U akruhovyja vybarčyja kamisii pastupiła 440 zajavaŭ na rehistracyju inicyjatyŭnych hrup patencyjnych kandydataŭ u deputaty pałaty pradstaŭnikoŭ piataha sklikańnia. Mienavita hetu ličbu nazvaŭ siońnia «Svabodzie» sakratar Centravybarkamu Mikałaj Łazavik. Ale nasamreč patencyjnych kandydataŭ u deputaty pryblizna na sto mienš, čym inicyjatyŭnych hrupaŭ.
Były kandydat u prezidenty Biełarusi Mikoła Statkievič staŭ svojeasablivym rekardsmenam. Ad jaho imia padadzienyja zajaŭki na rehistracyju inicyjatyŭnych hrupaŭ u 56 akruhach.Jašče adzin były pretendent na pasadu kiraŭnika biełaruskaj dziaržavy Aleś Michalevič pažadaŭ zarehistravać svaje hrupy ŭ 18 minskich vybarčych akruhach. Treci ŭ hetym śpisie — pradstaŭnik partyi «Spraviadlivy śviet» Alaksandar Ircho. Jon choča zarehistravać svaje inicyjatyŭnyja hrupy ŭ 11 akruhach Mahiloŭskaj vobłaści. 12 hramadzian ahułam žadajuć zarehistravać hrupy svajoj padtrymki ŭ 107 akruhach.
Vybarčaje zakanadaŭstva, tłumačyć sakratar CVK Mikałaj Łazavik, nie zabaraniaje heta rabić:«Nijakaha parušeńnia tut niama. Hramadzianin moža vyłučacca ŭ niekalkich vybarčych akruhach. Ale zarehistravany jon moža być tolki ŭ adnoj akruzie».
Aktyŭnaść Mikoły Statkieviča i Alesia Michaleviča možna zrazumieć, adznačaje kiraŭnik Centra jeŭrapiejskaj intehracyi Andrej Jahoraŭ: «Ja dumaju, što heta vielmi roznyja situacyi — Statkieviča i Michaleviča. Michalevič faktyčna znachodzicca ŭ emihracyi. I jon praz svaje inicyjatyŭnyja hrupy sprabuje jašče raz ahučyć svajo imia ŭ palitycy i abaznačyć svaju prysutnaść u Biełarusi».
U Mikoły Statkieviča, na dumku spadara Jahorava, krychu inšaja matyvacyja: «Siarhiej Čysłaŭ rabiŭ prykładna toje ž samaje paśla taho, jak adbyŭ termin u śledčym izalatary KDB pa abvinavačvańni ŭ terarystyčnych vybuchach na 3 lipienia. Jon vyjšaŭ i pajšoŭ tady demanstratyŭna ŭ deputaty. Siarhiej chacieŭ skarystać hetuju mahčymaść i danieści da ludziej infarmacyju pra niespraviadlivaść u dačynieńni da jaho. A taksama pakazać, što jon nie skorany svaim viazieńniem.
Toje ž samaje demanstruje i Statkievič.
Heta demanstratyŭny krok vielmi mužnaha čałavieka, jaki ličyć siabie ni ŭ čym nie vinavatym i hodnym dla taho, kab być palityčnym lidaram navat u takoj situacyi, u jakoj jon znachodzicca».
Mikołu Statkieviča vyłučali bolš jak pa 56 akruhach, kaža jahonaja žonka Maryna Adamovič: «71 akruha, pavodle samych ścipłych padlikaŭ. Praŭda, u niekatorych akruhach admovilisia prymać dakumienty. Ale heta nie 15 akruh, značna mieniej. U Babrujsku ich prosta parvali i vykinuli ŭ śmietnicu. U Breście ŭ adnoj admovili, u Hrodnie — taksama, u Homieli, zdajecca, u troch…
Jakija asnoŭnyja mety my stavili hetaj akcyjaj? Najpierš — nahadać hramadstvu, što ŭ našaj krainie jość palitviaźni, što za kratami znachodzicca kandydat u prezidenty Mikoła Statkievič».
Kančatkovyja vyniki rehistracyi inicyjatyŭnych hrupaŭ Centarvybarkam abiacaje abviaścić 25 lipienia.
