U Biełarusi adnavili vykarystańnie vakcyny «Pryjoryks» (suprać adru, paratytu i krasnuchi), paviedamiła namieśnik načalnika adździeła hihijeny, epidemijałohii i prafiłaktyki Ministerstva achovy zdaroŭja Ina Karaban.
Nahadajem, vykarystańnie hetaj vakcyny było prypyniena ŭ pačatku červienia paśla taho, jak pamierła pryščeplenaja joju ŭ Hrodnie šaścihadovaja dziaŭčynka. U Ministerstvie achovy zdaroŭja čakali, što prypynieńnie vykarystańnia vakcyny praciahniecca niekalki dzion.
Jak adznačyła Ina Karaban, Ministerstva achovy zdaroŭja adnaviła vykarystańnie vakcyny «Pryjoryks» u suviazi z tym, što «nie było vyjaŭlena adchileńniaŭ jakaści lekavaha srodku jak na momant pastaŭki na terytoryju Respubliki Biełaruś, tak i ŭ chodzie jaho vykarystańnia».
«Usie sieryi vakcyny «Pryjoryks» vytvorčaści GlaxoSmithKline Biologicals s.a. (Bielhija), jakija vykarystoŭvajucca ŭ Respublicy Biełaruś, u červieni 2016 hoda prajšli kantrol jakaści i pa vynikach vyprabavańniaŭ adpaviadajuć patrabavańniam pa pravieranych pakazčykach i raździełach», — skazała Karaban.
Jana adznačyła, što jakaść lekavaha srodku «Pryjoryks» na momant pastaŭki ŭ Biełaruś taksama paćviardžajecca najaŭnaściu šerahu siertyfikataŭ adpaviednaści patrabavańniam Naležnaj vytvorčaj praktyki lekavych srodkaŭ.
Vakcyna «Pryjoryks» vytvorčaści GlaxoSmithKlineBiologicals s.a. rekamiendavana Suśvietnaj arhanizacyjaj achovy zdaroŭja dla vykarystańnia ŭ nacyjanalnych prahramach imunizacyi, padkreśliła Karaban.