Беларускія і расійскія актывісты аргкамітэта »Славянскага гей‑прайду», запланаванага ў Мінску на 15 мая, звярнуліся да Аляксандра Лукашэнкі з просьбай асабіста ўмяшацца ў працэс разгляду заяўкі на правядзенне акцыі, а таксама садзейнічаць афіцыйнаму прызнанню ў Беларусі Міжнароднага дня супрацьстаяння гамафобіі і трансфобіі.
Пра гэта паведаміў адзін з арганізатараў гей‑прайду Сяргей Андросенка.
Паводле яго слоў, накіраванне ліста на адрас прэзідэнта звязана з тым, што заяўка на правядзенне ў Мінску гей‑прайду знаходзіцца на разглядзе гарвыканкама ўжо больш за два месяцы.
Як адзначыў Андросенка, «Славянскі гей‑прайд 2010»
мае на мэце інфармаванне грамадства аб няроўным становішчы геяў, лесбіянак, бісексуалаў і трансгендэрных людзей на тэрыторыі Беларусі і Расіі і прыцягненне ўвагі грамадскасці, палітыкаў і СМІ да праблемы гомасексуальнасці.
«Не сакрэт, што праваабарончыя акцыі ў падтрымку сексуальных меншасцей, якія з’яўляюцца раўнапраўнымі грамадзянамі краіны, неаднаразова забараняліся ў Маскве. 5 мая ў Вільні быў забаронены »Балтыйскі гей‑прайд», нягледзячы на тое што Літва ўваходзіць у склад Еўрапейскага саюза», — сказаў Андросенка.
У адозве на імя кіраўніка дзяржавы падкрэсліваецца,
што арганізатары гей‑прайду не хочуць «эпатаваць публіку або наладжваць эратычныя паказы і канцэрты з пераапрананнем на вуліцы».
«Мы не збіраемся падрываць мараль грамадства. Больш за тое, мы мяркуем, што гэтае мерапрыемства пазітыўна адгукнецца на іміджы краіны, бо аднаполыя адносіны крымінальна не праследуюцца ў Беларусі, а гомасексуальнасць была выкраслена са спісу псіхічных расстройстваў Сусветнай арганізацыяй аховы здароўя ў 1990 годзе. Значыць, грамадзяне гомасексуальнай арыентацыі павінны мець такія ж правы, якімі валодаюць грамадзяне гетэрасексуальнай арыентацыі», — гаворыцца ў лісце.
Беларускія і расійскія гей‑актывісты звяртаюць увагу Аляксандра Лукашэнкі на тое, што праваабаронча‑інфармацыйная акцыя «Славянскі гей‑прайд 2010» прымеркавана да Міжнароднага дня супрацьстаяння гамафобіі і трансфобіі, які адзначаецца ў краінах Еўрасаюза 17 мая. У заключэнне члены аргкамітэта адзначаюць, што, ладзячы мерапрыемствы »Славянскага гей‑прайду 2010», яны толькі хочуць »даказаць тое, што Беларусь па праве пазіцыянуецца як талерантная і гасцінная краіна».
