Ja pasprabavaŭ adnavić padziei nočy 19-20 śniežnia, što pryviali da skandalnaj zajavy Ramančuka… Što adbyłosia pamiž pieršaj i piataj hadzinaj 20 śniežnia, mnie tak i nia stała viadoma, pra heta moža raspavieści tolki sam Jarasłaŭ.
belradio.fm
Pačniem z taho, što ŭsim naziralnym ludziam było i tak dastatkova zrazumieła:
zajavu, jakuju Ramančuk čytaje pierad telekamerami dziaržaŭnych telekanałaŭ, jon sam nie pisaŭ.
Mierkavać pra heta možna było ŭžo paśla taho, jak u efiry "Svabody" 20 śniežnia Ramančuk, adkazvajučy na pramoje pytańnie majho kalehi Juryja Drakachrusta "Moža, vas pastavili ŭ sytuacyju, kali vy vymušany byli heta napisać i skazać?", skazaŭ "Nie kamentuju". Jarasłaŭ jak sumlenny čałaviek nie zachacieŭ chłusić, ale i nia moh skazać praŭdy. Tyja, chto bačyŭ hetaje videa, mohuć zaŭvažyć, što Ramančuk litaralna nie padobny da siabie. Jon niezvyčajna bledny, ja b skazaŭ, źmiarćvieła bledny, jon čytaje tekst "pa papiercy", čaho faktyčna nikoli nia robić. Mała taho, jon čytaje z pamyłkami, papraŭlajecca, učytvajučysia ŭ napisanyja nia im radki. U hetym tekście, dzie jon asudžaje dziejańni Rymašeŭskaha, Statkieviča i Sańnikava, Ramančuk pramaŭlaje takija rečy, jakich jon nikoli nie napisaŭ by sam. "Sańnikovu, podohrievajemomu jeho supruhoj Irinoj Chalip" — heta styl kdbešnych "publicystaŭ", a nie Ramančuka.
Ja pasprabavaŭ adnavić padziei toj nočy, što pryviali da hetaj skandalnaj zajavy Ramančuka. Jak viadoma, razam z kamandaj Jarasłaŭ byŭ na Kastryčnickaj płoščy, navat vystupiŭ tam. Ramančuk nia byŭ prychilnikam pachodu na płošču Niezaležnaści, ale, kali ludzi pajšli pa praspekcie, jon, tym nia mienš, dałučyŭsia da šeścia. Na samoj płoščy Ramančuk byŭ u centry padziejaŭ, ale, jak kažuć śviedki, inšyja kandydaty ŭ prezydenty asabliva nie źviartali na jaho ŭvahi.
Prynamsi, jak skazali mnie ludzi, što byli pobač ź im, u adzin momant Ramančuk navat paskardziŭsia, što chacieŭ niešta paraić Rymašeŭskamu, Sańnikavu i Statkieviču, ale jaho pa sutnaści praihnaravali. Potym byŭ razhon, Ramančuk zastavaŭsia na płoščy da kanca padziejaŭ, ale nia byŭ zatrymany. Jon pajšoŭ dadomu i, pavodle ŭskosnych śviedčańniaŭ, dajšoŭ da svajoj kvatery. Prynamsi, kali namieśnik staršyni AHP Leŭ Marholin zvaniŭ Jarasłavu kala pieršaj hadziny nočy, toj skazaŭ, što ź im usio ŭ paradku. Marholin kaža, što Jarasłaŭ u momant hetaj razmovy byŭ u pamiaškańni.
Što adbyłosia pamiž pieršaj i piataj hadzinami nočy 20 śniežnia, my nia možam viedać. Pra heta moža raspavieści tolki sam Jarasłaŭ albo samyja blizkija da jaho ludzi.
Pryznajusia, ja hutaryŭ ź niaviestaj Jarasłava Alesiaj Jemialjanavaj, jakaja paviedamiła niekatoryja abstaviny, padzialiłasia svaimi razvahami, ale na pramoje pytańnie, ci viedaje jana, što adbyłosia tady ŭnačy, nia stała adkazvać.
Jak by tam ni było, a piataj hadzinie Ramančuk dasyłaje smsku presavaj sakratarcy Aksanie Kryščanovič pra toje, što a 9-j hadzinie jon praviadzie terminovuju presavuju kanferencyju. Heta było davoli niečakana, bo papiarednie pres-kanferencyja była pryznačanaja na 12 hadzinaŭ. Kali Aksana razam ź Lvom Marholinym pryjšli da miesca praviadzieńnia pres-kanferencyi, tam užo byli telekamery troch dziaržaŭnych kanałaŭ: BT, ONT i STV. Niezaležnych žurnalistaŭ nie było — jany byli zaniatyja aryštami i chapunom na płoščy Niezaležnaści. Niečakana dla svaich kalehaŭ Jarasłaŭ dastaŭ z kišeni papierku i, zapinajučysia, začytaŭ svaju (ciapier užo sumnaviadomuju) zajavu. Na hetym "pres-kanferencyja" skončyłasia.
Lišnie kazać, što Kryščanovič i Marholin byli šakavanyja. Kali Marholin vykazaŭ svaju niazhodu z hetaj zajavaj, Ramančuk staŭ havaryć, što kali b jon nie zrabiŭ takoj zajavy, usio mahło b stać značna horš, "Łukašenka ŭsich zakataje ŭ asfalt" i "treba ratavać Anatola".
Heta, badaj, usie fakty, jakija my majem. Nam zastajecca tolki vykazać niekalki subjektyŭnych dumak pra toje, što ž "zdaryłasia z Ramančukom".
Badaj, najbolš "pryjaznaja" dla Ramančuka versija śćviardžaje, što Jarasłaŭ pajšoŭ na heta, kab vyratavać Anatola Labiedźku. Mienavita pra heta Ramančuk havaryŭ padčas svajoj karotkaj sustrečy z Łukašenkam, i hetyja słovy navat pakazali pa dziaržaŭnych telekanałach. Jak na mianie, dyk hetaja versija vyhladaje chutčej jak aficyjnaje apraŭdańnie dziejańniaŭ Jarasłava. Nu sapraŭdy, čamu jon prosić vyzvaleńnia tolki Labiedźki, a nia ŭsich zatrymanych? Ci chacia b usich zatrymanych siabraŭ AHP? I jak hučać arhumenty Ramančuka pra toje, što Labiedźku treba vypuścić, bo jon nie vinavaty? A inšyja, atrymlivajecca, vinavatyja?
Taksama mienš za ŭsio ja schilny daviarać tradycyjnaj abyvacielskaj banalnaj versii, što "Ramančuka kupili". Dali niejkuju pasadu, paabiacali svabodu dziejańniaŭ i hetak dalej. U dyplamatyčnych kołach užo chodziać čutki, što Ramančuk moža stać namieśnikam ministra zamiežnych spravaŭ (zaŭvažu, što časta mienavita ŭ dyplamatyčnyja koły naŭmysna ŭkidvajucca niejkija dezy).
Ramančuk pavinien razumieć, što pryniaćcio im luboj pasady ciapier — u takoj sytuacyi, pad takim "soŭsam" — aznačaje palityčnuju śmierć: jon nia stanie svaim dla łukašenkaŭskaj namenklatury, a demakratyčnaja supolnaść jaho praklanie.
Ź inšaha boku, pryručyć mienavita Ramančuka vielmi važna dla Łukašenki — nie sakret, što akurat Ramančuk byŭ adnym ź lubimych kandydataŭ mnohich eŭrapiejskich palitykaŭ. Manipulavać im — heta jašče i aznačaje atrymać lišni kozyr u składanaj palityčnaj hulni z Eŭropaj.
Treciaja versija i, mahčyma, samaja praŭdapadobnaja: kalehi Ramančuka pa AHP upeŭnienyja, što Jarasłava złamali. Čym złamali, zrazumieła, skazać dakładna nia moža nichto.
Mahčyma, prosta krasamoŭna namalavali perspektyvu turemnaha źniavoleńnia i taho, što moža adbycca ź Jarasłavam za kratami.My viedajem, što ŭ adroźnieńnie ad Anatola Labiedźki Ramančuk nia vuličny bajec, jon nikoli nie siadzieŭ za kratami, jaho nikoli nie źbivali na demanstracyjach, jahony asabisty dośvied u biełaruskaj palitycy abmiažoŭvaŭsia pieravažna artykułami dy kanferencyjami. Sutyknuŭšysia z psychalahičnym (my nia viedajem, moža i fizyčnym) ciskam, Jarasłaŭ byŭ da jaho nie padrychtavany. U internecie ciapier źjaviłasia infarmacyja, što Jarasłavu pahražali žyćciom jahonaha plamieńnika. Plamieńnik Ramančuka sapraŭdy byŭ zatrymany na płoščy i znachodzicca ciapier u Žodzinskim SIZA. Naturalna, što najlepšaj abaronaj jamu budzie poŭnaja infarmacyja pra jahony stan i miescaznachodžańnie.
Čym "padčapili" Jarasłava, jakimi faktami jahonaj bijahrafii, jakimi asablivaściami jahonaha pryvatnaha žyćcia? My nia možam viedać. Ale, mahčyma, Jarasłaŭ pavinny zrazumieć, što, adnojčy trapiŭšy na "kručok", vielmi ciažka budzie ź jaho sarvacca.
