15 sakavika
U Horadni zabaranili mitynh da hadaviny 19 sakavika
Haradzienskija ŭłady admovili abłasnoj arhanizacyi AHP u praviadzieńni mitynhu 19 sakavika. U adkazie harvykankamu zaznačajecca, što zajaŭniki akcyi nia zdolnyja «zabiaśpiečyć arhanizacyju mierapryjemstva i biaśpieku hramadzianaŭ».
Skrabiec nievyjazny
Byłomu deputatu Siarhieju Skrabcu admovilisia pastavić dazvolny štamp u pašparcie. Pra heta jamu paviedamili vusna, nie nazvaŭšy pryčyny admovy. Da ŭsiaho ŭ Skrabca apisali majomaść dziela pahašeńnia zapazyčanaści pierad «Biełarusbankam». Pavodle prysudu Viarchoŭnaha sudu, S.Skrabiec musić vypłacić paŭtara miljarda rub. (kala 700 tys. dalaraŭ), jakija nibyta vymaniŭ u dziaržavy ŭ toj čas, kali byŭ deputatam.
Sajuz levych partyj skardzicca na Miniust
Sajuz levych partyj (SŁP) padaŭ u Viarchoŭny sud Biełarusi skarhu ŭ suviazi z admovaj Ministerstva justycyi zarehistravać arhanizacyju.
Fašysty apahanili
U Viciebsku zakidali butelkami z čornaj farbaj budynak konsulstva Łatvii. Pa słovach aktyvistaŭ niezarehistravanaj rasiejskaj Nacyjanał‑balšavickaj partyi (NBP), hetak jany pratestavali suprać pierahladu Łatvijaj i Estonijaj vynikaŭ druhoj suśvietnaj vajny.
16 sakavika
Viarchoŭny sud admoviŭsia
Viarchoŭny sud Biełarusi pakinuŭ biez uvahi rašeńnie Rady AAN pa pravach čałavieka ab adnaŭleńni dziejnaści ŭ Homieli hramadzkaha abjadnańnia «Hramadzianskija inicyjatyvy». Likvidavaŭšy «Hramadzianskija inicyjatyvy», ličać siabry Rady pa pravach čałavieka AAN, biełaruskija ŭłady parušyli art. 22 Pakta ab hramadzianskich i palityčnych pravach (prava na svabodu asacyjacyj).
U Mahilovie, Babrujsku, Połacku, Salihorsku, Navałukomli, Dziaržynsku, Miensku adznačyli Dzień salidarnaści
U Mahilovie Dzień salidarnaści adznačyli zapalvańniem tradycyjnych śviečak pamiaci. Aktyvisty moładzievych arhanizacyjaŭ z zapalenymi śviečkami prajšli centralnymi vulicami horadu, a taksama da budynku Mahiloŭskaha harvykankamu. U Babrujsku aktyvisty Sacyjał‑demakratyčnaj partyi (Hramada) praviali akcyju la kaplicy pierad Mienskimi mohiłkami. Pryblizna praz hadzinu padjechali milicyjanty, jakija vymusili aktyvistaŭ spynić akcyju. Połackija «maładafrontaŭcy» stajali z zapalenymi śviečkami ŭ rukach la pomnika Skarynu. Ahułam u akcyi brali ŭdzieł vosiem čałaviek i doŭžyłasia jana 15 chvilin. U Novałukomli ŭ akcyjach Salidarnasci prymali ŭdzieł 20 čałaviek – aktyvisty kampanii «Za Svabodu» i niezarehistravanaha «Maładoha Frontu». U Salihorsk u hety dzień tradycyjna prybyli bajcy specnazu i aŭtazak. Moładź vyrašyła źmianić farmat akcyi, kab vyklučyć aryšty aktyvistaŭ napiaredadni Dnia Voli: zamiest vychadu na płošču zapalili śviečy salidarnaści la budynka haradzkoha Sudu. U Miensku Akcyi Salidarnaści adbylisia na praspekcie Skaryny (Niezaležnaści), płoščy Pieramohi, kala chrama śviatoha Jazepa pa vulicy Kiryły i Miafoda. Na vulicy Niamiha byŭ zładžany niezvyčajny perfomans: nieviadomyja ludzi, padobnyja da pradstaŭnikoŭ biełaruskich śpiecsłužbaŭ i milicyi, pabudavali tam minijaturnuju kletku‑turmu z krataŭ, u jakuju zhaniali «aryštantaŭ» ź niedazvolenaj symbolikaj. Paźniej kala turmy źjaviłasia dziaŭčyna z šyldaj «Svaboda», jakaja vyzvaliła aryštavanych.
U Baranavičach stychijny mitynh
Drobnyja pradprymalniki baranavickaha rynku sabralisia nasuprać budynku administracyi rynku j padatkavaj inspekcyi na stychijny mitynh. Jany patrabavali admianić prezydencki ukaz №760, pavodle jakoha indyvidualnym pradprymalnikam zabaroniena najmać na pracu niesvajakoŭ. Supracoŭniki milicyi prapanavali abrać ź liku mitynhoŭcaŭ delehataŭ i nakiravać ich na pieramovy ŭ administracyju rynku j padatkavuju inspekcyju. Pradprymalniki ŭ adkaz vykłali svaje patrabavańni piśmova i paabiacali najbližejšym časam znoŭ pravieści mitynh.
19 sakavika
Strajk na mienskim «Termaplaście»
Pavodle nieaficyjnaj infarmacyi, ad 8‑j ranicy na mienskim zavodzie «Termaplast» adbyŭsia stychijny strajk rabočych. Ludzi pratestavali suprać zatrymki zarobkaŭ i ich małoha pamieru. U pryjomaj dyrektara «Termaplastu» kazali, što ničoha pra heta nia viedajuć, astatnija telefony zavodu nie adkazvali.
60 haradoŭ śvietu patrabavali svabody dla biełarusaŭ
U 60 haradach Eŭropy, ZŠA i Kanady adbylisia akcyi pad devizam «Dajcie hołas narodu Biełarusi». Moładzievyja aktyvisty ŭ noč na 19 sakavika zakleili roty pomnikam, ustalavanym u haradach hetych krainaŭ. Ładziła akcyju moładzievaja arhanizacyja JEF (Jeunesse Europeene Federaliste/Maładyja Eŭrapiejskija Federalisty). Akcyja była praviedzienaja ŭ ramkach «tydniu salidarnaści ź Biełaruśsiu», jakaja praciahniecca da 25 sakavika.
Zatrymańni junakoŭ
Supracoŭniki milicyi źniali ź ciahnika aktyvista niezarehistravanaj arhanizacyi «Małady front» Ivana Šyłu, jaki jechaŭ z Salihorsku ŭ Miensk 19 sakavika. Potym 16‑hadovaha chłopca advieźli na dopyt u KDB, na jaki nie puścili jaho baćku. U Horadni byŭ zatrymany Andruś Famin – student 4 kursu medyčnaha ŭniversytetu. Paźniej jon byŭ asudžany na 7 sutak aryštu za «niecenzurnuju łajanku».
Kataliki malilisia za kaścioł
19 cakavika spoŭniłasia roŭna dva hady, jak kataliki štodnia molacca la ścienaŭ manastyrskaha kompleksu śviatoha Jazepa ŭ Miensku za viartańnie chramu. U 18.15 adbyŭsia vialiki malebien za viartańnie chramu katalikam.
«Mižnarodnaja amnistyja» padtrymlivaje Daškieviča
19‑21 sakavika niamieckaje pradstaŭnictva pravaabaronnaj arhanizacyi «Mižnarodnaja amnistyja» ładzić akcyju «1 cent u abaronu pravoŭ čałavieka» u padtrymku lidera niezarehistravanaha «Maładoha frontu» Źmitra Daškieviča. Udzielnikam akcyi prapanujecca pierakazać na adzin z bankaŭskich rachunkaŭ biełaruskaj ambasady ŭ Niamieččynie 1 cent z paznakaj «Svabodu Daškieviču!».
U Harodni na 10 sutak
19 sakavika sud Leninskaha rajonu Harodni zasudziŭ na 10 sutak aryštu Ihara Bancara — siabra Sajuzu palakaŭ. Sudździa Natalla Kozieł pavieryła pakazańniam śviedkaŭ‑milicyjantaŭ. Bancara zatrymaŭ 18 sakavika major milicyi Piotr Leniec a druhoj pałovie dnia ŭ centry horadu. Bancara prymusova dastavili ŭ RUUS Leninskaha rajonu, dzie skłali pratakoł ab administracyjnym pravaparušeńni i pakinuli nanač u izalatary časovaha ŭtrymańnia. Na nastupny dzień sud pakaraŭ žurnalista 10‑ci sutačnym aryštam nibyta za «brydkasłoŭje».
