Pieršaje praviła mnohich našych alimpijcaŭ — partyzanskaje. Heta kali atlet zakryvajecca ad cikaŭnych vačej pierad startam.
Adzin z takich zaciatych partyzanaŭ — kidalnik mołata Ivan Cichan. Jon, darečy, i paśla spabornictvaŭ nie nadta lubić vystupać publična.
Najlepšaja spartoŭka Biełarusi minułaha hoda Nadzieja Astapčuk, jakaja vystupaje ŭ šturchańni jadra, pierad Hulniami biare ź Cichana prykład:
«Paśla spabornictvaŭ damo lubyja intervju, a ciapier — nie, — kaža trenier šturchalnicy Alaksandr Jafimaŭ. — Jana saramlivaja. Sprava — na pieršym płanie, razmovy — na druhim».
Ahulnaviadoma, što mnohija baksiory napiaredadni pajadynkaŭ nie zajmajucca seksam. Pytajemsia ŭ treniera Kanstancina Machańkova (na Hulni ŭ Łondan jon viazie bajca Siarhieja Karniejeva), čamu majstram skuranych palčatak davodzicca admaŭlacca ad miłosnych uciechaŭ z žančynaj i jak doŭha treba ŭstrymlivacca.
Kanstancin Machańkoŭ: «Try tydni. Źlejšym budzieš na rynhu. Najlepšaja kancentracyja tady. I paśla luboščaŭ moc u nahach stračvajecca».
Alimpijskija čempijony Piekina ŭ viesłavańni braty Bahdanovičy spuskajucca na vadu, nadzieŭšy chryścijanskija kryžyki. A taksama vierać i prytrymlivajucca zababonaŭ, što za dva tydni da Alimpijady nie varta halicca i stryhčysia.
Mnohija z našych futbalistaŭ, heta nie sakret, vierać u ceły šerah zababonaŭ. Niechta kładzie ŭ hietry ščaślivyja manietki. Niechta zaŭždy šnuruje bucy, pačynajučy vyklučna z adnoj i toj ža nahi. A pienalci našy chłopcy zazvyčaj prabivajuć, pastaviŭšy miač nipielem napierad. Praŭda, hetak ža siabie pavodzić pieravažnaja bolšaść futbalistaŭ śvietu. Tamu niazholenaja barada ci manietka ŭ hietrach naŭrad ci stanuć važkim pieramožnym faktaram na futbolnym poli.
Tenisist Maksim Mirny nie spažyvaje za dzień da matča miasa — kab lahčej ruchacca na korcie.
Čempijonka śvietu ŭ płavańni Alaksandra Hierasimienia pahadžajecca, što admaŭlacca ad luboščaŭ pierad startam ci nie spažyvać niejkich praduktaŭ — narmalna.
Alaksandra Hierasimienia: «Heta abjektyŭnyja pryčyny, a nie prusaki ŭ hałavie. Niechta hetych praviłaŭ prytrymlivajecca, niechta nie. Tamu tak i pavinna być».
A voś što da zababonaŭ, to Alaksandra vyrašyła dla siabie, što vieryć u ich nie varta.
Alaksandra Hierasimienia: «Ja liču, što heta niapravilna i hetaha nie pavinna być, kab ni ad čaho nie zaležać».
