Расійскія ўлады датычны да ўтойвання наступстваў хімічнай атакі ў сірыйскай правінцыі Ідліб, гаворыцца ў рассакрэчаным дакладзе Белага дома.
Па дадзеных амерыканскай разведкі і іншых крыніц, урадавая армія Сірыі скінула бомбы з зарынам на сваіх суайчыннікаў, адзначаецца ў дакуменце.
Белы дом лічыць, што Расія і Сірыя спрабавалі ўвесці сусветную супольнасць у зман з дапамогай кампаніі па дэзынфармацыі. Масква распаўсюджвае «шматлікія заявы, што супярэчаць адна адной, каб заблытаць сусветную супольнасць», гаворыцца ў дакладзе.
Пры гэтым ні ў дакладзе, ні ў каментарах амерыканскіх чыноўнікаў не ўтрымліваецца адказ на пытанне, ці ведала Расія аб хімічнай атацы ў правінцыі Ідліб загадзя.
Частка дакладу прысвечаная абвяржэнню дадзеных Расіі аб тым, што самалёты ў Ідлібе бамбілі склады боепрыпасаў, якія належаць «тэрарыстам». У дакуменце ўтрымліваюцца спасылкі на відэа і фотаздымкі са спадарожнікаў, дзе відаць, што бомбы скідаюцца на дарогу, а не на будынкі.
