Namieśnik hienieralnaha prakurora Biełarusi M.Kuklis vynies «Našaj Nivie» papiaredžańnie za publikacyju ŭ №14 artykuła «Pałkoŭnik Baradač: vybuchoŭku padkłali supracoŭniki adnoj sa śpiecsłužb».Były pałkoŭnik vajskovaha śpiecnaza vykazvaŭ u im svajo mierkavańnie ab tym, što za teraktam moh stajać chtości va ŭładzie, zacikaŭleny ŭ destabilizacyi abstanoŭki ŭ krainie.
Na dumku prakuratury, takoje mierkavańnie nieabhruntavanaje. «Artykuł utrymlivaje... paklopnickija vydumki pra dziejańni pravaachoŭnych orhanaŭ», miarkuje prakuror. U artykule prakuratura pabačyła dziejańni, «nakiravanyja na dyskredytacyju biełaruskaj dziaržavy». Infarmacyju ŭ artykule prakuratura razhladaje jak «niedastaviernuju».
Papiaredžańnie moža być abskardžana ŭ zakonnym paradku.
Pradstaŭnik prakuratury pryvioz papiaredžańnie ŭ Redakcyju 19 krasavika. Jahonaja hutarka z redaktaram prajšła ŭ karektnaj atmaśfiery.
Nahadajem, što dniom raniej, 18 krasavika hałoŭnaha redaktara haziety «Naša Niva» vyklikali ŭ KDB i papiaredzili ab adkaznaści za razhałošvańnie materyjałaŭ śledstva pa spravie ab terakcie 11 krasavika.
Za apošnija čatyry miesiacy heta była ŭžo siomaja sustreča «Našaj Nivy» z KDB — da hetaha prajšli čatyry vobšuki, vymańnie techniki, adzin dopyt i adno naviedvańnie dla vymańnia fota- i videamateryjałaŭ. Ciažka ŭjavić sabie, kab u takim režymie pracavała niejkaje vydańnie ŭ luboj inšaj jeŭrapiejskaj krainie.
Papiarednija vykliki pieravažna byli ŭ ramkach rasśledavańnia palityčna matyvavanaj spravy ab Płoščy.
Adnačasova Ministerstva infarmacyi nakiravała ŭ adras redakcyi papiaredžańnie ab niedapuščalnaści parušeńnia normaŭ zakona «Ab srodkach masavaj infarmacyi», paviedamlaje BIEŁTA.Sama Redakcyja jaho jašče nie atrymała.
«Naša Niva» zabiaśpiečyła adno z samych poŭnych aśviatleńniaŭ padziej 19 śniežnia i 11 krasavika. Taksama «Naša Niva» vyčarpalna aśviatlaje situacyju na finansavym rynku Biełarusi.
