Dniami z domu № 13 pa vulicy Ramanaŭskaja Słabada, što na rahu z vulicaj Suchoj źnikła jašče adna pamiatka ab Hałakoście.
Heta była nievialičkaja pamiatnaja šylda, ustalavanaja hramadzkaściu niamieckaha Bremenu jašče 17 hadoŭ tamu. Na joj byŭ nadpis, jaki paviedamlaŭ pra toje, što nacystami ŭ Miensku byli zabityja bremienskija hebrai. Hetaja trahiedyja adbyłasia akurat 65 hadoŭ tamu… Da hetaje žałobnaje daty byŭ prytarnavany mitynh 2 sakavika na staražytnych habrejskich mohiłkach, da jakich i viadzie vulica Suchaja. Tam habrejskuju hramadu j haścioŭ biełaruskaje stalicy čakała niepryjemnaja niespadzieŭka… Vandały paškodzili manument na mohiłkach, ustalavany hetaksama na ŭspamin pra habrejaŭ ź Niamieččyny, jakija znajšli ŭ hetaj ziamli svoj viečny spačyn. Była abłamanaja metaličnaja tablica z tekstam, paškodžany kamień.
Takija vypadki stali ŭ Biełarusi zvyčajnaj spravaju. Ale hetym razam cynizm vandałaŭ uražvaje. Rajon vulicaŭ Suchoj, Karala j Kalektarnaj byli reštkami mienskaha hieta. Siudy ž byli departavanyja habrei z Bremenu, Hamburhu, Dziuseldorfu. U 1942 h. ich usich sotniami zabivali na hetych samych mohiłkach. Peŭna da hetaje hadaviny j była prytarnavanaja ciapierašniaja złačynnaja akcyja pa apahańvańni pamiaci achviaraŭ Hałakostu…
U pierastrojku kamunisty dazvolili niemcam ušanavać pamiać pra svaich ziemlakoŭ‑habrejaŭ mienavita hetaj ścipłaju memaryjalnaj tabličkaju na domie, dzie mieścicca dasiońnia chlebnaja krama. Ciapier i jaje niama. Miarkujučy pa analahičnych złačynnych vychadkach i hetaja zastaniecca biespakaranaju.
