Na padrychtoŭku i praviadzieńnie fiestyvalu «Dažynki-2011» u Maładziečnie było vydatkavana 822,8 miljarda rubloŭ. Za apošnija piać hadoŭ heta adno z samych darahich śviataŭ uradžaju. Jak vyjaviła pravierka KDK, z hetaj sumy 7,6 miljarda było vykarystana nieefiektyŭna, a asvajeńnie jašče 6,6 miljardaŭ pryznali niezakonnym abo niametavym.
Pa vynikach pravierki da adkaznaści pryciahnuli 131 słužbovuju asobu. Byli raspačatyja dźvie kryminalnyja spravy za złoŭžyvańnie słužbovymi paŭnamoctvami i za niezakonnuju pradprymalnickuju dziejnaść.Hetyja ličby stali viadomyja na kalehii KDK Minskaj vobłaści.
Što jašče vyjaviła pravierka? Dziaržkantrol tak i nie adšukaŭ ahulnaha kaštarysu pracaŭ pa padrychtoŭcy i praviadzieńni fiestyvalu. Jak vynik, praź niasvoječasovaje finansavańnie mnohija abjekty nie adramantavali navat praz paŭhoda paśla praviadzieńnia «Dažynak». A da niekatorych raniej zapłanavanych rabot ruki nie dajšli ŭvohule.
Najbolš u vykradańni hrošaj adznačylisia słužbovyja asoby AAT «Budtrest №3 Ordena Kastryčnickaj revalucyi».Prydumanaja imi schiema apłaty arendy žylla dla supracoŭnikaŭ tresta pryniesła im niezakonnyja prybytki ŭ pamiery kala paŭmiljarda rubloŭ — z vydzielenych na apłatu žylla 494,2 miljona rubloŭ da ŭładalnikaŭ kvater dajšło tolki 39,6.
Achviarami niadbajnaści budaŭnikoŭ stali žychary 141 kvatery: u 28 damach ramont dachaŭ zaciahnuŭsia na niekalki miesiacaŭ. Uvieś hety čas jany byli nie abaronienyja ad daždžoŭ. Tady čytač «NN» z Maładziečna apisaŭ, jakim čynam adbyvaŭsia ramont na vulicy Vialiki Haściniec. Jon dasłaŭ niekalki dziasiatkaŭ fota zavalenych budaŭničym druzam dvaroŭ, zatoplenych padčas daždžu kvater.
