U vośmy raz lepšyja biełaruskija hitarysty źbiarucca na scenie DK Mienskaha Traktarnaha Zavodu - 2 śniežnia tam adbudziecca 8-my Respublikanski festyval hitarnaj muzyki «Hryfamanija-2006». Štohod dyrektar festyvalu Jury Rašetnikaŭ, jak i inšyja arhanizatary vyklučna z ułasnaha entuzijazmu, zmušana pierakonvaje, što ŭ hetym hodzie «Hryfamanija» budzie apošniaj. «Festyval patrebny ŭ pieršuju čarhu samim muzykantam, jon užo maje i svaju pastajannuju publiku – kali jon zapatrabavany, treba praciahvać!» – kaža Juryj napiaredadni čarhovaha festu. Sioleta ŭ «Hryfamanii» prymuć udzieł vosiem hitarystaŭ – usie biełaruskija. Padrabiaznaści ad dyrektara festyvalu Juryja Rašetnikava admysłova dla čytačoŭ «Tuzina Hitoŭ».
Pieršy festyval lepšych hitarystaŭ adbyŭsia ŭ 1999 hodzie i za hety čas tolki dvojčy źmianiŭ placoŭku: klub «Akvaryjum» na DK MTZ i mały zał Pałacu Respubliki. Sioleta «Hryfamanija» projdzie ŭ tradycyjnaj užo zali DK MTZ.
Kožny hod dyrekcyja, jakaja, ułasna, składajeca z adnaho Juryja, imkniecca padtrymać status mižnarodnaha festyvalu: «U nas vystupaŭ Źmicier Małaletaŭ z Maskvy, u minułym hodzie haściami byli hitarysty z Samary i Symferopala», - raspaviadaje Juryj Rašetnikaŭ. U hetym hodzie da «Hryfamanii» abiacaŭ dajechać vybitny kijeŭski hitaryst Siarhiej Čanturyja: «Litaralna za dzień da vychadu afiš vyśvietliłasia, što Siarhiej vystupaje na festyvali ŭ Łuhansku i da Miensku dabracca nie paśpieje navat samalotam, – kaža Juryj, - tamu sioleta my zastalisia biez zamiežnaha ŭdzielnika, adnak, ja pierakanany, što «Hryfamanija» ad hetaha šmat nia zhubić, bo ŭ biełaruskich melamanaŭ budzie mahčymaść pačuć lepšych našych hitarystaŭ».
Zvyčajna da ŭviadzieńnia novych udzielnikaŭ dyrekcyja festu stavicca aściarožna, ale sioleta skład byŭ abnoŭleny na 60 adsotkaŭ: piać z vaśmi muzykaŭ, što paznačany ŭ afišach – debiutanty. Siarod ich – Iryna Ihnaciuk. «Jaje viedajuć užo pa inšych prajektach i prahramach na televizii, - kaža Jury. Iryna stanie druhoj žančynaj-udzielnicaj «Hryfamanii».. Samyja maładyja ŭdzielniki sioleta – Alaksandar Hryhorjeŭ i Alaksandar Całujka. «Saša Całujka maje 19 hod, - raspaviadaje Juryj, - ale hety małady chłopiec hraje vielmi technična, jon hitaryst kamandy Kiryła Słuki.»
Rok, bluz, džaz, fłamienka - žanry, niehałosna zamacavanyja za «Hryfamanijaj», jak «farmatnyja». Na scenie vośmaha festyvalu vystupiać taksama dobra viadomyja melamanam Uładzimier Uholnik, Andrej Vajciachoŭski, Ihar Pilipienka i Jury Nieściarenka – hitaryst ź Białynič.
Štohod dyrektar i arhanizatar festu Jury Rašetnikaŭ stomlena kaža, što sioleta «Hryfamanija» budzie apošniaj. «Ja ŭžo sam časam śmiajusia sa svaich hetych zajavaŭ, jakija rablu absalutna ščyra, - kaža Juryj. - U hetym hodzie ja ceły miesiac razvažaŭ, rabić fest, ci nie. Ale zorki stali tak, što ja zrazumieŭ - treba praciahvać!» Bolš za toje – Juryj na hety raz nia tolki nie kaža pra «apošniuju» «Hryfamaniju», a navat raspaviadaje pra peŭnyja plany, źviazanyja z tym, što «Hryfamanija» ŭ nastupnym hodzie moža źmianić svoj farmat: «Prablema festyvalu ŭ tym, što ŭ nas niama hrošaj. Kali ŭsio atrymajecca - da nas dałučycca adzin viadomy telekanał, jaki maje salidnyja finansavyja mahčymaści.» U takim vypadku hetamu telekanału, jaki Juryj pakul nie nazyvaje, buduć pieradadzieny ŭsie pravy na praviadzieńnie festyvalu. «Tolki takim čynam my zmožam vyvieści «Hryfamaniju» na inšy jakasny ŭzrovień, - kaža Juryj, - zmožam pakłapacicca i pra azdableńnie sceny, zrabić jakasnyja huk i śviatło, zaprasić narešcie zamiežnuju zorku – nas nia budzie pałochać vysoki hanarar.»
«Festyval patrebny ŭ pieršuju čarhu samim muzykantam, jon užo maje i svaju pastajannuju publiku – kali jon zapatrabavany, treba praciahvać!» – kaža Juryj napiaredadni čarhovaj «Hryfamanii».
Adras: Miensk, vuł. Daŭhabrodzkaja, 24.
Prajezd:
metro da st. «Traktarny zavod».
aŭtobusy: 2, 43, 43d, 84, 106; tramvai 3, 6, 7, 8 da prypynku «Traktarny zavod».
tralejbusy: 36,49 da prypynku «Aleha Kašavoha».
Daviedki: 8017 2302032
