16 śniežnia poŭnaściu adkryty ruch pa pieršym učastku druhoj kalcavoj aŭtamabilnaj darohi vakoł Minska na ŭčastku ad aŭtamabilnaj darohi R-28 Minsk — Maładziečna — Narač da aŭtamabilnaj darohi M-6 Minsk — Hrodna, paviedamili ŭ pres-słužbie Ministerstva transpartu i kamunikacyj.
Takim čynam, adznačyli ŭ Mintransie, dla aŭtatranspartu stanoviacca poŭnaściu dastupnymi kala 47 kiłamietraŭ novaj aŭtatrasy, jakaja abjadnała viciebskuju i hrodzienskuju šašu. Heta pieršy etap uźviadzieńnia MKAD-2, jaki byŭ padzieleny na piać čerhaŭ. Na pieršych troch ź ich raboty byli zavieršanyja raniej — 6 kastryčnika adbyłosia ich uračystaje adkryćcio z udziełam Alaksandra Łukašenki.
Jak adznačajuć u Mintransie, z puskam ruchu pa pieršym učastku MKAD-2 źjaviłasia mahčymaść nakiravać tranzitnyja patoki z hrodzienskaha i viciebskaha napramkaŭ u abchod stalicy. Novaja daroha źjaŭlajecca biaspłatnaj i ŭviadzieńnie płaty za prajezd pa joj nie płanujecca.
Čatyrochpałosnaja daroha z cemientabietonnym pakryćciom adkazvaje sučasnym patrabavańniam: pa dźvie pałasy ruchu ŭ kožnym napramku, masty i puciepravody, jakija padzialajuć transpartnyja patoki, dvuchbakovaja barjernaja aharodža pa vosi darohi dla vyklučeńnia łabavych sutyknieńniaŭ, sietkavaja zaharoda ad žyvioł uzdoŭž trasy ŭ rajonie lasnych masivaŭ, śvietłavyja tabło dla infarmavańnia kiroŭcaŭ ab situacyi na darozie i inš.
Rašeńnie ab uźviadzieńni druhoj MKAD było pryniataje jašče ŭ 2010 hodzie, ale da aktyŭnaj pracy pa jaje budaŭnictvie prystupili ŭ 2014 hodzie paśla daručeńniaŭ Łukašenka. Meta prajekta — razhruzić stalicu ad tranzitnaj płyni aŭtamabilaŭ, palepšyć ekałahičnaje stanovišča.
U cełym budaŭnictva MKAD-2 padzielena na dva etapy. Raboty pa pieršym ź ich užo zaviaršajucca. Na druhim etapie płanujecca pabudavać darohu praciahłaściu 41,4 kiłamietra, jakaja abjadnaje hrodzienskuju i bresckuju šašu. Hetyja raboty płanujecca zaviaršyć u 2017 hodzie. Usiaho ahulnaja praciahłaść MKAD-2 składzie prykładna 160 km: novaje budaŭnictva — kala 90 kiłamietraŭ, a taksama isnujučyja ŭčastki aŭtadaroh M-1/Je30, M-2 i R-80 — 70 kiłamietraŭ.
Zakazčykam budaŭnictva źjaŭlajecca RUP «Minskaŭtadar-Centr», prajekciroŭščykam — RUP «Biełhipradar». Raboty na abjekcie vykonvajuć padradnyja arhanizacyi chołdynhu «Biełaŭtadar», navukova-techničnaje supravadžeńnie ažyćciaŭlaje DP «BiełdarNDI».
