Na «Tytaniku» byli i pasažyry ź Biełarusi 6

10 krasavika 1912 hoda, u Saŭthiemptanie 24-hadovaja Ženia Drobkina z Mahilova ŭvajšła ŭ kajutu treciaha kłasu samaha vialikaha ŭ toj momant akijanskaha transatłantyčnaha łajniera.

Napieradzie było tydniovaje padarožža da Ńju-Jorku, dzie čakała novaje žyćcio. Budučaje žyćcio jaje sapraŭdy budzie adroźnivacca ad papiaredniaha — praz hod jana pabiarecca šlubam z Maksam Matlinym, narodzić čatyroch synoŭ i pamre ŭ 1951 hodzie ŭ Ńju-Jorku. Ale ŭ historyju jana ŭvojdzie jak pasažyrka «Tytanika» — razam ź inšymi 2223 pasažyrami i čalcami ekipaža karabla, jakim daviałosia patrapić u samuju znakamituju marskuju katastrofu.

Drobkina płyła ŭ trecim kłasie — mienavita pasažyry treciaj kłasy, jak śviedčyć statystyka, mieli mienš za ŭsio šancaŭ uratavacca: z 710 vyžyli tolki 174.

Ženia Drobkina była nie adzinaj pasažyrkaj «Tytanika» ź ciapierašniaj Biełarusi (jakaja tady była ŭklučanaja ŭ skład Rasiejskaj imperyi) —

u śpisie pasažyraŭ znachodziacca i suženstva Maryjam i Sinaj Kantary ź Viciebska. Aboje zahinuli —

u liku 1513 čałaviek, jakija patanuli ŭ tuju noč. Jany płyli druhim kłasam.

Byŭ i pieršy kłas — tam płyli ŭ tym liku i suśvietnyja znakamitaści, u tym liku amierykanski biznesoviec Bienžamin Huhienchajm ci Isidor Straŭs i jahonaja žonka Ida — saŭładalniki ńju-jorkskaj hihanckaj kramy «Mejsis». Uvohule,

«Tytanik» nazyvali karablom miljanieraŭ,

bo pavodle raskošy azdableńnia sałonaŭ dla bahataj publiki ź im nie moh paraŭnacca nijaki inšy karabiel.

Pierad svaim pieršym (i apošnim) rejsam «Tytanik» byŭ šyroka razrekłamavany jak niepataplalny karabiel — siarod inšaha, niepataplalnaść pavinna była harantavać izalavanaść adsiekaŭ. Ale

ajśbierh, jaki niečakana vypłyŭ pa pravym borcie, hetak raździor abšyŭku karabla, što piać adsiekaŭ pačali zapaŭniacca vadoj.

Hiermietyzacyja była parušanaja.

Karabiel patanaŭ niekalki hadzinaŭ, i chacia potym narakali na pavodziny niekatorych mužčynaŭ, jakija rasšturchoŭvali natoŭp, kab uratavacca, ale statystyka niaŭmolnaja:

u pracentnych adnosinach žančyn uratavałasia bolš, čym mužčynaŭ.

Tłumačycca heta ŭ tym liku i tym, što spačatku ekipaž prapuskaŭ u vyratavalnyja šlupy mužčynaŭ tolki ŭ kolkaści, nieabchodnaj dla taho, kab zaniać miescy vieślaroŭ.

… Apošniaja pasažyrka «Tytanika» pamierła ŭ červieni 2009 hoda ŭ vieku 97 hadoŭ.

Popieł Milviny Dyn raskidali kala Saŭthiemptana, porta, dzie baćki ŭnieśli jaje, tady dvuchmiesiačnuju, na bort karabla, jakomu było nakanavana stać lehiendaj. Sumnaj lehiendaj.

Radyjo «Svaboda»

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH