U inicyjatyŭnuju hrupu pa vyłučeńni Mikałaja Statkieviča kandydatam u prezidenty ŭžo ŭvajšło bolš za 1500 čałaviek. Viadomyja biełarusy Zinaida Bandarenka, Pavieł Sieviaryniec, Alaksiej Maračkin, Uładzimir Chalip, Mikałaj Aŭtuchovič, Ryhor Kastusioŭ, Słavamir Adamovič, Lavon Volski, Alaksandr Tamkovič, Viačasłaŭ Siŭčyk, Siarhiej Zakońnikaŭ, Jury Chaščavacki, Źmicier Daškievič, Volha Zavadskaja raspaviali pra svaju padtrymku Mikałaja, patłumačyli matyvy ŭvachodžańnia ŭ jaho inicyjatyŭnuju hrupu i padzialilisia čakańniami:na jakija vyniki svaich namahańniaŭ jany raźličvajuć.
AFP
Zinaida Bandarenka, były dyktar telebačańnia, narodnaja artystka Biełarusi:
– Jak čałaviek i hramadzianin Biełarusi, ja liču svaim abaviazkam zmahacca za vyzvaleńnie Mikałaja Statkieviča. Ja vielmi spadziajusia na toje, što kampanija pa jaho vyłučeńni kandydatam u prezidenty usio ž taki padšturchnie ŭładu da taho, kab vyzvalić Mikałaja. Toje, što vybaraŭ u Biełarusi niama i my ŭ ich nie vierym, viadoma daŭno. Ale čym bolš ludziej my abjadnajem, čym bolš my budziem pra heta kazać, čym bolš my budziem stukacca va ŭsie dźviery, tym bolš vierahodnasci, što heta pryviadzie da vyzvaleńnia Mikałaja Statkieviča. Ja liču, što ahulnymi namahańniami my možam damahčysia jaho vyzvaleńnia da majučych adbycca vybaraŭ.
U tym, što naša inicyjatyŭnaja hrupa budzie zarehistravana, ja sumniavajusia, ale peŭnyja nadziei na heta ŭ mianieŭsie ž taki jość. Spadarynia Jarmošyna ŭžo zuby źjeła na hetym, tamu, viadoma, jana znojdzie pryčyny, pa jakich možna admović u rehistracyi. Ale heta nie pavinna nas spyniać, my pavinny zmahacca za svabodu, nie być abyjakavymi da taho, što adbyvajecca ŭ Biełarusi. I ja budu pa mahčymaści rabić usio, što ŭ maich siłach.
Pavieł Sieviaryniec, sustaršynia arhkamiteta pa stvarenni partyi«Biełaruskaja Chryścijanskaja Demakratyja», były palitviazień:
– Pa-pieršaje, kampanija pa vyłučeńni Mikałaja Statkieviča kandydatam u prezidenty – heta adziny palityčna pravilny krok u tak zvanych vybarach 2015-ha hoda. Dla taho kab vykazać salidarnaść ź Mikałajem i z astatnimi palitviaźniami, dla taho kab zhurtavać ludziej, dla taho kab vyjavić falšyvuju sutnaść tak zvanych prezidenckich vybaraŭ.
Ja asabista viedaju Mikałaja Viktaraviča, viedaju jaho jak čałavieka mužnaha; usia Biełaruś užo ciapier viedaje jaho jak hieroja. Tamu što trymacca ŭ takich umovach, u jakich jon znachodzicca, a faktyčna heta katavańni i šmathadovyja ździeki, trymacca, nie padpisvać papieru ab pamiłavańni, stajać na svaim – dla hetaha, viadoma, patrebna vielizarnaja mužnaść. Taja mužnaść, jakaja tak nieabchodna ciapier usioj Biełarusi jak uzor, jak prykład.
BCHD delehuje niekalki sotniaŭ čałaviek u inicyjatyŭnuju hrupu Mikałaja Statkieviča, i niezaležna ad rehistracyi abo admovy my pavinny arhanizavać masavy zbor podpisaŭ za vyzvaleńnie Statkieviča i inšych palitviaźniaŭ. My budziem pravodzić akcyi salidarnaści, a taksama na mižnarodnym uzroŭni budziem davodzić infarmacyju da kožnaha zamiežnika, adkaznaha za adnosiny z našaj krainaj. Vybary ŭžo ciapier nie mohuć być pryznany sapraŭdnymi i spraviadlivymi, tamu što adzin z kandydataŭ u prezidenty 2010-ha hoda da hetaha času nizašto siadzić u turmie. Šancaŭ na toje, što naša inicyjatyŭnaja hrupa budzie zarehistravana, vielmi mała, ale ŭ nas jość płan dziejańniaŭ i my viedajem, što rabić dalej.
Ałjaksiej Maračkin, mastak, piedahoh, hramadski dziejač:
– Jość ludzi, jakija krytyčna staviacca da našaj inicyjatyŭnaj hrupy i da vyłučeńnia Mikałaja Statkieviča kandydatam u prezidenty. Jany apraŭdvajuć siabie tym, što čałaviek asudžany i pa zakonie nie maje prava abiracca prezidentam. A ja liču, što hetyja ludzi hłyboka pamylajucca. Bo svaimi razvahami jany jak by zhadžajucca z tym, što jon asudžany zakonna. Ja ž razam z usimi, chto ŭvachodzić u hrupu padtrymki Mikałaja Statkieviča, razvažaju zusim pa-inšamu. My śćviardžajem, što jon asudžany niezakonna, što situacyja, u jakoj jon znachodzicca, heta hvałt nad asobaj, nad palityčnym dziejačam, jaki byŭ aryštavany ŭ toj momant, kali farmalna vybary jašče nie byli skončany.
Tyja, chto siońnia padaje svoj hołas u padtrymku Mikałaja Statkieviča – heta sapraŭdnyja patryjoty, heta sapraŭdnyja biełarusy, jakija nikoli nie zmohuć pahadzicca z tym, što jon siońnia znachodzicca za kratami. I my pakazvajem usiamu śvietu, što kandydat u prezidenty na minułych vybarach Mikałaj Statkievič asudžany niezakonna, tamu jon byŭ i zastajecca našym kandydatam. Naša meta – heta vyzvaleńnie Mikałaja, usio astatniaje budzie vyznačacca potym. I kali ščyra, to mianie asabista mała cikavić, budzie zarehistravana naša inicyjatyŭnaja hrupa ci nie. Kali Mikałaj budzie vyzvaleny, tady i treba damahacca jaho rehistracyi, heta ŭžo druhi krok. Tamu što kali čałaviek niezakonna znachodzicca ŭ turmie, to jaho vyzvaleńnie źjaŭlajecca hałoŭnaj i adzinaj zadačaj. Viery ciapierašniaj uładzie ŭ mianie niama, ale damahacca spraviadlivaści ŭsio roŭna nieabchodna.
Uładzimir Chalip, dramaturh, litaratar, publicyst:
– Tyja abstaviny, u jakich Mikałaj Statkievič i inšyja palitviaźni, ludzi, da jakich nikoli nie było i nie mahło być nijakich pretenzij, siadziać u turmie,– heta dzikunstva, ź jakim nie moža pahadzicca ni adzin narmalny hramadzianin. U jakija b vopratki ni apranaŭsia ciapierašni kiraŭnik krainy i jak by jaho ni ŭsprymali ŭ inšych krainach, jaho režym zastajecca samym sadysckim i podłym va ŭsioj Jeŭropie.
Znachodžańnie Mikałaja Statkieviča ŭ turmie – heta rasprava nad im. I nichto ŭ Jeŭropie nie tolki nie moža akazać nijakaha cisku na našaha pravincyjnaha kiraŭnika, ale jašče i sprabuje časam admyvać jamu ruki, rabić ź jaho lehitymnuju fihuru, ź jakoj Zachad moh by ŭstaloŭvać kantakty. Heta aburalna, i my nie možam sastupać niahodnikam našy ŭjaŭleńni ab spraviadlivaści i prystojnaści, inakš praź niekatory čas my prosta apyniemsia ŭ tym stanie, u jakim znachodziłasia Jeŭropa napiaredadni Druhoj suśvietnaj vajny. Jak tolki my sastupim sadystam i turemščykam, ad hetaha pacierpić uvieś narod adnoj krainy, a potym i ŭsioj Jeŭropy.
Nie dumaju, što my zmožam akazać vialiki ŭpłyŭ na dziejučy režym i jon prysłuchajecca da hramadskaści, jakaja na samaj spravie jaho zusim nie tryvožyć. Ale rabić pry hetym choć štości my prosta abaviazany, kožny pavinien zrabić toje, što ŭ jaho siłach. Da hetaha času biełaruskaja hramadskaść zrabiła niedastatkova dla vyzvaleńnia palitviaźniaŭ, i ciapier, kali nabližajucca hetyja niaščasnyja vybary, my viedajem, što turmy režymu mohuć papoŭnicca novymi palitviaźniami. My pavinny zrabić usio mahčymaje, kab hetaha nie było.
U toje, što naša inicyjatyŭnaja hrupa budzie zarehistravana, ja zusim nie vieru. Pierakanany, što ni na jakija kampramisy režym nie pojdzie. Jon upeŭnieny ŭ sabie i moža być likvidavany tolki šlacham cisku na jaho z usich bakoŭ, ale pierš za ŭsio z boku hramadskaści. My pavinny znachodzić novyja formy baraćby za vyzvaleńnie palitviaźniaŭ, novyja formy cisku na hety režym i vykarystoŭvać usie mahčymyja varyjanty.
Mikałaj Aŭtuchovič, pradprymalnik, vieteran Afhanskaj vajny, były palitviazień:
– U pieršuju čarhu ja vystupaju nie za toje, kab Statkievič prosta ŭdzielničaŭ u hetych vybarach, a za toje, kab jaho vypuścili z turmy na volu. U toje, što inicyjatyŭnaja hrupa budzie zarehistravana, ja nie vieru. Dumaju, što adzinym mahčymym dziejańniem z našaha boku ŭ takoj situacyi pavinien stać bajkot vybaraŭ. Usie bačać, što my žyviom nie ŭ krainie, a ŭ imitacyi krainy, ale nichto nie choča hetaha mianiać. Tamu na svaim poli bitvy treba praciahvać zmahacca. Kab pazbavicca ad šmatlikich iluzij, my pavinny ŭžo narešcie žyć pa-novamu.
Ryhor Kastusioŭ, pałityk, eks-kandydat u prezidenty, namiesnik staršyniPartyi BNF:
Ja ŭvajšoŭ u inicyjatyŭnuju hrupu pa vyłučeńni Statkieviča, bo liču, što Mikoła pavinien stać kandydatam u prezidenty Biełarusi jak vyłučeniec ad usich nacyjanalna-demakratyčnych siłaŭ krainy. I jašče, kaniečnie, uznak majoj asabistaj pavahi da jaho. Ja padtrymlivaju kantakty sa šmatlikimi pradstaŭnikami štaba pa stvareńni inicyjatyŭnaj hrupy Statkieviča i nadalej budu dziejničać zhodna z ahulnym rašeńniem.
Ja vieru ŭ toje, što inicyjatyŭnaja hrupa pa vyłučeńni Statkieviča ŭ kandydaty na pasadu prezidenta Respubliki Biełaruś pavinna być zarehistravana. Ale voś nakont taho, ci budzie jana zarehistravana Centralnaj vybarčaj kamisijaj maju šmat sumnievaŭ. Bo ŭsie my dobra razumiejem sutnaść isnavańnia i dziejnaści hetaj kamisii, jakaja skiravana na pryznačeńnie na pasadu prezidenta tolki adnaho čałavieka. U vypadku admovyz boku Centralnaj vybarčaj kamisiiŭ rehistracyi inicyjatyŭnaj hrupy Statkieviča liču, što dalejšaja dziejnaść pavinna być skaardynavana štabam hrupy. Ja hatovy budu dałučycca da supolnych dziejańniaŭ. Supolnaja praca ŭ padtrymku Statkieviča budzie našym ahulnym układam u spravu adstojvańnia niezaležnaści našaj krainy, ab čym pastajanna kaža i Mikoła.
Słavamir Adamovič, paet, hramadski dziejač:
– Ja ŭvajšoŭ u inicyjatyŭnuju hrupu pa vyłučeńni Statkieviča,bo viedaju Mikałaja jak dastatkova śmiełaha čałavieka, poruč ź jakim ja braŭ udzieł u mnohich vuličnych akcyjach. Tamu što byŭ pobač u tym liku i ź im kala taho samaha pomnika, što pakul jašče staić nasuprać minskaha Doma ŭrada, i tolki vypadak uratavaŭ mianie ad chapuna tym poznym viečaram 19 śniežnia 2010-ha. Tamu što viedaju, što takoje turmy režymu ŭnutranaj akupacyi. Tamu što Statkievič pierš za ŭsio biełaruski nacyjanalist, a ŭžo potym usio astatniaje. Tamu što Mikoła byŭ adnym ź pieršych aficeraŭ BZV, chto prysiahnuŭ Biełarusi niezaležnaj, i tolki joj. Tamu što takich mužoŭ nam nie chapaje tut, na svabodzie.
Ja vieru ŭ stojkaść i tryvałaść Statkieviča, a hrupu nie zarehistrujuć, pra što, zdajecca, užo zajaviła hałoŭnaja šaściorka CVK. Jašče ŭ 2010-m hodzie ja byŭ za tatalny bajkot psieŭdavybaraŭ. Sioleta bajkot aktualny jak nikoli! Inicyjatyva za vyłučeńnie kandydatam u prezidenty Statkieviča – heta akramia maralnaha akta jašče dobraja nahoda dla ŭžo samaabvieščanych apazicyjnych kandydataŭ u prezidenty choć by ŭ apošiuju chvilinu vyjści z kantekstu psieŭdavybaraŭ i dałučycca da inicyjatyvy, a paśla jaje nierehistracyi abviaścić tatalny bajkot, niaŭdzieł u psieŭdavybarach.
Usio mahčyma ŭ palitycy, kali jaje robiać ludzi valavyja. Los astatnich – siadzieć na kuchniach i varyć boršč. A Mikoła Statkievič pieramoža pry lubych raskładach! Razam z nami! Karfahien maskoŭskaha prakuratara budzie razburany! Voś u heta j treba vieryć. I hety fakt treba nabližać krok za krokam. Bajkot – dziejsny ryčah takoha nabližeńnia.
Lavon Volski, muzyka, paet, mastak:
– Ja absalutna ŭpeŭnieny, što hrupu nie zarehistrujuć. Ja taksama ŭpeŭnieny, što ŭdzieł u vybarach pa vialikim rachunku nie maje sensu. Vy sami viedajecie, jakija buduć vyniki, a kali ja pamylajusia, dyk pieršy budu radavacca svajoj pamyłcy. Cieraz svoj hrafik ja nie zdoleju sustrakacca z narodam i ahitavać za Mikałaja. Bolš za toje, ja nie vieru, što hetyja sustrečy daduć plon. Nie viedaju, ź jakoj metaj palityki hetym razam udzielničajuć u čarhovym farsie. Upeŭnieny, što nie z metaj pieramahčy na vybarach. A ŭdzieł u vybarach ź inšymi metami – ci to absurd, ci štości horšaje.
Ja padpisaŭsia za Mikałaja, kab maralna padtrymać jaho i Marynu, bo razumieju, jak im ciažka, i hetaje błukańnie pa pakutach ciahniecca šmat nieacennych dla žyćcia hadoŭ. Maja tvorčaja zaniataść pakul nie dazvalaje mnie «pa poŭnaj prahramie» ŭdzielničać u palityčnych inicyjatyvach, ale vykazać svajostaŭleńnie, zhodu, niazhodu, pratest albo padtrymku – heta ja rablu zaŭsiody.
Alaksandr Tamkovič, piśmieńnik, publicyst:
– Ja schilajusia pierad mužnaściu Mikałaja Statkieviča. Tamu što, jak i jon, ja były vajskoviec i taksama viedaju sens słoŭ «Honar maju». Tamu što razumieju: jon viedaŭ, na što idzie, kali kazaŭ Łukašenku «Viarni toje, što skraŭ!». Heta nie radykalizm. Heta pačućcie ŭłasnaj hodnaści.
Vieru ŭ toje, što jaho inicyjatyŭnuju hrupu pavinny zarehistravać, ale nie vieru hramadziancy Jarmošynaj.
A jašče ja całkam zhodny z najlepšym biełaruskim paetam sučasnaści Uładzimiram Niaklajevym u tym, što padtrymka Mikałaja Statkieviča – sprava patrebnaja i karysnaja dla inšych kandydataŭ u prezidenty.
Viačasłaŭ Siŭčyk, palityk, hramadski dziejač, staršynia ruchu salidarnaści «Razam»:
– Ja ŭvajšoŭ u inicyjatyŭnuju hrupu Mikałaja Statkieviča i paklikaŭ za saboj dziasiatki členaŭ svajoj arhanizacyi, bo liču apošniaj pamyłkaj Łukašenki toje, što jon trymaje ŭ turmie palityka jašče ź minułych vybaraŭ. Heta treba vykarystoŭvać i pakazać, što ŭ Biełarusi nie moža być vybaraŭ da taho času, pakul u turmie znachodzicca Mikałaj Statkievič i inšyja palitviaźni. I ja vielmi zadavoleny tym, što na bazie vyłučeńnia Mikałaja kandydatam u prezidenty ŭźnikła realnaja abjadnanaja apazicyja, kudy ŭvajšli ludzi roznych palityčnych pohladaŭ, dzie pradstaŭleny roznyja partyi i ruchi, libierały i kansiervatary, sacyjał-demakraty i nacyjanalisty. Hetaja kaalicyja pakazvaje, što ŭ Biełarusi jość budučynia, a ŭ Łukašenki ŭ adroźnieńnie ad papiarednich čatyroch razoŭ nie atrymajecca prosta tak pravieści čarhovy fars zamiest sapraŭdnych vybaraŭ.
Ja vieru ŭ Boha i vieru ŭ toje, što ŭ adpaviednaści z zakonam inicyjatyŭnaja hrupa ŭ padtrymku Mikałaja Statkieviča pavinna być zarehistravana. Ale my hatovy da taho, što nasupierak zakonu naša hrupa zarehistravana nie budzie. Vidavočna, što Łukašenka baicca Statkieviča i prymusić svoj ručny CVK parušyć u čarhovy raz zakon. My da hetaha hatovy, i našy dziejańni buduć adpaviednymi, u tym liku za miežami Biełarusi.
Siarhiej Zakońnikaŭ, paet, publicyst, pierakładčyk, łaŭreat dziaržaŭnych i mižnarodnych premij:
– U pieršuju čarhu, ja padtrymlivaju vyłučeńnie Mikałaja Statkieviča kandydatam u prezidenty, bo daŭno jaho viedaju, jašče z časoŭ stvareńnia sacyjał-demakratyčnaj partyi. Ja viedaju, što ŭ jaho jość honar, sumleńnie, adkaznaść za narod i krainu. Jon zaŭsiody mnie padabaŭsia va ŭsich svaich spravach. Razam ź Mikałajem ja pieražyŭ šmat burnych padziej jašče na śvitanku biełaruskaha suvierenitetu. Z tych časoŭ ja jaho vielmi pavažaju. Ale jašče bolš ja pavažaju jaho za toje, što jon i siońnia nie zdajecca pierad ciažkimi abstavinami, u jakich znachodzicca. Usiamu našamu hramadstvu jon pakazvaje prykład taho, jak možna zastavacca mužnym čałaviekam i zmahacca ŭ luboj situacyi.
Dumaju, što adrazu ž u rehistracyi inicyjatyŭnaj hrupy Mikałaja Statkieviča admoŭlena nie budzie, ale ŭ rešcie rešt u Centrvybarkamie zrobiać usio dla taho, kab nas nie zarehistravać. Ja ŭžo daŭno viedaju canu słovam našych čynoŭnikaŭ, jakija voś užo 20 hadoŭ trymajuć krainu i ŭsich ludziej pad hipnozam machlaroŭ. I, viadoma, u ich jość vialikaje chvalavańnie, bo abjadnańnie vakoł Statkieviča moža vyklikać rezanans u hramadstvie siarod ludziej roznych pakaleńniaŭ. Ja vielmi spadziajusia na toje, što navat kali naša inicyjatyva i nie pryviadzie da chutkaj pieramohi, dyk chacia b raskałyša naša sonnaje hramadstva, jakoje ŭvieś čas čakaje čahości lepšaha, ale samo dla hetaha ničoha nie robić.
Jury Chaščavacki, kinarežysior, uładalnik dzjasiatkaŭ mižnarodnych kinaŭznaharod, člen Sajuza kiniematahrafistaŭ Biełarusi:
– Mikałaj Statkievič – heta čałaviek-stoik, jaki siońnia daje nam prykład taho, jak treba zmahacca, jak treba adstojvać svaje pazicyi. Ja ŭvajšoŭ u inicyjatyŭnuju hrupu ź vialikaj pavahi da hetaha čałavieka, jaki źjaŭlajecca prykładam mužnaści ŭ baraćbie sa złačynnaj uładaj. Bolš za toje, ja liču vielmi hanarovym dla siabie być u składzie jaho inicyjatyŭnaj hrupy.
Ja taksama ŭvachodžu ŭ inicyjatyŭnuju hrupu Anatola Labiedźki i mahu patłumačyć svaju pazicyju. Jak hramadzianin i prosta čałaviek ja razumieju, što pravilniej za ŭsio siońnia — heta bajkatavać falšyvyja vybary. Ale ja liču, što palityki nie majuć prava hetaha rabić. Palityki pavinny zaŭsiody zmahacca i pradjaŭlać hramadstvu svajo bačańnie našaha ahulnaha budučaha. U hetym sensie ja vielmi pavažliva staŭlusia da prahramy, jakuju prapanuje AHP.
Pakolki Mikałaj Statkievič antyzakonna nie maje zakonnych pravoŭ na toje, kab bałatavacca ŭ prezidenty, ja dumaju, što jaho inicyjatyŭnuju hrupu nie zarehistrujuć. Ale my pavinny sprabavać stvaryć u Biełarusi lubymi šlachami supolnaść ludziej, zdolnych na vałanciorskich pačatkach raspaŭsiudžvać prahramu novaj Biełarusi. Heta vielmi važna. Nam vielmi patrebna supolnaść prychilnikaŭ pieramienaŭ dla krainy. Heta stratehičnaja zadača dla ŭsich nas. Časta možna pačuć, što ŭ nas u apazicyi słabyja palityki, tamu ničoha ŭ ich nie atrymlivajecca. Ale ŭ mianie na hety kont inšaje mierkavańnie. U nas prosta hramadstva pakul słaboje, nie strukturavanaje ŭ hetym sensie. I atrymlivajecca, što ŭ nas to rabočyja dzieści strajkujuć, to pradprymalniki, to jašče niechta. Ale siarod ich niama abjadnańnia, i heta samaja vialikaja biada našaha hramadstva. Ja vielmi spadziajusia na toje, što mienavita tyja ludzi, jakija ŭvajšli ŭ skład inicyjatyŭnaj hrupy pa vyłučeńni Mikałaja Statkieviča, a siarod ich, darečy, jość i Anatol Labiedźka, zdolejuć stać jadrom dla abjadnańnia šyrokich mas u hramadstvie. Chopić u birulki hulać. Usie pastajanna chočuć, kab kandydaty abjadnalisia i vybrali adzinaha, ale my ž i sami pakul nie ŭmiejem abjadnacca, voś u čym biada. I ja vieru, što ludzi, jakija ŭvajšli ŭ inicyjatyŭnuju hrupu Statkieviča, zmohuć abjadnacca ŭ hałoŭnym, u tym, kab pryvieści Biełaruś da novaj situacyi, u jakoj buduć panavać zakon i svaboda.
Źmicier Daškievič, sustaršynia «Maładoha frontu», były palitviazień:
– Dumaju, što ŭdzieł u inicyjatyŭnaj hrupie Mikałaja Statkieviča – heta samy lepšy srodak damahčysia jaho vyzvaleńnia i vyzvaleńnia astatnich palitviaźniaŭ. Naša hrupa budzie akazvać hramadski cisk na Łukašenku, bo ŭsie hetyja źniešnija ciski biessensoŭnyja.
U pieršuju čarhu, my budziem čakać rehistracyi. Usio zaležyć ad Łukašenki, ad taho, jaki zahad jon addaść Jarmošynaj – rehistravać nas ci nie. Kali inicyjatyŭnaja hrupa budzie zarehistravana, ja budu zajmacca zboram podpisaŭ. Abapirajučysia na asabisty vopyt, viedaju, što kala tysiačy podpisaŭ, nie mocna adryvajučysia ad pracy, možna sabrać. Tym bolš što ludzi dobra viedajuć Statkieviča i cudoŭna razumiejuć, što jon padviarhajecca pieraśledu za svaje pohlady.
Viadoma, dla Łukašenki budzie lepš nie rehistravać inicyjatyŭnuju hrupu Mikałaja Statkieviča. Jon nie zacikaŭleny ŭ tym, kab imia Statkieviča fihuravała siarod užo najaŭnych fejkavych kandydataŭ. U vypadku admovy ŭ rehistracyi adzinym varyjantam u dačynieńni da vybarčaj kampanii zastajecca bajkot. U hetym vypadku my majem namier praciahnuć baraćbu za vyzvaleńnie ŭsich palitviaźniaŭ i budziem zaklikać hramadzian da niaŭdziełu ŭ hetych vybarach.
Volha Zavadskaja, maci źnikłaha 15 hadoŭ tamu žurnalista Dźmitryja Zavadskaha:
– Svaim uvachodžańniem u inicyjatyŭnuju hrupu Mikałaja Statkieviča ja chaču pryciahnuć uvahu hramadskaści da taho, što jon źjaŭlajecca palitviaźniem i jašče ź minułych vybaraŭ znachodzicca ŭ turmie. Mnie chaciełasiab, kab na heta źviarnuli bolšuju ŭvahu va ŭsim śviecie i ŭ našaj krainie. Žadaju paśpiachovaj pracy ŭsim udzielnikam inicyjatyŭnaj hrupy.
