Uviečary 20 traŭnia dziaržaŭny telekanał ANT pakazaŭ siužet ab tym, jak kvatery aktyvistaŭ biełaruskaj dyjaspary ŭzłomvajuć u miežach tak zvanaj «spravy 104». U videa nazvali imiony niekatorych jaje fihurantaŭ, choć aficyjna Śledčy kamitet śpis abvinavačanych nie pryvodziŭ. Svaboda pahutaryła ź niekatorymi biełarusami, čyje kvatery pakazali ŭ siužecie.
«Kampensacyja musić być»
Prapahandyst Ihar Tur pakazaŭ u siužecie ANT, jak siłaviki łamali z dapamohaj admysłovaha instrumentu ratavalnikaŭ dźviery ŭ kvaterach biełaruskich aktyvistaŭ, jakija paśla 2020 hodu žyvuć za miažoj. Jon śćviardžaŭ, što hetyja ludzi zaklikajuć da sankcyj, ad čaho dziaržava maje ekanamičnyja straty.
«Straty, jakija-nijakija, majucca, tak što kampensacyja musić być. Kampensavać straty budziem ekanamičnymi metadami. Umoŭna kažučy, kali straty miljon dalaraŭ, to my kampensujem toj samy miljon. Usio zakonna i spraviadliva», — zajaviŭ Ihar Tur.
Na prademanstravanym videa vidać, što dźviery ŭ kvaterach paśla vobšukaŭ zavaryli z dapamohaj armatury i zvaračnaha aparata. Viadoŭca paviedamiŭ ab aryšcie kvatery Jany Łatuški — dački kiraŭnika «Narodnaha antykryzisnaha ŭpraŭleńnia» Paŭła Łatuški. A taksama ŭ siužecie dziaržaŭnaj prapahandy fihuravali inšyja aktyvisty — Alaksandar Šyško, Ała Puchava, Andrej Tupoŭski, Hanna Fiedaronak, historyk Viktar Jakubaŭ, kaardynatar kampanii «Eŭrapiejskaja Biełaruś» Dźmitry Bandarenka, žurnalist-frylanser Zmicier Kazakievič. Usie kvatery apiačatanyja, jak adznačałasia, u miežach kryminalnych spraŭ.
Ihar Tur u svaim siužecie taksama dadaŭ, što ličba 104 nie kančatkovaja. Śpis aktyvistaŭ, u jakich dziaržava źbirajecca adbirać nieruchomaść, budzie raści.
Spadčyna ad udzielnika Druhoj usiaśvietnaj vajny
Adzin z tych, kaho pakazali ŭ siužecie, mahiloviec Andrej Tupoŭski. Jon raskazaŭ Svabodzie, što kvateru, jakuju pakazali pa televizii, atrymaŭ jahony dzied jak udzielnik Druhoj usiaśvietnaj vajny.
«Moj dzied zasłužyŭ hetuju kvateru, bo svajo zdaroŭje pakłaŭ na vajnie», — kaža surazmoŭca.
Pa słovach Tupoŭskaha, paśla śmierci dzieda kvatera adyšła jahonamu tatu, paśla — samomu Andreju. Jon zaznačyŭ, što žyllo nie pryvatyzavanaje.
«Ja pryncypova nie pryvatyzavaŭ kvateru, kab nie spansavać režym Łukašenki. Bo moj dzied zasłužyŭ jaje», — dadaŭ Andrej Tupoŭski.
Jon ličyć, što takija dziejańni ŭłady — pomsta za jaho aktyŭnuju dziejnaść za miažoj. Tupoŭski kaža, što viadzie svoj kanał na TikTok, ciapier balatujecca ŭ Kaardynacyjnuju radu pa śpisie № 3 ad «Eŭrapiejskaha vybaru».
«Akurat ciapier my raspracoŭvajem temu adabranych kvater. Tyja ludzi, jakija heta zrabili, buduć pakaranyja ŭ novaj Biełarusi. Paniasuć adkaznaść usie, navat majstry z kamunalnaj słužby, jakija buduć apraŭdvacca, što jany chadzili łamać kvatery na zahad milicyi. U svaim TikTok ja trymaju Biełaruś na paradku dnia, pakazvaju, što ja dumaju. Tamu mianie i pakazali ŭ prapahandysckim siužecie ŭ pieršych radach», — kaža Andrej.
Jon vieryć, što kvatery, jakija ciapier zabrali orhany, ludzi sabie niekali zmohuć viarnuć.
«Advakaty nia chočuć hetym zajmacca»
Žycharka Homla Ała Puchava nia viedała, što pa ANT pakazvali jaje fota i siužet pra kanfiskacyju jejnaha žylla. Spasyłku na pieradaču joj paźniej skinuli svajaki. Pra aryšt kvatery žančyna daviedałasia 16 traŭnia, kali z adpaviednaj zajavaj vystupiŭ SK.
Ała sprabavała daviedacca, jakija padstavy aryštu kvatery, i znajści advakata, kab asprečyć jaho. Ale, jak kaža, advakaty admaŭlajucca pracavać u hetaj historyi.
«Niama słovaŭ. Nijakija zakony nie pracujuć u nas. Prosta ździek, žach. Ubačyć pa televizii, jak tvaju kvateru ŭzłamali, chodziać tam, potym zavaryli jaje? Jany nadta aktyvizavalisia apošnim časam. Im pahony dajuć za heta ci što? Ja ni ŭ čym nie vinavataja: ja nia zdradnica, nie złačynca, ja ničoha błahoha nie rabiła, nie rabavała, nikoha nie zarezała», — kaža Ała.
Žančyna dadała, što ludziam, jakija kupiać ci niejkim čynam atrymajuć kvatery, jakija ciapier zabrali ŭ aktyvistaŭ, jany nie pryniasuć ščaścia.
«My vierniemsia i vierniem svajo žytło», — dadała biełaruska.
«Ja šmat hadoŭ nie žyvu tam»
U siužecie ANT taksama pakazali kvateru, jakaja nibyta naležyć aktyvistcy Karalinie Ciarenćjevaj ź Viciebsku.
«Heta prosta absurd. Ja šmat hadoŭ nie žyvu tam. Ale vobšuki tam prachodzili čas ad času. Praca, napeŭna, takaja ŭ ludziej — chadzić i chadzić, šukać. Sumna, niespraviadliva, kryŭdna, emacyjna ciažka. Ale chutka ŭsio źmienicca, i ja ŭ heta vieru, navat vielmi chutka, tady pahladzim», — kaža Karalina.
Pa jaje słovach, pakazanuju ŭ siužecie ANT kvateru apiačatvajuć nia pieršy raz. Padčas adnaho z vobšukaŭ tam vyłamali dźviery i paškodzili batarei aciapleńnia, u vyniku susiedzi atrymali patop.
«Ciapier, bačycie, dźviery zavaryli. Nu dziakuju, što pakłapacilisia, što ŭ kvateru nichto nia trapić», — dadała surazmoŭca.
Karalina kaža, što, pa versii orhanaŭ, jana parušyła zakon, bo prymała ŭdzieł u mitynhu ŭ inšaj krainie. Jana dadała, što žyllo, jakoje pakazali ŭ siužecie, nie naležyć joj, jana prosta była tam zarehistravanaja.
«Jak u mianie mohuć zabrać toje, što nie naležyć mnie ŭvohule? Dzie lohika? Chacia pra što heta ja…» — kaža Karalina.
Na ŭmovach ananimnaści sa Svabodaj padzialiŭsia svajoj historyjaj jašče adzin biełaruski aktyvist. Jon kaža, što historyja nie źviazanaja ź siužetam na televizii. Ivan (imia źmienienaje z pryčyn biaśpieki. — RS) žyvie za miažoj užo peŭny čas. Jahonuju kvateru ŭ Biełarusi aryštavali, a kvatarantaŭ, jakija zdymali žytło, vysielili za dzień da aryštu kvatery i prymusili dać padpisku ab nievydavańni infarmacyi.
«Skazali, što mianie abvinavačvajuć u «ekstremiźmie». Śledčy kamitet ad kamentaroŭ svajakam admoviŭsia. Skazali hladzieć na sajcie», — kaža emihrant.
Jon dadaŭ, što siłaviki ŭ kvatery ničoha nie łamali. Aryštavali ladoŭniu, mikrachvaloŭku, televizar. Potym dźviery zamknuli na kluč i zaplambavali pry śviedkach.
Čytajcie taksama:
«Apiačatanaja, zavaranaja, podpis KDB». Kvatery palitemihrantaŭ z Homiela aryštavali paśla pahroz SK
SK pahražaje zabrać kvatery ŭ 104 udzielnikaŭ śviatkavańnia Dnia Voli za miažoj
