Najbujniejšy ŭ Biełarusi samahonny cech likvidavany ŭ Maładziečanskim rajonie, paviedamili ŭ adździaleńni infarmacyi i hramadskich suviaziej UUS Minskaha abłvykankama.
Samahonny cech 40-hadovy niepracujučy žychar vioski Jachimoŭščyna Maładziečanskaha rajona vyrašyŭ arhanizavać prosta ŭ dvary ŭłasnaha doma. Haspadar padvorka pastaviŭ vytvorčaść samahonu na pramysłovuju asnovu: braha «chadziła» ŭ čatyroch tysiačalitrovych śpiecyjalnych jomistaściach, padahravanych hazavymi harełkami. Dla siłkavańnia harełak adnačasova padłučalisia 2 bałony z prapanam, abjom jomistaści dla kandensacyi śpirtavych paroŭ składaŭ bolš za 3 tys. ł, a hatovy pradukt vyciakaŭ pa čatyroch źmiejevikach adnačasova.
Domaŭładańnie akružaŭ vysoki płot, jaho achoŭvali sabaki i sistemy videanazirańnia. Padčas honki samahonu dom achoŭvali svajaki haspadara.
Pavodle samych ścipłych acenak, mahutnaści zavoda dazvalali vyhaniać bolš za 500 ł samahonu za adnu honku, a vykarystańnie hazu dazvalała vyklučyć najaŭnaść typovych prykmiet samahonavareńnia: dymu z truby, sažy i pachu.
Adchody vytvorčaści pieravozilisia na śvinafiermu niepadalok, jakaja naležyć uładalniku padvorka. Fierma stała prykryćciom dla samahonnaha cecha: nie vyklikajučy padazreńniaŭ, samahonščyk spakojna kuplaŭ i pryvoziŭ dadomu bujnyja partyi muki, nibyta na korm.
Kab uziać samahonščyka z dokazami złačynstva, AMAPaŭcy niekalki hadzin siadzieli ŭ zasadzie i viali nazirańnie za domam. Kanfiskavana 240 ł samahonu, kala 6 t brahi i samahonny aparat.