Anansavanaje na siońnia padpisańnie ŭ Maskvie vialikaj handlovaj damovy miž Biełaruśsiu i Rasiejaj sarvałasia. Rasiejskija ŭradoŭcy kažuć, što Miensk prapanavaŭ šerah istotnych papravak da parafiravanaha ŭžo dakumentu. Ciapier nad im znoŭ musiać marakavać eksperty.
Karaciej, rana pacirali ruki prahnyja imperyjalisty:), damohšysia na tle naftahazavaj vajny pakietnych damoŭlenaściaŭ. Zaraz tyja pakiety razłaziacca pa švoch.
Nahadaju: adnosna łahodnyja ceny na haz byli źviazany z prodažam Maskvie pałovy "Biełtranshazu". A naftu dali z umovaj, što Miensk šyrej adčynić svoj rynak dla rasiejskich tavaraŭ.
Ciapier Maskva bje ŭ zvany: maŭlaŭ, biełaruski ŭrad choča zrabić "Biełtranshaz" nierentabielnym, skasavaŭšy nadbaŭku, ź jakoj paliva pradajecca ŭnutranym spažyŭcam. A zaraz voś, jak bačym, rasiejcy atrymali jašče adzin siurpryz u vyhladzie niečakanych karektyvaŭ u handlovuju damovu.
Rychtavalisia ž siońnia ŭračysta padpisać papieru ŭ viedamstvie Hrefa. Ale dla Miensku ŭžo ci Href ci dva...
Rasiejskija ŭradoŭcy naiŭna ćvierdziać, što kreślić parafiravany dakument (jaki, darečy, mielisia padpisać jašče da 1 sakavika) — heta niapravilna. Dla biełaruskaha ž boku "adkrutka nazad" — metoda zvykłaja. Tady, u śniežni — studzieni, hałoŭnaje było lubym koštam damahčysia, kab pajšli haz dy nafta. Padmachnuli ŭsie papiery, supakoili partneraŭ, kab nie kipieli nadta. A voś zaraz, kali pierazimavali — našto, chłopcy, hnać koniej? Davajcie raźbiaremsia spakojna, što tam pad haračuju ruku panapadpisvali...
Jakaja zvyšzadača hetych maneŭraŭ? — spytaŭsia ja ŭ ekanamista Jarasłava Ramančuka. Toj kaža: Miensk zaciahvaje čas, bo tut razumiejuć, što naša pradukcyja nia vytrymaje adkrytaj kankurencyi z rasiejskim tavaram.
Sapraŭdy, tam u ich ŭsio ž jaki-nijaki rynak. Mocny pryvatny sektar. Nia kažučy ŭžo pra nieparaŭnalny investycyjny, finansavy resurs. Karaciej, zadušać svajoj tavarnaj ekspansijaj.
Z adnaho boku, u našaha ŭradu nibyta i vybaru niama — tolki ciahnuć ryzinu z henym pahadnieńniem pad luboj markaj, staracca choć u niečym vyhadać. Inačaj, sa słoŭ Ramančuka, ekanomika atrymaje ŭdar, macniejšy za padvyšeńnie koštaŭ na enerhanośbity.
Ale ž zrazumieła, što hetaja taktyka nie vyrašaje prablemy. U Maskvy šmat vaharoŭ, kab dacisnuć. Voś zaraz, , naprykład, vyrašajecca los kredytu na paŭtara miljardy. Skažuć: ražna vam, a nie kredyt!..
Dyj uvohule bieśpierspektyŭna vieści kurs na ekanamičnuju izalacyju. Jak ni chočacca zakanservavać "biełaruski cud", a vonkavyja imperatyvy ŭsio adno zmušajuć da pačatku haspadarčych reformaŭ.
My žyviem z handlu. Kali nie madernizavać ekanamičnuju madel, nie pierajści na praviły suśvietnaha rynku — zatavarymsia svaimi "Atlantami" dy "Haryzontami" vyšej za dach.
