Xlam: Łučšaja biełorusskaja altiernativa
Go-Records, 2006.
Koliś vyjšaŭ dysk pad nazvaj «Alternatyva.by», jaki narabiŭ rozhałasu, bo prezentavaŭ nia tolki tvory ajčynnych muzykaŭ, ale i ceły kulturny płast. Dysk Xlam, vidać, užo prezentuje alternatyvu toj «Alternatyvie.by».
Za apošnija piać hod uzhadavałasia zusim inšaje muzyčnaje plemia, jakoje abrała svaju płyń, estetyku i movu vykanańnia. «Alternatyva» tut paniaćcie zvužanaje: h.zn. muzyčny kirunak, jaki spałučaje ŭ sabie elementy roznych stylaŭ, pieravažna brutalnaha kštałtu (niu-metał, dez-kor, rep-kor dy inšyja muzyčnyja hibrydy). Muzyka ekspresiŭnaja, ahresiŭnaja, splecienaja z nervaŭ i krykaŭ. Emocyja tut važyć kudy bolej za słova. Moža, z hetaj pryčyny movie vykanańnia tut uvahi nadajecca mała.
Tamu siarod dvuch dziasiatkaŭ pradstaŭnikoŭ nibyta «lepšaj biełaruskaj alternatyvy» tolki try piajuć pa-biełarusku. «My dumajem pa-rasiejsku, navošta zajmacca samapadmanam. Pa-biełarusku ja mahu tolki śpieć «Ha...no pčoły, ha...no miod, ha...no dziadźka pčałavod», – niejak ščyra pryznaŭsia vakalist «TT-34». Zrešty, časam za ciažkimi ryfami i niajakasnym zapisam nia prosta zdahadacca, ci ŭžyvajuć piejuny rodnuju movu. Ale ŭ tym i kancepcyja składanki – źmiašać maładych i znanych. Ź pieršych vyłučyć kahości na dysku ciažkavata (chiba Ricoshet i Uspliosk).
Znanyja trymajuć marku – TT-34, Rasta, Tav.Mauzer. Zatoje toj marki nie trymajuć układalniki – dysk povien pamyłak druku. Mahiloŭcy nazvanyja prosta Mauzer, a pieśnia «Zhubicca» hurtu Termin Ch nabyła dzivosnuju nazvu «Zubicca». U asnovie svajoj – biezabličnaja muzyka, cikavaja tym, chto choča addać daninu siońniašniaj muzyčnaj modzie.
