Usiaho budzie ŭstalavana 76 novych šyldaŭ. Jany vyrablenyja za hrošy i ź inicyjatyvy muzeju «Zamkavy kompleks «Mir». Vulica Leninhradzkaja niekali była Zavalnaj, Maskoŭskaja — Hłuchoj, Čyrvonaarmiejskaja — Niaśviskaj, Pijanerskaja — Padołam abo Brovarami.
Jak paviedamili «Svabodzie» ŭ muzei, prajekt viartańnia histaryčnych nazvaŭ vulic pradstavili ŭ Miry ŭ červieni 2016 hodu na sielskim schodzie. Miascovaj supolnaści muzejnaja inicyjatyva spadabałasia.
«Staŭleńnie va ŭsich stanoŭčaje, — skazała «Svabodzie» Anait Arzumanian, specyjalist pa suviaziach z hramadzkaściu ŭ muzei. — Niekatoryja žychary navat prapanoŭvali zapłacić za šyldy, jakija prymacoŭvali da ichnich damoŭ. Ale my tłumačyli, što inicyjatyva — całkam našaha muzeju, i, adpaviedna, nikomu z žycharoŭ ničoha płacić nia treba».
Ideju pradublavać sučasnyja nazvy histaryčnymi supracoŭniki muzeju pazyčyli ŭ Smalensku. Tudy jany jeździli na pačatku leta na mižnarodnuju navukova-praktyčnuju kanferencyju.
Taksama ŭ lutym 2016 hodu ŭ Federalnym archivie niamieckaha horadu Koblenca Volha Papko, dyrektarka muzeju, znajšła dźvie mapy Mira XIX stahodździa. Adtul i ŭziali histaryčnyja nazvy vulic.
Hramadzka-kulturny prajekt «Histaryčnyja nazvy vulic Mira» ładzicca dziela papularyzacyja histaryčnaj spadčyny Mira. Supracoŭniki muzeju pravodziać ekskursii nia tolki na terytoryi zamkavaha kompleksu, ale i pa samim miastečku. U muzei ličać, što sa źjaŭleńniem histaryčnych nazvaŭ XIX stahodździa takija ekskursii buduć bolš cikavymi i nahladnymi.
76 šyldaŭ z histaryčnymi nazvami buduć ustalavanyja na 17 vulicach.
«Staryja šyldy z budynkaŭ nie prybirajucca, da ich prosta dadajuć novyja, bo aficyjna nazvaŭ vulic nichto nie źmianiaje, — skazała Arzumanian. — Dadajucca šyldy tolki na tyja vulicy, jakija prysutničajuć na zhadanych mapach».
Niekatoryja sučasnyja vulicy ŭ XIX stahodździ byli padzielenyja na dźvie častki z roznymi nazvami, a niekatoryja, naadvarot, byli častkami adnoj doŭhaj vulicy.
Taksama ŭ centry Mira źjaviacca tyja samyja mapy XIX stahodździa, razdrukavanyja na vialikich ščytach.