Źjezdu papiaredničali skandały. Napiaredadni hrupa mastakoŭ sarvała pasiadžeńnie rady Sajuza.
telegraf.by
Zhodna sa statutam, na źjezd byŭ pavinien vyłučacca adzin delehat ad čatyroch siabroŭ sajuza. Niekatoryja siekcyi (dekaratyŭna-prykładnoha mastactva, žyvapisa, skulptury) nastojvali na praporcyi adzin da dvuch.
A skulptar Hienadź Burałkin, jaki ŭznačalvaŭ Sajuz mastakoŭ u 1990-2001 hadach, prapanavaŭ u intervju «Sovietskoj Biełoruśsii» zaprasić na źjezd usich siabroŭ arhanizacyi (bolš za tysiaču). Choć heta supiarečyła statutu i było niemahčymym pa finansavych pryčynach. Jašče adna ideja prahučała na samim źjeździe: ličyć delehatami ŭsich prysutnych. Ale pakolki adbor pravodziŭsia pa starych praviłach, ideju adchilili.
Hałoŭnaj intryhaj byli vybary novaha staršyni Sajuza mastakoŭ.
Z 2007 hoda dva terminy arhanizacyjaj kiravaŭ Uładzimir Savič. Usie hetyja hady jaho pieršym namieśnikam źjaŭlaŭsia Ryhor Sitnica, jaki vystaviŭ kandydaturu na novych vybarach. Taksama byli vyłučany jašče čatyry asoby. Skulptary Uładzimir Słabodčykaŭ i Hienadź Burałkin, mastaki Aleś Suša i Mikoła Buščyk (apošni ŭziaŭ samaadvod).
Pieramoh Ryhor Sitnica, nabraŭšy 132 hałasy. Na druhim miescy Uładzimir Słabodčykaŭ – 101 hołas. Dvuch astatnich kandydataŭ padtrymali kala paŭtara dziesiatka delehataŭ.
Paśla pieramohi novy staršynia Sajuza mastakoŭ abjaviŭ, što jaho pieršym namieśnikam budzie Alaksandr Draniec – aŭtar pomnika Francysku Skarynu la Nacyjanalnaj biblijateki.
Mastak Aleś Maračkin acharaktaryzavaŭ Sitnicu jak čałavieka, z usich pazicyj vartaha i dastojnaha novaj pasady. Heta «nacyjanalna śviadomy mastak, asoba, paet».
Sitnica źjaŭlajecca siabram supołki «Pahonia» i iišoŭ na źjezd jak delehat mienavita ad jaje.
Na dumku Alaksieja Maračkina, źjezd, jaki prachodziŭ u Pałacy mastactvaŭ, byŭ arhanizavany na vysokim uzroŭni.
Była arhanizavana vystava, dzie kožny ź siabroŭ sajuza (navat epatažny Aleś Puškin) zmoh vystavić adnu svaju pracu. Sam Maračkin prapanavaŭ tvor «Dom vieterana». Vystava karotkaterminovaja i zakryjecca ŭžo siońnia viečaram.
***
«Naša Niva» paprasiła Ryhora Sitnicu raskazać pra najbližejšyja płany na novaj pasadzie.
«Asnoŭnaja maja zadača — zachavać arhanizacyju, — kaža spadar Ryhor. — Bo jość peŭnyja pahrozy. Treba zrabić tak, kab unutry Sajuza nie adbyłosia paharšeńniaŭ. Ja — čałaviek zdarovaha sensu i liču, što luboje pytańnie možna vyrašyć pry dapamozie zdarovaha sensu. Zaraz mnie treba aktyŭna pracavać z tymi, chto mianie abiraŭ, a taksama i z tymi, chto hałasavaŭ suprać».
Inšaj važnaj zadačaj dla spadara Sitnicy zastajecca atrymańnie prefierencyj dla mastakoŭ z boku dziaržavy.
«Havorka idzie ab pravach mastaka — nie pra svabodu tvorčaści, a pra ceny na majsterni. Ad dziaržavy my majem peŭnyja prefierencyi, ale chaciełasia b, kab ich było bolš. Bo my, asabliva ŭ zamiežžy, pradstaŭlajem nacyjanalnuju kulturu, nacyju. Jość i kankretnyja płany, naprykład, rekanstrukcyja Pałaca mastactvaŭ. Pieravažna heta haspadarčyja ci, skazać, biznes-zadačy».
