EŬRAPIEJSKAJA KANVENCYJA AB ABARONIE PRAVOŬ ČAŁAVIEKA
Artykuł 21 3/
1. Čalcy Kamisii abirajucca Kamitetam Ministraŭ absalutnaj bolšaściu hałasoŭ sa śpisu, składzienaha Prezydyjumam Parlamenckaj Asamblei; kožnaja hrupa pradstaŭnikoŭ Vysokich Damoŭnych Bakoŭ u Parlamenckaj Asamblei vyłučaje troch kandydataŭ, dva ź jakich abaviazkova źjaŭlajucca hramadzianami dziaržavy, jakuju pradstaŭlaje hetaja hrupa.
2. U toj stupieni, u jakoj heta mahčyma zrabić, hetaja ž pracedura vykarystoŭvajecca pry kamplektavańni Kamisii ŭ tym vypadku, kali inšyja dziaržavy ŭ dalejšym stanoviacca ŭdzielnikami Kanvencyi, a taksama pry zapaŭnieńni vakansijaŭ, jakija adkryvajucca.
3. Kandydaty musiać vałodać vysokimi maralnymi jakaściami j adpaviadać patrabavańniam, jakija pradjaŭlajucca pry pryznačeńni na vysokija sudovyja pasady, albo mieć pryznany aŭtarytet u pytańniach unutranaha ci mižnarodnaha prava.
Artykuł 22 */
1. Čalcy Kamisii abirajucca na šaścihadovy termin. Jany mohuć być pieravybranyja. Adnak paŭnamoctvy siami čalcoŭ ź liku abranych na pieršych vybarach spyniajucca pa skančeńni troch hadoŭ z momantu abrańnia.
2. Čalcy Kamisii, paŭnamoctvy jakich spyniajucca ŭ kancy pieršaha trochhadovaha peryjadu, vyznačajucca pavodle žerabia Hieneralnym sakratarom Rady Eŭropy adrazu paśla zaviaršeńnia pieršapačatkovych vybaraŭ.
3. Z tym, kab pa mahčymaści zabiaśpiečyć abnaŭleńnie składu Kamisii napałovu kožnyja try hady, Kamitet Ministraŭ moža da praviadzieńnia lubych nastupnych vybaraŭ pryniać rašeńnie ab tym, kab termin ci terminy paŭnamoctvaŭ adnaho ci niekalkich abiranych čalcoŭ składuć nia šeść hadoŭ, a inšy peryjad, ale nia bolš za dzieviać i nia mienš za try hady.
4. U vypadkach, kali vyrašajecca pytańnie ab bolšym terminie paŭnamoctvaŭ, i Kamitet Ministraŭ užyvaje papiaredni punkt, Hieneralny sakratar vyznačaje terminy paŭnamoctvaŭ pavodle žerabia adrazu paśla vybaraŭ.
5. Čalec Kamisii, abrany dla zamiaščeńnia inšaha čalca, termin paŭnamoctvaŭ jakoha jašče nia skončany, zajmaje hetuju pasadu na praciahu terminu, što zastaŭsia da skančeńnia paŭnamoctvaŭ jaho papiarednika.
6. Čalcy Kamisii zajmajuć svaje pasady až da samaj zamieny. Paśla zamieny jany praciahvajuć zajmacca tymi pytańniami, jakija ŭžo znachodziacca na ichnim razhladzie.
Artykuł 23 4/
Čalcy Kamisii asabista ŭdzielničajuć u pracy Kamisii. Na praciahu ŭsiaho terminu, kali čalcy zajmajuć pasadu, jany nia musiać prymać na siabie vykanańnie funkcyjaŭ, niesumiaščalnych z patrabavańniami da hetaj pasady — niezaležnaściu, biesstaronnaściu j niezaniataściu inšymi spravami.
Artykuł 24
Luby Vysoki Damoŭny Bok moža pieradać u Kamisiju praz Hieneralnaha sakratara Rady Eŭropy pytańnie pra luboje mierkavanaje parušeńnie pałažeńniaŭ Kanvencyi inšym Vysokim Damoŭnym Bokam.
Artykuł 25
1. Kamisija moža atrymlivać petycyi, adrasavanyja Hieneralnamu sakrataru Rady Eŭropy ad luboj asoby, niedziaržaŭnaj arhanizacyi ci hrupy asobaŭ, jakija śćviardžajuć, što jany stali achviarami parušeńnia ichnich pravoŭ, jakija vykładzienyja ŭ hetaj Kanvencyi, adnym z Vysokich Damoŭnych Bakoŭ. Heta mahčyma pry ŭmovie, što Vysoki Damoŭny Bok, na jaki padadzienaja skarha, abviaściŭ, što jon pryznaje kampetencyju Kamisii atrymlivać takija petycyi. Tyja z Vysokich Damoŭnych Bakoŭ, što zrabili takuju zajavu, abaviazvajucca nijakim čynam nie pieraškadžać efektyŭnamu vykanańniu hetaha prava.
2. Takija zajavy mohuć być zroblenyja na peŭny pramiežak času.
3. Zajavy zdajucca na zachavańnie Hieneralnamu sakrataru Rady Eŭropy, jaki nakiroŭvaje ichnyja kopii Vysokim Damoŭnym Bakam i publikuje ich.
4. Kamisija vykonvaje funkcyi, praduhledžanyja hetym artykułam, tolki ŭ tym vypadku, kali chacia b šeść Vysokich Damoŭnych Bakoŭ źviazanych abaviazkami, paśla taho jak zrabili zajavy, praduhledžanyja papiarednimi punktami.
Artykuł 26
Kamisija moža prymać spravu da razhladu tolki paśla taho, jak u adpaviednaści z ahulnapryniatymi normami mižnarodnaha prava byli vyčarpanyja ŭsie ŭnutranyja srodki abarony, i tolki na praciahu šaści miesiacaŭ z dnia pryniaćcia kančatkovaha ŭnutranaha rašeńnia.
Artykuł 27
1. Kamisija nie razhladaje lubuju petycyju, padadzienuju ŭ adpaviednaści z artykułam 25, jakaja:
a) źjaŭlajecca ananimnaj;
b) źjaŭlajecca pa sutnaści takoj samaj, jakaja ŭžo była razhledžanaja Kamisijaj albo źjaŭlajecca ŭžo pradmietam inšaj pracedury mižnarodnaha razhladu ci ŭrehulavańnia, i kali jana nia ŭtrymlivaje novaj infarmacyi adnosna hetaj spravy.
2. Kamisija ličyć nieprymalnaj lubuju petycyju, pradstaŭlenuju ŭ adpaviednaści z artykułam 25, jakuju jana znojdzie niesumiaščalnaj z pałažeńniami hetaj Kanvencyi, vidavočna nieabhruntavanaj albo pryznaje padaču jaje złoŭžyvańniem prava padačy petycyjaŭ.
3. Kamisija adchilaje lubuju pieradadzienuju joj petycyju, jakuju jana paličyć nieprymalnaj u adpaviednaści z artykułam 26.
Artykuł 28 5/
1. U vypadku, kali Kamisija prymaje pieradadzienuju joj petycyju:
a) jana dziela ŭstanaŭleńnia faktaŭ sumiesna z pradstaŭnikami bakoŭ raspačynaje vyvučeńnie petycyi i, kali heta nieabchodna, rasśledavańnie, dziela efektyŭnaha viadzieńnia jakoha zacikaŭlenyja dziaržavy paśla abmienu pohladami z Kamisijaj stvarajuć usie nieabchodnyja ŭmovy;
b) jana adnačasova addaje siabie ŭ rasparadžeńnie zacikaŭlenych bakoŭ z metaj zabieśpiačeńnia pryjaznaha ŭrehulavańnia pytańnia na padmurku pavahi pravoŭ čałavieka, vyznačanych u hetaj Kanvencyi.
2. Kali namahańni Kamisii pa pryjaznym ŭrehulavańni pytańnia ŭviančajucca pośpiecham, jana ŭkładaje dakład, jaki nakiroŭvajecca zacikaŭlenym dziaržavam, Kamitetu Ministraŭ i Hieneralnamu sakrataru Rady Eŭropy dla apublikavańnia. Hety dakład źmiaščaje karotki vykład faktaŭ i vyniki dasiahnutaha ŭrehulavańnia.
Artykuł 29 6/, 7/
Paśla pryniaćcia petycyi, pradstaŭlenaj u adpaviednaści z artykułam 25, Kamisija tym nia mienš moža bolšaściu ŭ dźvie traciny svaich čalcoŭ pryniać rašeńnie adchilić petycyju, kali ŭ chodzie jaje razhladu vyśviatlicca najaŭnaść adnoj z pryčynaŭ, u suviazi ź jakimi pavodle artykułu 27 hetaja petycyja nia moža być pryniataja.
U takim vypadku rašeńnie davodzicca da viedama bakoŭ.
Artykuł 30 8/
Kamisija moža na luboj stadyi raźbiralnictva pryniać rašeńnie ab vyklučeńni petycyi sa svajho śpisu spravaŭ, kali abstaviny pryvodziać da vysnovy, što:
a) zajaŭlalnik nia maje namieru damahacca razhladu svajoj petycyi, albo
b) pytańnie było vyrašanaje, albo
c) ź luboj inšaj pryčyny, ustanoŭlenaj Kamisijaj, nieapraŭdana dalej praciahvać razhlad petycyi.
Adnak Kamisija praciahvaje razhlad petycyi, kali hetaha patrabuje pavaha pravoŭ čałavieka, vyznačanych u hetaj Kanvencyi.
2. Kali Kamisija vyrašyć vyklučyć petycyju sa svajho śpisu spravaŭ paśla jaje pryniaćcia, jana robić dakład, jaki źmiaščaje vykładańnie faktaŭ i rašeńnie ab vyklučeńni petycyi razam z padstavami dla hetaha. Dakład nakiroŭvajecca bakam, a taksama Kamitetu Ministraŭ dla infarmacyi. Kamisija moža apublikavać jaho.
3. Kamisija moža pryniać rašeńnie viarnuć petycyju ŭ śpis spravaŭ, kali jana paličyć, što abstaviny apraŭdvajuć taki krok.
Artykuł 31 9/
1. Kali razhlad petycyi nia byŭ zavieršany ŭ adpaviednaści z artykułami 28 (punkt 2), 29 albo 30, Kamisija robić dakład, jaki źmiaščaje fakty, i vykazvajecca nakont taho, ci dakazvajuć vyjaŭlenyja fakty parušeńnie adpaviednaj dziaržavaj jaje abaviazkaŭ pavodle hetaj Kanvencyi. U dakładzie mohuć być vykładzienyja indyvidualnyja mierkavańni čalcoŭ Kamisii pa hetym pytańni.
2. Dakład nakiroŭvajecca Kamitetu Ministraŭ. Jon taksama nakiroŭvajecca zacikaŭlenym dziaržavam, jakija nia majuć prava jaho apublikavać.
3. Kali Kamisija nakiroŭvaje dakład Kamitetu Ministraŭ, jana moža ŭnosić takija prapanovy, jakija paličyć słušnymi.
Artykuł 32
1. Kali pytańnie nie pieradajecca ŭ Sud u adpaviednaści z artykułam 48 hetaj Kanvencyi na praciahu troch miesiacaŭ sa dnia nakiravańnia dakładu Kamitetu Ministraŭ, to Kamitet Ministraŭ vyrašaje bolšaściu ŭ dźvie traciny hałasoŭ čalcoŭ, jakija majuć prava ŭdzielničać u pasiedžańniach Kamiteta, ci miełasia parušeńnie Kanvencyi.
2. Pry stanoŭčym adkazie Kamitet Ministraŭ pryznačaje termin, na praciahu jakoha adpaviedny Vysoki Damoŭny Bok musić zrabić zachady, praduhledžanyja ŭ rašeńni Kamitetu Ministraŭ.
3. Kali adpaviedny Vysoki Damoŭny Bok nia zrobić zadavalniajučych zachadaŭ na praciahu pryznačanaha terminu, to Kamitet Ministraŭ vyrašaje bolšaściu, praduhledžanaj u punkcie 1 vyšej, jakija zachady musiać być pryniatyja ŭ suviazi ź jaho pieršapačatkovym rašeńniem, i publikuje dakład.
4. Vysokija Damoŭnyja Baki abaviazvajucca razhladać ŭ jakaści abaviazkovaha dla ich luboje rašeńnie, jakoje Kamitet Ministraŭ moža pryniać dziela vykanańnia papiarednich punktaŭ.
Artykuł 33
Kamisija pravodzić pasiedžańni pry začynienych dźviarach.
Artykuł 34
Pry ŭmovie vykanańnia pałažeńniaŭ artykułaŭ 20 (punkt 3) i 29 Kamisija prymaje svaje rašeńni bolšaściu hałasoŭ prysutnych čalcoŭ, jakija ŭdzielničajuć u hałasavańni.
Artykuł 35
Pasiedžańni Kamisii pravodziacca pa miery nieabchodnaści. Pasiedžańni sklikajucca Hieneralnym sakratarom Rady Eŭropy.
Artykuł 36
Kamisija vypracoŭvaje ŭłasnyja praviły pracedury.
Artykuł 37
Sakrataryjat Kamisii addajecca ŭ rasparadžeńnie Kamisii Hieneralnym sakratarom Rady Eŭropy.
RAŹDZIEŁ IV
Artykuł 38
Eŭrapiejski Sud pa pravach čałavieka składajecca ź liku sudździaŭ, roŭnaha liku čalcoŭ Rady Eŭropy. Siarod sudździaŭ nia moža być bolš za adnaho hramadzianina adnoj dziaržavy.
Artykuł 39
1. Čalcy Suda abirajucca Parlamenckaj Asamblejaj sa śpisu asobaŭ, vysunutych čalcami Rady Eŭropy; kožny čalec Rady Eŭropy vysoŭvaje troch kandydataŭ, ź jakich chacia b dva musiać być hramadzianami hetaj dziaržavy.
2. U toj stupieni, u jakoj heta prydatna, hetaja ž pracedura užyvajecca pry kamplektavańni Suda ŭ vypadku pryjoma novych čalcoŭ Rady Eŭropy, a taksama pry zapaŭnieńni vakansijaŭ, jakija źjavilisia.
3. Kandydaty musiać vałodać vysokimi maralnymi jakaściami j adpaviadać patrabavańniam, pastaŭlenym pry naznačeńni na vysokija sudovyja pasady, albo być jurystami z pryznanym aŭtarytetam.
Artykuł 40 11/
1. Čalcy Suda abirajucca terminam na dzieviać hadoŭ. Jany mohuć być pieravybranymi. Adnak termin paŭnamoctvaŭ čatyroch čalcoŭ Suda pieršaha składu skančajecca praz try hady, a termin paŭnamoctvaŭ druhich čatyroch čalcoŭ Suda — praz šeść hadoŭ.
2. Čalcy Suda, termin paŭnamoctvaŭ jakich skančajecca praz try j šeść hadoŭ, vyznačajucca pavodle žerabia Hieneralnym sakratarom Rady Eŭropy adrazu paśla zaviaršeńnia pieršych vybaraŭ.
3. Dla zabieśpiačeńnia, nakolki heta mahčyma, abnaŭleńnia składu Suda kožnyja try hady na adnu tracinu Kansultatyŭnaja Asambleja moža da praviadzieńnia lubych nastupnych vybaraŭ pryniać rašeńnie, kab termin ci terminy paŭnamoctvaŭ adnaho albo niekalkich abiranych čalcoŭ skłali nia dzieviać hadoŭ, a inšy peryjad, ale nia bolš za dvanaccać i nia mienš za šeść hadoŭ.
4. U vypadkach, kali vyrašajecca pytańnie pra bolš, čym adzin termin paŭnamoctvaŭ i Kansultatyŭnaja Asambleja užyvaje papiaredni punkt, vyznačeńnie terminaŭ paŭnamoctvaŭ robić Hieneralny sakratar z dapamohaj žerabia adrazu paśla vybaraŭ.
5. Čalec Suda, abrany dla zamiaščeńnia druhoha čalca, termin paŭnamoctvaŭ jakoha jašče nia skončany, zajmaje hetuju pasadu na praciahu terminu, što zastaŭsia da skančeńnia paŭnamoctvaŭ jaho papiarednika.
6. Čalcy Suda zajmajuć svaje pasady da samaj zamieny. Paśla zamieny jany praciahvajuć zajmacca tymi spravami, jakija ŭžo znachodzilisia na ichnim razhladzie.
7. Čalcy Suda ŭdzielničajuć u pracy Suda asabista. Na praciahu svajho terminu paŭnamoctvaŭ jany nia musiać zajmać takich pasadaŭ, jakija niesumiaščalnyja ź ichnaj niezaležnaściu j biesstaronnaściu jak čalcoŭ Suda albo patrabavańniami hetaj pasady.
Artykuł 41 12/
Sud abiraje Staršyniu j adnaho albo dvuch namieśnikaŭ Staršyni terminam na try hady. Jany mohuć być pieravybranyja.
Artykuł 42
Čalcy Suda atrymlivajuć płatu, pryznačanuju Kamitetam Ministraŭ, za kožny dzień vykanańnia imi svaich funkcyjaŭ.
Artykuł 43 13/
Dla razhladu kožnaj pieradadzienaj jamu spravy Sud utvaraje pałatu ź dzieviaci sudździaŭ. Čalcam pałaty ex officio stanovicca sudździa-hramadzianin dziaržavy, jakaja źjaŭlajecca bakom u sprečcy, albo, kali takoha nia znojdziecca, to na vybar hetaj dziaržavy lubaja asoba, jakaja zasiadaje ŭ jakaści sudździ; imiony astatnich sudździaŭ vyznačajucca pavodle žerabia Staršyniom Suda da pačatku razhladu spravy.
Artykuł 44
Tolki Vysokija Damoŭnyja Baki j Kamisija majuć prava pieradavać spravu ŭ Sud.
Artykuł 45
Jurysdykcyja Suda pašyrajecca na ŭsie spravy, jakija datyčać tłumačeńnia j užyćcia hetaj Kanvencyi, jakija Vysokija Damoŭnyja Baki albo Kamisija pieradajuć Sudu ŭ adpaviednaści z artykułam 48.
Artykuł 46
1. Luby Vysoki Damoŭny Bok moža ŭ luby čas zajavić, što jon pryznaje ipso facto j biez specyjalnaha ŭzhadnieńnia jurysdykcyju Suda abaviazkovaj pa ŭsim pytańniam, jakija zakranajuć tłumačeńnie j užyćcio hetaj Kanvencyi.
2. Vyšejzhadanyja zajavy mohuć być biezumoŭnymi albo na ŭmovach uzajemnaści z boku niekalkich albo niekatorych inšych Vysokich Damoŭnych Bakoŭ albo na peŭny pramiežak času.
3. Hetyja zajavy addajucca na zachavańnie Hieneralnamu sakrataru Rady Eŭropy, jaki nakiroŭvaje ichnija kopii Vysokim Damoŭnym Bakam.
Artykuł 47
Sud moža pryniać spravu da razhladu tolki paśla taho, jak Kamisija pierakanajecca ŭ biezvynikovaści namahańniaŭ pa pryjaznamu ŭrehulavańniu spravy, i na praciahu trochmiesiačnaha terminu, praduhledžanaha artykułam 32.
Artykuł 48
Pry ŭmovie, što zacikaŭleny Vysoki Damoŭny Bok, kali jon źjaŭlajecca adzinym, albo zacikaŭlenyja Vysokija Damoŭnyja Baki, kali ich bolš adnaho, pryznajuć abaviazkovuju jurysdykcyju Suda albo, pry adsutnaści takoha pryznańnia, sa zhody zacikaŭlenaha Vysokaha Damoŭnaha Boku, kali jon źjaŭlajecca adzinym, albo zacikaŭlenych Vysokich Damoŭnych Bakoŭ, kali ich bolš adnaho, pieradavać spravy ŭ Sud mohuć:
a) Kamisija;
b) Vysoki Damoŭny Bok, hramadzianin jakoha źjaŭlajecca mierkavanaj achviaraj;
c) Vysoki Damoŭny Bok, jaki pieradaŭ spravu na razhlad Kamisii;
d) Vysoki Damoŭny Bok, suprać jakoha padadzienaja skarha.
Artykuł 49
U vypadku sprečki ab padsudnaści spravy Sudu pytańnie vyrašajecca aznačeńniem Suda.
Artykuł 50
Kali Sud pastanović, što rašeńnie albo zachad, pryniatyja sudovymi ci inšymi orhanami Vysokaha Damoŭnaha Boku całkam abo častkova supiarečać abaviazkam, jakija vynikajuć z dadzienaj Kanvencyi, a taksama kali ŭnutranaje prava paznačanaha Boku dapuščaje tolki častkovaje kampensavańnie nastupstvaŭ takoha rašeńnia albo zachadu, to rašeńnie Suda, kali nieabchodna, musić dać spraviadlivaje kampensavańnie paciarpiełamu boku.
Artykuł 51
1. Rašeńnie Suda musić być matyvavanym.
2. Kali rašeńnie, całkam albo ŭ niejkaj svajoj častcy, nie vyjaŭlaje adnadušnaha mierkavańnia sudździaŭ, to luby sudździa maje prava pryvieści svajo asabistaje mierkavańnie.
Artykuł 52
Rašeńnie Suda źjaŭlajecca kančatkovym.
Artykuł 53
Vysokija Damoŭnyja Baki abaviazvajucca vykonvać rašeńni Suda pa luboj spravie, u jakoj jany źjaŭlajucca bakami.
Artykuł 54
Rašeńnie Suda nakiroŭvajecca Kamitetu Ministraŭ, jaki ździajśniaje nahlad za jahonym vykanańniem.
Artykuł 55
Sud vyznačaje ŭłasnyja praviły j naładžvaje svaju ŭłasnuju praceduru.
Artykuł 56
1. Pieršyja vybary čalcoŭ Suda adbyvajucca paśla taho, jak kolkaść zajavaŭ, zroblenych Vysokimi Damoŭnymi Bakami ŭ adpaviednaści z artykułam 46, budzie roŭnaj vaśmi.
2. Nivodnaja sprava nia moža być pieradadzienaja ŭ Sud da hetych vybaraŭ.
RAŹDZIEŁ V
Artykuł 57
Paśla atrymańnia zapytu ad Hieneralnaha sakratara Rady Eŭropy luby Vysoki Damoŭny Bok padaje rastłumačeńni adnosna taho, jakim čynam jaho ŭnutranaje prava zabiaśpiečvaje efektyŭnaje vykanańnie luboha z pałažeńniaŭ hetaj Kanvencyi.
Artykuł 58
Vydatki Kamisii j Sudu niasie Rada Eŭropy.
Artykuł 59
Čalcy Kamisii j Suda padčas vykanańnia svach funkcyjaŭ majuć pryvilei j imunitety, praduhledžanyja ŭ artykule 40 Statuta Rady Eŭropy i ŭ pahadnieńniach, jakija byli zaklučanyja ŭ adpaviednaści ź joju.
Artykuł 60
Ništo ŭ hetaj Kanvencyi nia musić tłumačycca jak abmiežavańnie albo adchileńnie ad jakich-niebudź pravoŭ i asnoŭnych svabodaŭ čałavieka, jakija mohuć harantavacca zakanadaŭstvam luboha Vysokaha Damoŭnaha Boku albo lubym inšym pahadnieńniem, u jakim hety Vysoki Damoŭny Bok udzielničaje.
Artykuł 61
Ništo ŭ hetaj Kanvencyi nie niasie straty paŭnamoctvam Kamitetu Ministraŭ, jakija ŭskładzienyja na jaho Statutam Rady Eŭropy.
Artykuł 62
Vysokija Damoŭnyja Baki zhadžajucca z tym, što, akramia vypadkaŭ zaklučeńnia asobaha pahadnieńnia pra heta, jany nie skarystajuć dziejnyja miž imi damovami, kanvencyi albo deklaracyi dziela pieradačy šlacham nakiravańnia petycyi sprečki, jakaja ŭźnikła ŭ suviazi z tłumačeńniem i ŭžyćciom hetaj Kanvencyi, dla jaje razhladu inšymi srodkami ŭrehulavańnia čym tyja, jakija byli praduhledžanyja hetaj Kanvencyjaj.
Artykuł 63
1. Lubaja dziaržava moža pry ratyfikacyi albo ŭ luby inšy čas paśla hetaha zajavić šlacham paviedamleńnia Hieneralnamu sakrataru Rady Eŭropy pra toje, što hetaja Kanvencyja raspaŭsiudžvajecca na ŭsie terytoryi albo na lubuju ź ich, za mižnarodnyja adnosiny jakich hetaja dziaržava niasie adkaznaści.
2. Dziejańnie Kanvencyi raspaŭsiudžvajecca na terytoryju albo terytoryi, paznačanyja ŭ paviedamleńni, z tryccataha dnia paśla atrymańnia hetaha paviedamleńnia Hieneralnym sakratarom Rady Eŭropy.
3. Pałažeńni hetaj Kanvencyi na takich terytoryjach prymianiajucca adnak z naležnym ulikam miascovych patrabavańniaŭ.
4. Lubaja dziaržava, jakaja zrabiła zajavu ŭ adpaviednaści z punktam 1 hetaha artykuła, moža u luby čas paśla hetaha zajavić ad imia adnoj ci niekalkich terytoryjaŭ, da jakich zajava adnosicca, što jana pryznaje kampetencyju Kamisii atrymlivać petycyi ad paasobnych ludziej, niedziaržaŭnych arhanizacyjaŭ albo hrupaŭ asobaŭ u adpaviednaści z artykułam 25 hetaj Kanvencyi.
Artykuł 64
1. Lubaja dziaržava pry padpisańni hetaj Kanvencyi albo pry zdačy na zachavańnie ratyfikacyjnaj hramaty moža zrabić zaŭvahu ŭ dačynieńni da luboha asobnaha pałažeńnia Kanvencyi ŭ adnosinach da taho, što toj ci inšy zakon, dziejsny ŭ hety čas na jejnaj terytoryi, nie adpaviadaje hetamu pałažeńniu. U adpaviednaści z hetym artykułam abhavorki ahulnaha charaktaru nie dapuščajucca.
Artykuł 65
1. Vysoki Damoŭny Bok moža denansavać hetuju Kanvencyju tolki pa skančeńni piaci hadoŭ z taho momantu, kali jon stanovicca ŭdzielnikam Kanvencyi, i šaści miesiacaŭ paśla paviedamleńnia, nakiravanaha Hieneralnamu sakrataru Rady Eŭropy, jaki infarmuje pra heta inšyja Vysokija Baki.
2. Takaja denansacyja nie vyzvalaje adpaviedny Vysoki Damoŭny Bok ad jahonych abaviazkaŭ u adpaviednaści z hetaj Kanvencyjaj ŭ adnosinach da luboha aktu, jaki moža ŭjaŭlać ź siabie parušeńnie takich abaviazkaŭ, kali taki akt moh być ździejśnieny im da daty, kali denansacyja ŭvajšła ŭ siłu.
3. Luby Vysoki Damoŭny Bok, jaki pierastaje być čalcom Rady Eŭropy, pierastaje być i Bokam hetaj Kanvencyi na tych ža ŭmovach.
4. Kanvencyja moža być denansavanaja ŭ adpaviednaści z pałažeńniami papiarednich punktaŭ u adnosinach da luboj terytoryi, na jakuju pašyrajecca jaje dziejańnie zhodna z pałažeńniem artykuła 63.
Artykuł 66
1. Hetaja Kanvencyja adkrytaja dla padpisańnia čalcami Rady Eŭropy. Jana padlahaje ratyfikacyi. Ratyfikacyjnyja hramaty addajucca na zachavańnie Hieneralnamu sakrataru Rady Eŭropy.
2. Hetaja Kanvencyja ŭvachodzić u siłu paśla zdačy na zachavańnie dziesiaci ratyfikacyjnych hramataŭ.
3. Dla tych dziaržavaŭ, jakija ratyfikujuć Kanvencyju paźniej, jana ŭvachodzić u siłu paśla zdačy na zachavańnie ichnich ratyfikacyjnych hramataŭ.
4. Heneralny sakratar Rady Eŭropy paviedamlaje ŭsim čalcam Rady Eŭropy pra ŭvachodžańnie Kanvencyi ŭ siłu, pra Vysokija Damoŭnyja Baki, jakija ratyfikavali jaje, i pra zdaču ratyfikacyjnych hramataŭ, jakija mohuć być atrymanyja ŭ dalejšym.
Ździejśniena ŭ Rymie čaćviortaha dnia listapadu 1950 hodu na anhielskaj i francuskaj movach, pryčym abodva teksty źjaŭlajucca adnolkava aŭtentyčnymi, isnujuć u adzinym ekzemplary, jaki zachoŭvajecca ŭ archivach Rady Eŭropy. Hieneralny sakratar nakiroŭvaje zavieranyja kopii kožnaj ź dziaržavaŭ, što padpisali Kanvencyju.
Znoski:
1/ European Treaty Series N 5. Tekst, źmienieny ŭ adpaviednaści z pałažeńniami Pratakołu N 3 (ETS, N 45), jaki ŭvajšoŭ u siłu 21 vieraśnia 1970 hodu, Pratakołu N 5 (ETS, N 55), jaki ŭvajšoŭ u siłu 20 śniežnia 1971 hodu j Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu, i źmiaščaje taksama tekst Pratakołu N 2 (ETS, N 44), jaki adpaviedna punktu 3 artykuła 5 hetaha Pratakołu źjaŭlajecca składanaj častkaj Kanvencyi z momantu jaho ŭvachodžańnia ŭ siłu 21 vieraśnia 1970 hodu.
2/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
3/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
*/ Tekst źmienieny ŭ adpaviednaści z pałažeńniami Pratakołu N 5 (ETS, N 55), jaki ŭvajšoŭ u siłu 20 śniežnia 1971 hodu.
4/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
5/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
6/ Tekst źmienieny ŭ adpaviednaści z pałažeńniami Pratakołu N 3 (ETS, N 45), jaki ŭvajšoŭ u siłu 21 vieraśnia 1970 hodu.
7/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
8/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
9/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
10/ Tekst źmienieny ŭ adpaviednaści z pałažeńniami Pratakołu N 3 (ETS, N 45), jaki ŭvajšoŭ u siłu 21 vieraśnia 1970 hodu j Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
11/ Tekst źmienieny ŭ adpaviednaści z pałažeńniami Pratakołu N 3 (ETS, N 45), jaki ŭvajšoŭ u siłu 21 vieraśnia 1970 hodu j Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
12/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
13/ Tekst źmienieny ŭ adpaviednaści z pałažeńniami Pratakołu N 8 (ETS, N 118), jaki ŭvajšoŭ u siłu 1 studzienia 1990 hodu.
Pratakoły da Kanvencyi buduć nadrukavanyja ŭ nastupnym numary «NN».
