U Minsku Hulańni supali z zalevaj i sabrali mienš pratestoŭcaŭ, čym tydzień nazad.
Vidavočcy adznačajuć, što siońnia milicyja pavodziła siabie bolš žorstka, čym padčas papiarednich akcyj. Šmat zatrymanych znachodzicca ŭ RUUS Savieckaha rajona.
Ludziej vyjšła mieniej, čym papiarednija razy. Mahčyma, praz doždž. Mahčyma, praz zładžanaje dziejańnie milicyi. Ułady pajšli na praviadzieńnie kancerta na Kastryčnickaj, kab nie dapuścić tudy ludziej.
Najbolšy hurt demanstrantaŭ — kala 500 čałaviek — prajšoŭ praśpiektam Pieramožcaŭ da haścinicy «Jubilejnaja».
20:37
Pačatak «narodnych hulańniaŭ» na Kastryčnickaj płoščy. Vyhlad z aŭtobusa № 100:
Milicyja ŭ štackim vyciaśniaje ŭdzielnikaŭ akcyi z Kastryčnickaj płoščy ŭniz pa praśpiekcie Niezaležnaści da pierakryžavańnia z vulicaj Janki Kupały:
Adna z hrupaŭ udzielnikaŭ akcyi kročyć pa vulicy Janki Kupały ŭ bok Opiernaha teatru:
Zatrymanyja ŭ milicejskim «Uaziku» i sproba zatrymańnia videaapieratara.
Na 1 chvilinie 50 siekundzie videa — momant žorstkaha zatrymańnia žančyny, imiem Alena. Proźvišča svajo nie nazvała, maci dvuch maleńkich dziaciej. Jaje schapili i zaciahnuli ŭ milicejski aŭtobus, kinuli na padłohu, ale paśla vypchnuli ź jaho na vulicu.
20:17
20:12
Milicyja zdoleła raśsiekčy ludziej na Niamizie. Ciapier tam užo amal nikoha nie zastajecca. Siłaviki taksama pacichu sychodziać.
20:08
Zatrymanych advoziać u pastarunak milicyi Savieckaha RUUS.
Niemałaja kolkaść ludziej ciapier znachodziacca la Pałaca sportu na Niamizie. Viadoma, što zatrymana minimum 10 čałaviek.
19:57
Viadomyja imiony pieršych zatrymanych: Alaksiej Pratasienka, Lena Siemskaja, Dzianis Navicki, Vadzim Kaziniec, Maksim Saryčaŭ, Mikita Litvinčyk, Anton Čarviakoŭski, Kanstancin Salkoŭ, Valery Tumielevič, Kaciaryna Ludvih, Palina Kurjanovič, Jarasłaŭ Barkoŭski, Kanstancin Silipaŭ, Vital Strelčyk.
Milicyja ŭžo razyšłasia.
19:49
Na STV žyvoje ŭklučeńnie z dyskateki na Kastryčnickaj. Studenty i školniki kažuć, što cudoŭnaje śviata i im vielmi padabajecca.
19:46
Kala pomnika Maksimu Bahdanoviču stajać dva vialiki aŭtobusy, dva mikraaŭtobusy, a taksama dva UAZiki. Ludziej pa adnamu pryvodziać i sadžajuć u mašyny. Viadoma, što zatrymany Uładzisłaŭ Hrabavy, a taksama niejki hramadzianin Estonii.
19:41
U videapieratara BiełaPAN Vasila Siamaški raśsiečanaje bryvo.
Ciapier astatak ludziej sprabujuć vycisnuć u bok praśpiekta Mašerava (byłoj vulicy Varvašeni). U milicejskich racyjach hučyć zaklik pracavać apieratyŭna.
Praciahvajucca kropkavyja zatrymańni. Škło aŭtobusa zaciamnionaje, tamu ciažka acanić kolkaść zatrymanych. Viadoma, što zatrymany fotakarespandent «Biełhaziety» Vadzim Zamiroŭski.
19:36
Siarod ludziej, što stajać u skviery la Opiery — amierykanski dypłamat Krystafier Panika, mastak Aleś Šaternik. Ludzi trochu razhublenyja, nie viedajuć, jak dziejničać dalej.
19:33
AMAPaŭcy błakavali pierachod ad vulicy Bahdanoviča da Niamihi, nikoha tudy nie puskajuć. Častka ludziej zastajecca błakavanaj u skviery la opiery.
Aŭtobus pierapoŭnieny zatrymanymi. Padjechaŭ taksama mikraaŭtobus i UAZik.
19:29
Ludziej praciahvajuć vyciaśniać z vulicy Janki Kupały. Pieryjadyčna da demanstrantaŭ padjazdžaje milicejski aŭtobus, kudy zašturchoŭvajuć zatrymanych.
19:24
Možna acanić, što ŭ akcyi ŭdzielničali sotni čałaviek. Na ciapierašni momant u joj biare ŭdzieł jašče paru sotniaŭ maładych ludziej.
Ludziej praciahvajuć zatrymlivać, ale ciapier užo nie masava, a bolš kropkava.
19:22
Padahnali da vystavačnaha kompleksu «Biełekspa» milicejski aŭtobus. Ludziej zatrymlivajuć masava. Možna kazać, što ŭžo dziesiatki zatrymanych.
19:18
Zatrymana minimum šeść čałaviek.
19:12
Milicejski aŭtobus padahnali da skryžavańnia praśpiekta Niezaležnaści i vulicy Janki Kupały. Naš karespandent bačyŭ, što zatrymali, prynamsi, dvuch udzielnikaŭ akcyi. Ludzi ciapier iduć pa vulicy Janki Kupały.
La Pałaca vieteranaŭ prykładna sto čałaviek, plaskajuć u ładki, radujucca žyćciu.
19:08
U šeści ŭdzielničaje paru sotniaŭ čałaviek. Ludzi ŭ cyvilnym iduć za imi, utvaryŭšy łancuh. Pavodziać siabie vielmi ahresiŭna, šturchajucca, iduć chutkim krokam. Prosta sprabujuć vycisnuć padalej z Płoščy. Jość pieršy zatrymany.
19:05
Moładź idzie ŭbok cyrka. Da ich ad Muzieja vialikaj ajčynnaj vajny padbiehła hrupa ludziej u cyvilnym. Iduć pobač, ale nikoha nie zatrymlivajuć.
Z pastarunka adpuścili taksama i Uładzia Hrydzina.
19:00
Hrupa moładzi (čałaviek 50) idzie ŭzdoŭž praśpiekta i chłopaje. Milicyja papiaredžvaje, kab nie stvarali natoŭp, chutčej prachodzili. Niekatoryja mašyny, što prazdžajuć pa praśpiekcie, vitalna sihnalać hetym chłopcam i dziaŭčatam.
Na kancercie blizu dvuch tysiač čałaviek. Nie čuvać, kab jany chłopali vykanaŭcam.
18:58
Čałaviek piatnaccać na piatačku na skryžavańni praśpiekta Niezaležnaści z vulicaj Enhielsa paru siekund sprabavali paapładziravać. Paśla čaho chucieńka razyšlisia.
Vypuścili žurnalista NN Alesia Pileckaha.
18:47
Na Kastryčnickaj znoŭ pajšoŭ doždž. Milicyja papiaredžvaje ludziej la «Centralnaha», kab nie źbiralisia hrupami. U padziemnym pierachodzie na stancyi mietro «Kastryčnickaja» milicyja staić ź miehafonam. Praŭda, jašče nie vykarystoŭvała jaho.
18:42
Zatrymany taksama fotakarespandent Uładź Hrydzin. Jon znachodzicca ŭ pastarunku milicyi Centralnaha rajona.
18:38
Na samoj Płoščy stajać praduktovyja namioty. Praŭda, piva nie pradajuć. Tolki limanady i sok. Moładź padciahvajecca na dyskateku z roznych bakoŭ. Vystupaje zaraz Volha Płotnikava. Šmat ściahoŭ «Biełaj Rusi».
18:31
Na Kastryčnickaj pačaŭsia kancert. Vystupaje niejki hurt. Trapić možna tolki paśla taho, jak projdzieš mietałašukalnik. Ale puskajuć biez prablem. Ciapier na Płoščy šmat dziaržaŭnych ściahoŭ. Napeŭna, na Płoščy ciapier para socien čałaviek.
Niekatoryja ludzi stajać na hanku Pałaca prafsajuzaŭ. Mahčyma, heta tyja, što pryjšli na akcyju.
18:08
Milicyja pačynaje aktyŭničać. Hladzić za tymi, chto nie sychodzić, «prapanuje» syści (iści ŭ mietro).
Padyšli da karespandenta NN i žorstka papiaredzili, što kali jon praz 5 chvilin nie syjdzie, pa jaho pryjedzie mašyna. Žurnalist praciahvaŭ pieradavać repartaž u redakcyju. Žurnalist admoviŭsia. Da jaho znoŭ padyšli milicyjanty i zatrymali.
Padyšli znoŭ.
Aleś Pilecki zatrymany, zabrali paśviedčańnie.
Adviali ŭ pastarunak nasuprać Nacyjanalnaha muzieja, što na vulicy Lenina, zabrali paśviedčańnie. Praź niekatory čas telefon jaho adklučyŭsia.
17:57
Iznoŭ pajšoŭ doždž. Hrukoča navalnica. Na Płoščy hraje muzyka, ale što za muzyka razabrać niemahčyma. Na hanku Pałacu Respubliki trucca niejkija ludzi. Praz mocny doždž razabrać što za ludzi taksama niemahčyma.
17:53
Nad Kastryčnickaj doždž amal skončyŭsia, tolki šuhajuć i zyrkajuć małanki.
Na Płoščy niama nijakaha ruchu, i naohuł narodu. Tolki bliščyć i pieralivajecca vialiki płaźmienny ekran. Naturalna, što nijakaj BRSMaŭskaj dyskateki taksama niama.
17:36
Nad Kastryčnickaj lije niby ź viadra. Dadajecca mocny viecier, jaki prosta honić patoki vady pa asfalcie. Ściamnieła niby paśla
Ludzi stajać kala pierachodaŭ u mietro. A voś asoby ŭ čornym panyła moknuć na Płoščy.
17:11
U dvarach za univiersamam «Centralny» stajać aŭtobusy i aŭtazaki sa śpiecnazam. Za Pałacam Respubliki — taksama niekalki aŭtobusaŭ i aŭtazakaŭ sa śpiecnazam.
Płošča Svaboda taksama aharodžana turnikietami, na jaje nie puskajuć.
Na Kastryčnickaj usio ŭsiejana milicyjaj, litaralna čorna ad jaje. Nad Płoščaj sabralisia čornyja chmary. Pajšoŭ mocny doždž. Navalnica. Papiarednija akcyi pa sieradach prachodzili ŭ dobraje soniečnaje nadvorje
17:08
Na Kastryčnickaj vystaŭlenyja turnikiety, płošča padzielena na siektary. Kala Pałaca Respubliki pastaŭlena scena, a pa samoj Płoščy chodziać ludzi ŭ vajskovaj formie z sabakami (aŭčarki) i mietałašukalnikami. Šmat śpiecnazaŭcaŭ.
Pryvieźli hukaŭzmacnialnuju aparaturu i vializny płaźmienny ekran. Tut siońnia ŭłady ŭ piku «maŭklivaj revalucyi» źbirajucca zładzić dyskateku, kab pieraškodzić udzielnikam akcyi.
Z boku vulicy Enhielsa pastaŭlenyja dva vialikija namioty ź pivam. Staić hruzavik BT.
Na Płošču nikoha nie puskajuć.
***
U dziasiatkach biełaruskich haradoŭ ludzi pa sieradach vychodziać na centralnyja płoščy kožnuju sieradu, a19-j i prosta hulajuć. Ludzi patrabujuć palityčnych i ekanamičnych pieramienaŭ.
Ideja takoj niezvyčajnaj formy pratestu naradziłasia ŭ sacyjalnych sietkach. Kali niechta vychodzić z łozunhami, jaho adrazu ž chapajuć. Tamu internaŭty prydumali: prosta vychodzić i hulać.
Pieršyja akcyi ŚMI, u tym liku i «Naša Niva», navat nie zaŭvažyli. Zakliki na ich raspaŭsiudžvalisia tolki ŭ sacyjalnych sietkach, a vychodziła na płoščy para dziasiatkaŭ ludziej.
Adnak ideja spadabałasia svajoj prostaściu. I 15 červienia ŭ centr Minska vysypała stolki ludziej, što napałochanyja ŭłady zakryli dla vychadu stancyi mietro «Kupałaŭskaja» i «Kastryčnickaja» i zabłakavali turnikietami płoščy Kastryčnickuju i Svabody. Usio marna: ludzi mirna viesialilisia na tratuarach.
22 červienia vyjšła jašče bolej ludziej — niekalki tysiač.
Bolš za dźvieści byli zatrymanyja (33 čałavieki potym aštrafavanyja), pa ŭsioj Biełarusi byli zatrymanyja bolš za 400 čałaviek. Byli taksama zatrymanyja dzieviać žurnalistaŭ.
***
«Družyńniki z moładzievych atradaŭ achovy pravaparadku mahčyma, buduć rabić u centry horada pravakacyi. Ich zadačaj budzie pravakavać ludziej na kanflikty i bojki.Tak ułada choča pakazać, što na akcyju pryjduć nieadekvatnyja ludzi z daloka nie mirnymi metami».
Pra heta havorycca ŭ śpiecyjalnym zvarocie supołki «Revalucyja praz sacyjalnyja sietki», raspaŭsiudžanym 29 červienia.
Supołka źviartajecca da moładzi i družyńnikaŭ
«nie paddavacca na pravakacyi, nie stvarać siarod ludziej, jakija hulajuć u centry horada kanfliktaŭ, a naadvarot praduchilać usie mahčymyja kanflikty pamiž hramadzianami i supracoŭnikami pravaachoŭnych orhanaŭ».
My zaklikajem ludziej uvieś čas być napahatovie i ihnaravać lubyja ahresiŭnyja vypady z boku pravakataraŭ!
Pamiatajecie — naša siła pierad abliččam niebiaśpieki — u abjadnańni pamiž saboj. Siła ludziej — u ich arhanizavanaści, zhurtavanaści i salidarnaści»,- havorycca ŭ zvarocie.
