dzie? Kali?»
«Jamu ŭsio było cikava i jon čytaŭ šmat», — kaža Antanina Alaksandraŭna.
Asablivym intaresam Palčysa była infarmatyka. U 2002 hodzie doma źjaviŭsia pieršy kamputar. I kali ŭ škole pačałasia infarmatyka, Eduard užo dobra vałodaŭ technikaj. Dachodziła da taho, što nastaŭnica mahła pakinuć jaho vieści ŭrok.
«Kali nastaŭnicy treba było syści, jana mahła zahadać: «Palčys, davaj tłumač kožnamu», — kaža maci.
Sa svaimi viedami Eduard moh by pastupić i ŭ techničny ŭniversytet. Na hetym nastojvali baćki. Ale jon chacieŭ vučycca na histfaku.
«Jaho taksama ciahnuła na žurnalistyku, ale vyrašyŭ pastupać na histfak, — kaža baćka. — Praŭda, vielmi chutka jon u im rasčaravaŭsia. Paŭpłyvała toje, što jon vučyŭsia ŭ mocnaj škole. Jon dumaŭ, što va ŭniversytecie budzie jašče vyšejšy ŭzrovień».
Paśla druhoha kursu Palčys chacieŭ kinuć universytet. Baćki adhavaryli. Ale ŭsio adno na piatym kursie jon nie zdavaŭ ispyty i dyplom nie atrymaŭ.
«Jon zaŭždy kazaŭ, što Bił Hiejts staŭ Biłam Hiejtsam biez dyplomu, — kaža baćka. — Jany naradzilisia ŭ adzin dzień — 28 kastryčnika. Kali ŭ 2013 hodzie za dva miesiacy da vypusku, jon skazaŭ, što nia choča atrymlivać dyplom, ja jamu adkazaŭ: «Nu, synok, daj Boh, kab ty staŭ Eduardam Palčysam biez dyplomu».
Akurat pra ŭniversyteckija dyplomy Eduard niadaŭna napisaŭ u liście svaim baćkam. Jon piša, što nie vystupaje suprać dyplomaŭ vyšejšaj adukacyi: «Ja suprać bieskarysnych dyplomaŭ, jakija nidzie ŭ śviecie nie kacirujucca i nikomu nie patrebnyja». Maŭlaŭ, sa svajoj adukacyjaj u inšaj krainie jon by moh pracavać ci daśledčykam ci vykładčykam historyi.
Usie listy da baćkoŭ jon piša pa-biełarusku. Baćka doma ź dziećmi razmaŭlaŭ pa-biełarusku. Ale Eduard zvyčajna adkazvaŭ pa-rasiejsku. Jašče sa škoły biełaruskaja mova jamu davałasia ź ciažkaściu.
«Kali jamu było hadoŭ 15, ja navat staŭ jaho paprakać, — kaža Alaksandar Palčys. — Pytajusia: «Ty biełarus? Dyk razmaŭlaj pa-biełarusku». Tolki ciapier, pastaleŭšy, jon pačynaje razumieć toje, što ŭpuściŭ».
Praces nad Eduardam Palčysam pačaŭsia 14 kastryčnika. Palčysu, jakoha abvinavačvajuć u ekstremiźmie i raspaŭsiudžvańni parnahrafii, pahražaje da piaci hadoŭ abmiežavańnia voli. Sud prachodzić u zakrytym režymie.
