50 dopytaŭ Anžaliki Borys
Anžaliku Borys znoŭ vyklikali ŭ adździaleńnie milicyi ŭ Horadni. Heta ŭžo piacidziasiaty sioleta dopyt staršyni Sajuzu palakaŭ, nie pryznanaj biełaruskimi ŭładami.
Skrabiec paŭhodu ŭ turmie
14 listapada eks-deputat Siarhiej Skrabiec pačaŭ čarhovuju haładoŭku. Jaho žonka paviedamiła, što ŭ muža padahryčny poliartryt pry parušeńniach abmienu rečyvaŭ, Skrabiec tryvaje mocny bol i nia moža stupać na pravuju nahu. Pravaabaroncy pryznajuć S. Skrabca palitviaźniem.
Pieramoha «Novaha Žyćcia»
Vierniki pratestanckaj carkvy «Novaje Žyćcio» atrymali techpašpart, jaki śviedčyć, što pamiaškańnie, u jakim carkva ładzić nabaženstvy, — kultavy budynak. U vieraśni Mienharvykankam admoviŭsia byŭ pryznavać kultavym budynkam były karoŭnik na ŭskrainie Miensku, vykupleny pratestantami ŭ 2002. Pratestanty adstajali svaju carkvu.
Haładoŭka salidarnaści z Aŭtuchovičam
10 listapada milicyjanty zatrymali numar niedziaržaŭnaj «Miestnoj haziety» z materyjałami pra Mikałaja Aŭtuchoviča. Raspaŭsiudnicu Marharytu Makavieckuju aštrafavali ŭ sudzie na 10 tys.rub. za handal u nienaležnym miescy j kanfiskavali 400 asobnikaŭ hazety.
Žychary Vaŭkavysku Jury Lavonaŭ (dyrektar firmy «Nika-Trans»), Ludmiła Parembskaja (sakratarka firmy), Ivan Januškievič, Michaił Siemiaryč (kiroŭcy firmy) i biespracoŭny, były supracoŭnik padatkovaj inspekcyi Ŭładzimier Asipienka abviaścili 14 listapada biesterminovuju haładoŭku ŭ znak padtrymki M.Aŭtuchoviča. Adpaviednyja zajavy jany padali na imia staršyni rajvykankamu Savieljeva. Sam pradprymalnik haładaje za kratami.
Pieratrus u aktyvista TBM
U Śvietłahorsku milicyjanty 12 listapada praviali pieratrus na kvatery aktyvista TBM Vadzima Bohdana ŭ adsutnaść haspadara. Milicyjanty nazvali pryčynaj pieratrusu infarmacyju pra narkotyki, ale šukali drukavanyja materyjały j pamnažalnuju techniku. Kanfiskavali biuleteni da Dnia salidarnaści j kala 30 asobnikaŭ hazety «Rehijanalnyja naviny». U ordery było niapravilna ŭkazana imia («Uładzimier» zamiž «Vadzim»).
Havin — apraŭdany, ale padazravany
Pieršaha staršyniu Sajuzu palakaŭ Biełarusi Tadevuša Havina 8 listapada vyklikali ŭ milicyju ŭ spravie pravierki dziejnaści Anžaliki Borys: Havina pytalisia, jak raźmiarkoŭvałasia pry im zamiežnaja dapamoha. U hetaj ža spravie 14 listapada na dopyt vyklikanyja A.Borys, jejny namieśnik Juzaf Pažecki dy jašče try aktyvisty SPB.
Viarchoŭny sud 8 listapada pastanaviŭ skasavać rašeńnie sudździ Kastryčnickaha rajonu Horadni ad 12 žniŭnia, jakoje pryznavała Havina vinavatym u drobnym chulihanstvie j asudžała na 15 sutak aryštu. Tady Havina, jaki ŭžo siadzieŭ pad aryštam, abvinavacili ŭ chulihanstvie ŭ dačynieńni da inšaha pakaranaha. Ciapier jon źbirajecca sudzicca z haradzienskim sudździom i patrabavać maralnaj kampensacyi.
Statkievič na chatnim režymie
Palitviaźnia Mikołu Statkieviča administracyja baranavickaj speckamendatury 11 listapada pieraviała na chatni režym: ciapier jon moža žyć u baćki.
Hazety adbivajucca
Niedziaržaŭnaja hazeta «Narodnaja vola» 10 listapada padała ŭ haspadarčy sud Miensku pazoŭ suprać RUP «Biełpošta», jakoje admoviłasia ŭklučać vydańnie ŭ padpisny kataloh na 2006 h.
U Horadni ŭ toj samy dzień paśla amal hadavoha pierapynku vyjšła hazeta «Birža informacii» — numar drukavaŭsia ŭ Smalensku, bo biełaruskija drukarni admovilisia.
Mininfarmacyi 9 listapada vyniesła papiaredžańnie redakcyi niedziaržaŭnaj hazety «Zhoda» za raspaŭsiudžvańnie źviestak, jakija źnievažajuć honar i hodnaść kiraŭnika dziaržavy, u šerahu materyjałaŭ.
Supracoŭniki paštovych adździaleńniaŭ Pinsku «nia rajać» vypisvać niedziaržaŭnuju hazetu «Miascovy čas», bo paštary nia buduć raznosić jaje padpisčykam užo z novaha hodu.
14 listapada RUP «Biełpošta» vyklučyła z padpisnoha katalohu niedziaržaŭnuju «Rehijanalnuju hazietu»: padstavaj stała zapazyčanaść u… 66 210 rub.
Niedziaržaŭnaja «Hazieta dla vas» (Ivacevičy) 14 listapada atrymała infarmacyju, što jaje majuć vysielić z pamiaškańnia rajbytkambinatu, jakoje redakcyja arandavała apošnija try hady. Inicyjataram skasavańnia arendy, pavodle źviestak redaktarki Lidzii Całujki, vystupaje rajvykankam.
Zavadzkaj admovili
Sudździa Valery Jeśman z sudu Centralnaha rajonu Miensku 11 listapada nie zadavoliŭ skarhu Śviatłany Zavadzkaj na śledčych rajonnaj prakuratury. Žančyna abskardžvała admovu zavieści kryminalnuju spravu ŭ dačynieńni da amapaŭca Jurja Davidoviča, jaki ŭdaryŭ jaje pa tvary. U sudzie vyjaviłasia, što na stužcy zamiž momantu ŭdaru zapisanaja pieradača z ORT. Pradstaŭniki biuro ORT u sudzie paćvierdzili, što na stužcy, jakuju pieradavali jany, hetaha zapisu nie było. Zavadzkaja maje skardzicca ŭ Mienski haradzki sud.
Zatrymali syna Levanieŭskaha
U Horadni 13 listapada padčas raspaŭsiudu hazety «Birža informacii», biuleteniu «Priedprinimatiel» i ŭlotak zatrymany Ŭładzimier Levanieŭski, syn palitviaźnia Valerja Levanieŭskaha. U pastarunku ŭ jaho kanfiskavali ŭsiu drukavanuju pradukcyju, pratakoł zatrymańnia nie składali.
BT niepadsudnaje
Prezydyjum Mienharsudu 9 listapada admianiŭ rašeńnie sudu Pieršamajskaha rajonu, kab Biełteleradyjokampanija abvierhła niepraŭdzivuju infarmacyju, raspaŭsiudžanuju ŭ prahramie «Panarama» nakont słonimskaha HA «Vola da raźvićcia» dy jahonaha kiraŭnika Michasia Varanca. Prysud na karyść słonimcaŭ byŭ vyniesieny 14 lutaha, adnak BT nie abvierhła padadzienaj infarmacyi navat paśla kasacyjnaj skarhi, za što 24 žniŭnia było aštrafavanaje. Paśla pratestu ź Viarchoŭnaha sudu było vyrašana, što vykazvańnie žurnalista Mikałaja Mieljačenki «maje charaktar mierkavańnia».
Źbili žurnalista
U Barysavie 8 listapada źbili žurnalista niezaležnaj hazety «Barysaŭskija naviny» Alesia Abramoviča. Kalehi nie vyklučajuć, što napad moh być vyklikany publikacyjami ŭ presie.
Maŭzer papaŭ pad haračuju ruku
Aktyvist niezarehistravanaj arhanizacyi «Zubr» Ŭładzisłaŭ Barodka j aktyvist AHP Dzianis Załucki 8 listapada byli zatrymany padčas raspaŭsiudžvańnia niezarehistravanaj hazety «16»; u ich kanfiskavali 400 numaroŭ hazety, nalepki da Dnia salidarnaści j znački «Lublu Biełaruś». «Zubroŭca» Jaŭhiena Suvorava, jaki fatahrafavaŭ padziei ŭ adździaleńni praz akno, taksama zatrymali.
Padčas rasklejki ŭlotak da Dnia salidarnaści ŭ noč z 12 na 13 listapada zatrymany «zubroŭcy» Ja.Suvoraŭ i Andrej Baskoraŭ.
U tuju ž noč milicyjanty zatrymali ŭdzielnikaŭ hurtu «Tavaryš Maŭzer» na čale z kiraŭnikom hurtu Janam Maŭzeram, jakija rasklejvali afišy svajho budučaha kancertu.
Aryšt kamunistki
7 listapada ŭ Homieli padčas razdačy hazety «Tovariŝ» milicyjanty zatrymali Maryju Bahdanovič, kanfiskavaŭšy ŭ jaje 72 hazety j 69 ulotak. 11 listapada jaje vyklikali ŭ prakuraturu Centralnaha rajonu: u dačynieńni da aktyvistki apazycyi raspačali kryminalnuju spravu pavodle art.172, č.8 («Niezakonny vyrab i raspaŭsiud pradukcyi ŚMI»), bo ŭlotki, układzienyja ŭ hazety, prakuratura paličyła niezarehistravanym dadatkam. M.Bahdanovič pahražaje štraf 225 tys.rub.
Salihorskija vianki
U Salihorsku 7 listapada siabar BNF Pavał Batujeŭ, siabar AHP Uładzimier Lemieš, čalcy ruchu «Maładyja demakraty» Dzianis Karnoŭ i Alaksiej Vałabujeŭ prynieśli da pomnika Leninu vianki z kalučaha drotu. Chłopcaŭ adpuścili z adździaleńnia milicyi praź dźvie hadziny.
Nie puścili va Ŭkrainu
Aktyvista niezarehistravanaj arhanizacyi «Treci šlach» Paŭła Marozava, jaki jechaŭ va Ŭkrainu, 9 listapada nia vypuścili ź Biełarusi, nie zvažajučy na dazvolny štamp u pašparcie j adsutnaść zabarony na vyjezd za miežy krainy. Pamiežniki matyvavali heta zahadam ź Miensku — z KDB i prakuratury.
U Vialejcy
Aktyvistaŭ demakratyčnaha ruchu Ŭładzimiera Malarčuka j Mikałaja Susłu zatrymali 12 listapada ŭ Vialejcy: jany raspaŭsiudžvali na haradzkim rynku biuleteń z zaklikam padtrymać Dzień salidarnaści.
Zvolnieny prafsajuzny aktyvist
Saviet Svabodnaha prafsajuzu Biełaruskaha (SPB) 14 listapada nia daŭ zhody dyrekcyi AAT «Zasłaŭjeśvidravod» na zvalnieńnie staršyni prafsajuznaj arhanizacyi Ŭładzimiera Fieakcistava. Dyrekcyja ličyć, što prafsajuzny aktyvist «systematyčna nie vykonvaŭ abaviazki», a prafsajuz zaznačaje, što ŭsie dyscyplinarnyja spahnańni na Fieakcistava nakładalisia biaź viedamu prafsajuzu, što supiarečyć zakanadaŭstvu.
AŠ
