Viadučy na niekatory čas spyniŭ svaje padarožža pa miastečkach rodnaj krainy z-za chvaroby. Ciapier z novaj prahramaj, z novymi napramkami dy cikavymi faktami Juryj Žyhamont znoŭ budzie raspaviadać pra harady i vieski.
Papularnaja pieradača Juryja Žyhamonta spyniła vychad na kanale STB z-za składanaj ekanamičnaj situacyi: u kanała nie znajšłosia srodkaŭ, kab apłačvać vychad prahramy. Za stolki hadoŭ isnavańnia pieradačy ŭ Juryja źjaviłasia mnostva prychilnikaŭ, jakija spadziavalisia jašče pačuć paznavalnyja historyi pra dzivosnuju Biełaruś. Spyniać na hetym svaju dziejnaść kamanda prahramy «Padarožža dyletanta» nie zachacieła. Tamu vandroŭki pierajšli ŭ farmat anłajn.
Ledź paśpieli vyjści pieršyja anłajn-pieradačy, pryśviečanyja, naprykład, vioscy Trakieli ŭ Hrodzienskaj vobłaści, jak akcior i televiadučy Juryj Žyhamont viasnoj hetaha hoda pieražyŭ infarkt. Rodnyja i blizkija, prychilniki Juryja padtrymlivali viadučaha i spadziavalisia na jaho vyzdaraŭleńnie.
I nieŭzabavie paśla surjoznaha lačeńnia heta adbyłosia. Kamanda «Padarožžaŭ dyletanta» narešcie abviaściła pra čarhovy start lubimaj mnohimi kałarytnaj prahramy.
«Šanoŭnyja amatary «Padarožžaŭ dyletanta»! My ŭściešanyja paviedamić vam, što subotnija vandroŭki pa cikavych biełaruskich miaścinach ź Juryjem Žyhamontam praciahvajucca! Jakub Kołas pisaŭ, što «dobra być u darozie, jakuju sam sabie vybiraješ». My svaju vybrali. Moža, naša daroha z vašaj akurat supadajuć? Kali tak, to hladzicie nas na sajcie zhygamont.by, ŭ prastorach internetu i sacyjalnych sietkach», — rychtujecca da novaha siezonu kamanda prahramy.
Pieradača «Padarožžy dyletanta» isnuje ŭžo 15 hadoŭ. Prahrama vychodziła na tełekanałach BT i STB z 2001 hoda. Było stvorana niekalki sotniaŭ vypuskaŭ pra vioski i pasiołki Biełarusi. A ŭ 2012 hodzie aŭtara i viadučaha prahramy Juryja Žyhamonta Ministerstva kultury ŭznaharodziła nahrudnym znakam «Za ŭkład u raźvićcio kultury Biełarusi».
Novyja vypuski prahramy buduć źjaŭlacca na sajcie zhygamont.by štotydzień, farmat zastaniecca raniejšym. I novyja epizody možna hladzieć na sajcie prahramy i kanale ŭ YouTube
A taksama ŭ sacyjalnych sietkach: vk.com/pdyletanta i facebook.com/pdyletanta
