PADZIEI
«Hliniany Viales» — Mikołu Papieku
Tavarystva Volnych Litarataraŭ abvieściła, što premiju TVŁ za lepšuju biełaruskuju mastackuju knihu 1999 hodu «Hliniany Viales» sioleta atrymaje paet-pčalar z Pružanščyny Mikoła Papieka za svoj pieršy paetyčny zbornik «Čarnaviki…» Uručeńnie premii adbudziecca 18 sakavika a 15 hadzinie ŭ połackim muzei-biblijatecy imia Simiaona Połackaha. U hety samy dzień u muzei adbudziecca prezentacyja paetyčnaha zbornika połackaj paetki 20-ch hadoŭ Hanny Breskaj «Nasturcyi», što vyjšaŭ u seryi «Biblijateka časopisa «Kałośsie».
Vasil Krokva
Hazeta miastečka Rakaŭ
Vyjšaŭ z druku pieršy numar hazety «Rakaŭski šlach». Zasnavaŭ i redahuje jaje prafesar BDU, prezydent mižnarodnaha Kupałaŭskaha fondu Viačasłaŭ Rahojša. Rakaŭ prasłaŭleny hienijem Kupały i «Narodnym albomam». Anhielskaja paetka Viera Ryč pryśviaciła Rakavu vierš, dzie nazyvaje hetaje miastečka «Paŭnočna-Ŭschodnimi Atenami». «Rakaŭski šlach» miarkuje znajomić čytačoŭ z historyjaj i pryrodaj kraju. Vychodzić «Rakaŭski šlach» budzie štomiesiac.
Brackaja viečaryna
Bractva pravasłaŭnaje moładzi imia Kanstancina Astroskaha naładziła viečarynu pamiaci Ŭładzimiera Karatkieviča, jakomu sioleta mahło b spoŭnicca 70 hadoŭ. U prybudovie da carkvy śviatych Piotry j Paŭła, što na Niamizie, vystupili Ryhor Baradulin, bard Aleś Kamocki, teatar «Źnič». Sami bratčyki pakazali insceniroŭku z ramanu Karatkieviča «Kałasy pad siarpom tvaim». Hledačoŭ było za sotniu.
Nadziejnyja hrošy
U Nacyjanalnaj biblijatecy adčyniłasia vystava «Hrošy Litoŭskaj Respubliki». Na joj pradstaŭlenyja kala 60 pamiatnych i jubilejnych manetaŭ, jakija vypuściŭ Litoŭski manetny dvor za časoŭ niezaležnaści. Šmat na ich i persanažaŭ biełaruskaj historyi.
Adamovič adjaždžaje
U siadzibie BNF prajšoŭ raźvitalny tvorčy viečar Słavamira Adamoviča, jaki nieŭzabavie maje źjechać na hod u Złučanyja Štaty. Tvory paeta čytaŭ aktor teatra «Dzie-ja» Mikoła Kazačonak. Śpiavačka Viktoryja Illinskaja, što rychtuje da vychadu albom ramansaŭ na vieršy Słavamira Adamoviča, vykanała paru ź ich, a maci paeta, spadarynia Juzefa, praśpiavała cudoŭnuju kałychanku, jakuju skłała dla ŭnukaŭ, na vierš syna pra «Sašku-prezydenta».
Juraś Barysievič
Stypendyja Damiejki
Karelicki rajvykankam ustanaviŭ stypendyju dla talenavitych školnikaŭ rajonu ŭ honar słavutaha ziemlaka, nacyjanalnaha hieroja Čyli Ihnata Damiejki, 200-hodździe narodzinaŭ jakoha chutka budzie adznačacca.
Uschodni ekspres
19 traŭnia z Partuhalii adpravicca litaraturny ekspres «Eŭropa—2000», jaki abjedzie 12 eŭrapiejskich krainaŭ. U Biełarusi jon prypynicca ŭ Bieraści. Ad Biełarusi na daromščynu pajeduć Volha Ipatava, Leanid Drańko-Majsiuk i Andrej Fiedarenka.
Pomnik Haškieviču
Ščyravańniem pasła Piatra Kraŭčanki ambasada Biełarusi ŭ Japonii pry dapamozie Rasiei źbirajecca pastavić pomnik znanamu padarožniku i navukoŭcu, pieršamu konsułu Rasiei ŭ Japonii Jazepu Haškieviču ŭ honar 140-hodździa adkryćcia pieršaha rasiejskaha dyplamatyčnaha pradstaŭnictva ŭ Japonii. Ułady dali dazvoł na ŭstanoŭku manumenta raboty biełaruskaha skulptara Valera Januškieviča.
B.T.
