Na praviadzieńnie «Słavianskaha bazara» vydzielena 30 młrd rubloŭ 5

Na arhanizacyju i praviadzieńnie XXI Mižnarodnaha fiestyvalu mastactvaŭ «Słavianski bazar u Viciebsku», jaki projdzie z 12 pa 18 lipienia, vydzielena 30 młrd. biełaruskich rubloŭ.

Pra heta 28 červienia na pres-kanfierencyi ŭ Minsku paviedamiŭ pieršy namieśnik ministra kultury Biełarusi Uładzimir Karačeŭski.

Pavodle jaho słoŭ, finansavańnie fiestyvalu ažyćciaŭlajecca z roznych krynic, u tym liku za košt biudžetu Sajuznaj dziaržavy Biełarusi i Rasii, biudžetu Ministerstva kultury Biełarusi, reziervovaha fondu prezidenta Biełarusi, sponsarskich srodkaŭ. Za biudžetnyja srodki apłačvajecca prykładna pałova raschodaŭ na arhanizacyju fiestyvalu.

Jak paviedamiŭ žurnalistam kiraŭnik pradstaŭnictva Pastajannaha kamiteta Sajuznaj dziaržavy ŭ Minsku Siarhiej Zabałociec, pryblizna adna piataja častka sumy pastupaje ź biudžetu Sajuznaj dziaržavy.

Sioleta SD vydzieliła na fiestyval prykładna 25 młn. rasijskich rubloŭ, pryčym 9,3 młn. rubloŭ pastupiła z rasijskaha biudžetu, a jašče 15,6 młn. — ź biełaruskaha, skazaŭ jon.

Pavodle słoŭ Zabałotca, u 1998–2011 hadach na praviadzieńnie «Słavianskaha bazaru» ź biudžetu SD było vydzielena amal 305 młn. rasijskich rubloŭ.

Pry hetym, jak adznačyŭ Uładzimir Karačeŭski, arhanizatary starajucca rabić fiestyval «maksimalna akupnym».

Pavodle infarmacyi namieśnika ministra, na fiestyvalnyja kancerty pradadziena 87% biletaŭ, a na hała-kancert 12 lipienia bilety skončylisia jašče dva tydni tamu. Karačeŭski adznačyŭ, što sioleta bilety dobra pradajucca praź internet. Akramia taho, pajezdki na «Słavianski bazar» aktyŭna arhanizujuć turahienctvy, tamu na viciebski fiestyval sioleta pryjeduć vialikija hrupy turystaŭ z roznych haradoŭ i krain, padkreśliŭ Karačeŭski.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH